Read Kok Borok 2 KORINTH 9 Bible Online

2 KORINTH 9 - Kok Borok bible

2 KORINTH 9

¹Judiani Kaitorni bororokno chubamani kókno ang norokno swina nang ya.

²Ang saui mano norok chubana muchungwi tongo, Makidoniani bororokni thani ang norokni bagwi kók kotorbo sa kha, “Semani simi Grisni takhukrokno chubana tiyar tongo,” hwnwi ang sa kha. Norok muchungma bai bórokni bere kwbángma’-no khá sicha kha.

³Chwng norokni bagwi kók kotor sama kók ha-o klai ya tẃi khe ang tabuk o takhukrokno rohoro. Phiya ba ang sama tẃi’-no norok tiyar wng di.

⁴Wng ya khe ang bai baksa Makidoniani bororok phaiwi norokno tiyar wngjak nuk phai ya khe chwng norokno aswk poito khlaima bai bwswk lachimasingcha wngno, norok bwswk lachino ang a kókno sa li ya!

⁵Aboni bagwi ang o takhukrokno ani slái swkang’-no norokni thani thángwi norok rwna gosimano tiyar khlai ja di hwnwi sana nang anw hwnwi khá ka kha. Hakhe ang tháng khe’-no abo tiyar wng anw, phiya norok rwthai hwnwi rw ya, muchungma bai se rw-o hwnwi sijak anw.

⁶O kókno muitu narwk di: maichlwi kisa sarnai borok bo mai kisano mannai; maichlwi kwbáng sarnai borok bo mai kwbáng mannai.

⁷Joto borokno khá chong tẃino rwthai; khá yok twtwi ta rw thung, rwna nango hwnwibo ta rw thung, tamni hwn ba Kaitor khá srangwi rwnaino se hamjago.

⁸Norok samung nangmani slái phano Kaitor kwbángma rwui mano, hakhe norok nangma tẃino man anw, phiya samung kahamni bagwi norok kwbángma rwui man anw.

⁹Elembago hai hwnwi sama hai, “Bo kwrwirokno yak kuar khe rw-o; mol brúm brúm bo khairok máng tongo.”

¹⁰Sarnaino maichlwi rwnai tei chánani mai rwnai Kaitor’-no norokni nangma swk’-no maichlwi rwnai; bo’-no abono tor rwnai, hakhe norok yak kuar khe rwma tẃi bo mai kwbángma rwnai.

¹¹Norok yak kuar khe rw máng tongna tẃi khe bo norokno gwnang khlaiwi tonnai, hakhe aswk borok norok rwmarokno chini yak tẃi manẃi Kaitorno hambai rwnai.

¹²Norokni o samung khlaimani abo biyalo klaijak Kaitorni bororokno chubama simi klai ya, abo Kaitorno belai kwbángma hambai rwmabo klai-o.

¹³Norokni o samung phunukma bai norok poito khlaimani Khristoni a Kothoma Kahamno narwgwi tongmani bagwi borok kwbángma Kaitorno lob anw, norok bóroknobo buinobo yak kuar khe rwmani bagwibo bórok Kaitorno lob anw.

¹⁴Hakhe Kaitor norokno belai khairokma bai bórok norokno belai hamjagwi norokni bagwi suri sannai.

¹⁵Kaitor chwngno rwmani abo khúk bai sa bai ya, aboni bagwi phai di, chwng bono hambai rw lai anw.