Read Kok Borok GALATIA 1 Bible Online

GALATIA 1 - Kok Borok bible

GALATIA 1

¹Ang Pol omono swihoro, ang borok bai chonghor chongjakma buya, borokni yak tẃi chongjakma buya, tamo khe Jisu Khristo bai tei bono kwthwini mwthangwi tisanai Pha Kaitor bai se ang chongjago.

²Ang bai baksa oro tongnai bebak takhukrokbo Galatia motharokno khápang rohoro.

³Chini Apha Kaitor tei Subrai Jisu Khristo norokno khairok thung, norokno khá kwchang rw thung.

⁴Tabukni o mol hamyani yakni chwngno phiyókna bagwi Khristo chini Apha Kaitor muchungma tẃi chini sumsokni bagwi bo sakno rw kha.

⁵Mol brúm brúm Kaitor chẃngsacha wng thung! Amen.

⁶Ang ba norokno uana kha bla! Khristo khairokma bai norokno a ringnaino norok aswk dakti khibiui tei kaisa kothomano kaham hwnwi rom lang.

⁷Tei kaisa kothoma kaham khe kw se kwrwi, tamo khe baksa borok norokno khá swbaiwi tongma bai, phiya Khristoni Kothoma Kahamno philna naima bai se ang o kók sa-o.

⁸Phiya ba chwng norokno pírmani a Kothoma Kaham bai phér laijak tei kaisa kothomano kaham hwnwi chwng phano pírma tong khe, chuknohani suari phano pírma tong khe, bo gaija thung!

⁹Chwng swkang’-no uáisa o kókno sa kha, tabuk ang haino hai sa-o: norok yachakmani Kothoma Kaham bai phér laijak tei kaisa kothomano kaham hwnwi khoroksa swk norokni thani pír khe bo gaija thung!

¹⁰Borok bai kaham hwnjakna bagwi da ang o kókno sa-o hwnwi tong ba? I’nhi, aboni bagwi ya! Ang Kaitor bai se kaham hwnjakna nai-o. Ang borok bai da hamjakna nai ba? Ang tabuk phano abo hai naiwi tong khe ang Khristoni seleng ya.

¹¹Takhukrok, ang norokno o kók sana nai-o, norokni thani ang Kothoma Kaham pírmani abo borok banokma ya.

¹²Ang abo borokni aroni manma buya, kebo ano abo phrwngma buya. Tamo khe omo katswi Jisu Khristo bo sak baithang ano phunukma se.

¹³Judairokni tongmung tong phuru ang bahai khe tongwi phai kha, ang bahai khe Kaitorni mothano sátogwi sokomorna hwnwi káphra kha, abo norok khna kha.

¹⁴Judairokni tongmungno rákhok thani ani sak baksarokni bere ang’-no akhini swkangjak, chini chuchusongni sakni manwi phaimarokno narwk thani ang belai bwkha rwjak.

¹⁵Tamo khe Kaitor ano khairokma bai ang achai ya sini’-no bo ano chong kha, hakhe bini samungo bo ano ring kha. Hakhe buini bororokno bini Sajlani kók pírna tẃi khe bo bini Sajlano ano phunukna khá chong kha. Aphuru ang khoroksano phano sẃngna tháng ya,

¹⁷ani slái swkang chonghor tongnairok bai malaina hwnwibo Jerusalemo tháng ya. Tamo khe ang uáisa bai’-no Arabia-o se tháng gra si-o, ulo ang Damaskoso kiphilwi phai kha.

¹⁸Nokha bisiktham ulo se ang Pitor bai malaina hwnwi Jerusalemo tháng si-o, hakhe ang bo bai nokha sal chiba tongbu kha.

¹⁹Subraini takhuk Jakobno karwi ang aphuru tei khoroksa chonghorno phano nuk buya.

²⁰Ang swimani o kók kubui se. Ang kók tatal sa ya, Kaitor tongo.

²¹Aboni ulo ang Siriya bai Kilikiarogo tháng kha.

²²Aphuru Judiani Khristan mothani bororok ano sini rwk li ya gwja.

²³Bui hai hwnwi sama simino bórok saui mano: “Uáisa chwngno sátogwi chwng poito khlaimani a kókno sokomorna nainai a borok se tabuk le a kók pírwi tong si-o!”

²⁴Hakhe bórok ani bagwi Kaitorno lob lai kha.