Read Kok Borok GALATIA 2 Bible Online

GALATIA 2 - Kok Borok bible

GALATIA 2

¹Nokha bisi chibrwi ulo ang Barnaba bai Jerusalemo kiphilwi tháng kha; Titnobo ang logi tlango.

²Kaitor ano aro tháng di hwnma bai se ang aro thángo. Ang bokhorokrokno simi malaiwi buini bororokni thani ang pírmani Kothoma Kahamno saui khna rw kha. Ani agini samungnobo ahaino rohorna nai ya, tabukni samungnobo ahaino rohorna nai ya.

³Ani logisong Tit bo Grik phano sakur ma rajaknai hwnjak li ya.

⁴Tamo khe takhukrok hai khe chini bisingo hap phainairok baksa bono sakur ra rwna nai kha. Khristo Jisu bai thansa wngwi chwng yókmano naina bagwi bórok tepsa khe siadi wngwi se hap phai-o. Bórok chwngno seleng khatiui rwna nai-o.

⁵Kothoma Kahamni kók kubuino norokni bagwi narwkna hwnwi chwng thopsa phano bórokni kók khna li ya.

⁶Tamo khe kisa bokhorok hairok bórokno ang bokhorok hai ma tong ya abo bai se o kók sa-o; Kaitor saka saka nai ya, a bokhorokrok bórok ano kók kwtal sa li ya hwnwi ang sa-o.

⁷Tamo khe bórok nuk kha Judairokni thani Pitorno Kothoma Kaham pír rwma haino Kaitor anobo buini bororokni thani Kothoma Kaham pír rw kha.

⁸Tamni hwn khe Pitor katswi chonghor snamjagwi Judairokni thani rohorjakma hai angbo Kaitorni phan bai buini bororokni thani rohorjak kha.

⁹Kaitor khairogwi ano o samung ber kha hwnwi kisa bokhorok hai Jakob, Pitor tei Johonsong saui man kha; abo baino bórok ang bai tei Barnaba bai yak bai yak rom phai kha. Chwng buini bororokni thani samung khlainai, bórok khe Judairokni bisingo samung khlainai, chalai kaisani borok ba chwng bebakno abo soi lai kha.

¹⁰Bórokni mothani kwrwirokno chubana hwnwi bórok o kók simi se sa-o, angbo abono’-no khlaina muchungo.

¹¹Pitor Antioko phai khe ang pháng pháng khe bono hwnna bagwi bacha kha, tamni hwn ba bo jai khe’-no cha ya.

¹²Jakob rohormani khoroknwi khoroktham borok aro sók phai ya sini Pitor buini bororokni bisingni takhukrok bai chá laiwi tongo. Phiya o bororok sók phaima le bo uslu kha, hakhe bórok bai chá se chá li ya; tamni hwn ba buini bororokno sakur ra rwna nainairokno bo kirijago.

¹³Hakhe tei Judai takhukrok Pitor bai baksa borok kokoi wng kha, hakhe Barnaba phano se bórok hai ma wng kha.

¹⁴Ang naiwi ba bórok himmani a lama Kothoma Kahamni a lama bai twngsa klai lai ya, hakhe bórok bebakni bwskango ang Pitorno hai hwnwi hwn kha, “Nwng Judai phano Judai hai khe tong yaui buini borok hai khe se tongo. Hakhe bahai khe nwng buini bororokno Judai hai khe tong rwna nai?”

¹⁵Chwng Judai wngwi’-no a le achai-o, sumsok gwnang buini borok wngwi achai ya.

¹⁶Hai phano chwng saui mano Jisu Khristono poito khlaima bising tẃi simi se borok Kaitor bai kaham hwnwi romjaknai, Kerongo tongma hai khlaima bising tẃi kaham hwnwi romjak ya. Kerongo tongma hai khlaima bising tẃi ya, Khristono poito khlaima bising tẃi Kaitor bai kaham hwnwi romjakna tẃi khe chwngbo Khristo Jisuno poito khlai-o. Tamni hwn khe Kerongo tongma hai khlaima bising tẃi khoroksa phano Kaitor bai kaham hwnwi romjak ya.

¹⁷Chwng Khristo bai thansa wngwi Kaitor bai kaham hwnwi romjakna nai thani buini bororok hai chwng sumsok gwnang hwnwi haino sijak khe hakhe abo Khristoni yak tẃi da sumsok khlai rwma klai, hai da? I’nhi, abo wngwi se man ya!

¹⁸Ang swbaiwi khibimano ang haino hai tisa phi khe abo ang se Kerong swbaima klai-o.

¹⁹Kerongni kók hwn khe ang ba kwthwi se, Kaitorni bagwi kwthang tongna tẃi khe ang Kerong bai butharjak kha. Khristoni kruso ang bo bai baksa butharjak kha,

²⁰hakhe o kwthang tongnai ang abo ang ya, abo ani bisingo tongnai Khristo se. Tabuk ang thangwi tongmani abo Kaitorni Sajlano poito khlaiwi tongma bai se ang thangwi tongo, bo ano hamjagwi ani bagwi bo sakno rw kha.

²¹Kaitorni khairokmano ang nor ya. Tumungno khoroksa swk Kerongni bising tẃi Kaitor bai kaham hwnwi romjak khe Khristo haino se thwi khna.