Read Kok Borok GALATIA 3 Bible Online

GALATIA 3 - Kok Borok bible

GALATIA 3

¹O butua Galatiarok, norokno sabo kubuino poito chá rw ya khlaina bagwi danda pati rw lang? Jisu Khristo kruso thwimani kók norokni mokol bwskango pháng pháng!

²Ano o kók tháisa’-no sa di, Kerongo tongma hai khlaiwi norok Kaitorni Phola da man, eba Kothoma Kahamno khnaui poito khlaiwi da man?

³Norok tamo swk butua gwja! Kaitorni Phola bai chengsa tirwi se tabuk norok sakni phan bai se páina naiwi tongo?

⁴Norok aswk manjagwi phaimarok ba katswi haino da kochok lang? Abo haino kochokma se klai ya ta!

⁵Kerongo tongma haino khlaima bai da, eba Kothoma Kaham khnaui poito khlaima bai da Kaitor norokno Phola rw, phiya norokni bisingo ha-o nuk ya samung khlai?

⁶Omo katswi elembago hai hwnwi Abrahamni kók sama hai se, “Bo Kaitorno poito khlai-o, hakhe bo poito khlaima bai Kaitor bono kaham hwnwi rom kha.”

⁷Hakhe poito khlainairok se Abrahamni bosong sói hwnwi norok si di.

⁸Kaitor buini bororokno poito khlaima bising tẃi se kaham hwnwi romnai, abo elembago swkang baira sajak kha. Hakhe elembago swkang baira’-no Abrahamno hai hwnwi Kothoma Kaham pírjak kha, “Nini bising tẃi Kaitor bebak dopharokno hammari rwnai.”

⁹Abraham poito khlai kha, hakhe hammari rwjak kha; abo baino poito khlainairok bebak’-no bo hai khe hammari rwjaknai.

¹⁰Kerong rákhokmano khatungwi tongnairok bórok swraimung bisingo se tongo. Tamni hwn khe Elembago hai hwnwi sa-o, “Kerong bijabo swijak tongmani abórokno mathe’-no sal brúm brúm rákhok ya khe a borok Kaitorni swraimung bisingo se tongo.”

¹¹Kerong rákhokma bai khoroksa phano Kaitor bai kaham hwnwi romjak ya omo tabuk pháng pháng khe sijak kha, tamni hwn khe Elembago hai hwnwi sa-o, “Poito khlaima bising tẃi Kaitor bai kaham hwnwi romjaknai borok bo se thangwi tongnai.”

¹²Yang Kerong le poito bai gwda-gormo se kwrwi. Aile Elembago hai se sa phiro, “Kerongo tongmarokno mathe khlainai borok bo abo bai’-no thangnai.”

¹³Tamo khe Khristo bo sak baithang swraimung nangwi Kerongni swraimungni yakni chwngno phiyók kha; tamni hwn khe elembago hai hwnwi sa-o, “Buphango khachijaknai borok bo Kaitorni swraimung nangjak.”

¹⁴Kaitor Abrahamno rwna hwnwi kók rwmani a hammarino Khristo Jisu tẃi buini bororokno rwna tẃi khe, phiya Kaitor rwna hwnwi kók rwmani a Pholano chwng poito khlaima bising tẃi manna tẃi khe Khristo o samungno khlai kha.

¹⁵Takhukrok, borokni tongmungno phunugui ang o kók sa-o, borok khoroknwirok mungsa swk khlaina soi laiwi kók kha lai khe a kók khamano kebo phano swbaiwibo man ya, boksinwibo man ya.

¹⁶Hakhe tabuk, Kaitor Abraham bai bini bosongni thani kók rw kha. Elembago “nini bosongrokni thani” hwnwi aswk borok kwbángmano sa ya. Aro “nini bosongni thani” hwnwi khoroksa susukno se sa-o, abono Khristo.

¹⁷Ang sama khe omo hai, Khristo tẃi Kaitor swmai tang kha, abono narwkna hwnwi kókbo rw kha. Hakhe nokha bisi brwira tei kwthamchini ulo sók phainai a Kerong a swmai tangmanobo swbaiwi man ya, Kaitor kók rwmanobo sepleui man ya.

¹⁸Tumungno Kaitor rwmani abono Kerong bai man khe bo swmai tangma bai ma se man glak. Hai phano Kaitor kók rwma bai omono Abrahamno rw kha.

¹⁹Hakhe Kerong le tamni bagwi sla? Bubo samung cha ya abono phunukna bagwi se omo boksinjago, phiya kók rwjaknai Abrahamni a bosong phai ya sak tongna bagwi se abo rwjago. A Kerong suarirok bai kwcharni borokni yak tẃi yapharwi rwjak kha.

²⁰Phiya borok khoroksa susuk se hwn khe aro kwcharni borok nang ya; Kaitor wng kha khoroksa.

²¹Hakhe Kerong ba Kaitor kók rwmano da kebengma klai? I’nhi, thopsa phano ya! Tamni hwn khe tumungno borokno mwthangwi mannai abo tẃi kerong tongma te borok kerong tẃi’-no Kaitor bai kaham hwnwi romjak kha mun.

²²Tamo khe Jisu Khristono poito khlaima bising tẃi rwna hwnwi kók rwmani abono poito khlainairokno rwui manna tẃi khe bebak swngchar sumsokni yago khlaijak hwnwi Elembago sajak kha.

²³Hai phano poito khlaina jora wng ya sini a poito khlaijaknaino phunukjak ya sak Kerong chwngno alongo hapnairok hai khe chobwi ton kha.

²⁴Abo baino poito khlaima bising tẃi chwng Kaitor bai kaham hwnwi romjakna tẃi khe Khristo phai ya sak Kerong chini barja wngwi tong kha.

²⁵Tabuk poito khlaina jora sók phai kha ba Kerong tei chini barja li ya.

²⁶Khristo Jisu bai thansa wngwi norok bebak Kaitorni bwsa wngmani abo poito khlaima bising tẃi wngma se.

²⁷Norok Khristo bai thansa wngma bagwi baptisma wng kha, hakhe bini tongmungno norok sak baithang na kha.

²⁸Abo baino Judai bai buini bororok phér lai ya, seleng bai nokphang phér lai ya, bwrwi bai chwla phér lai ya; Khristo Jisu bai thansa wngwi norok bebakno kaisa.

²⁹Tumungno norok Khristoni borok wng khe norok Abrahamni bosong, hakhe Kaitor rwna hwnwi kók rwmano norok mannai.