Read Kok Borok GALATIA 4 Bible Online

GALATIA 4 - Kok Borok bible

GALATIA 4

¹Ang sama khe omo hai, buphani sompoti mannaisa a bwsa chwrai phuru seleng hai khe tonjago; bo kubui’-no bebak sompoti mannai wng phano seleng hai khe tonjago.

²Bupha khá tholmani mol phai ya sak bo chwrai phuru bono naina nukna bagwi, phiya dului tẃina bagwi borok narwkjak tongo.

³Khá si ya sini chwngbo abo haino swngcharni mwtairokni seleng se khatiui tongo.

⁴Tamo khe jora phai súk kha hwn khe Kaitor bini Sajlano rohor kha. Bo borokni ogo achai phai kha, hakhe chwng Kaitorni bwsa wngwi manna tẃi khe Kerongni yago tongnairokno phiyókna bagwi bo Judai Kerong rákhogwi phai kha.

⁶Norok Kaitorni bwsarok se abono phunukna bagwi Kaitor bini Sajlani Pholano chini bwkha bisingo rohor kha, a Phola “Apha, ani Apha,” hwnwi hwno.

⁷Hakhe abo baino nwng tei seleng li ya, nwng bwsa se. Hakhe nwng Kaitorni bwsa wngma bai Kaitor bini bwsarokni bagwi khatiui tonmarokno nono rwnai.

⁸Agi norok Kaitorno sini ya, hakhe norok mwtairokni seleng khatiui tongma se.

⁹Tamo khe tabuk norok Kaitorno sini kha, sana tháng khe Kaitor norokno sini kha, hakhe bahai khe norok a mungsa chúk ya mwtai kebelrokni thani kiphilwi thángna nai phi ba? Norok tamo wngwi haino hai bórokni seleng khatina nai phi ba?

¹⁰Norok salrok, talrok, molrok tei bisirok rákhok lai-o.

¹¹Ang norokno uana-o! Norokni bagwi ang aswk samung khlaimani abo haino da wng langno?

¹²Takhukrok, angbo norok haino ba norokbo ang hai wng ja di hwnwi ang koi ja-o. Norok ani mungsabo hamya khlai ya.

¹³Ang tamo wngwi norokni thani swkang Kothoma Kaham pír gra abo norok saui mano; ang hamya klaimani bagwi se abo pírjago.

¹⁴Tamo khe ang hamya klaimani abo norokno potalima klai phano norok ano nabo naisler li ya, khibo khibi li ya. Teibo se, Kaitorni suarino yachakma hai norok ano yachak kha; Khristo Jisuno yachakma hai norok ano yachak kha.

¹⁵Norok aphuru bwswk se tongthokjak kha! Tabuk tamo wng kha sla? Norokni o kókno ang saui mano, norok manma te norokni mokolno ekhregwi ano rw kha mun.

¹⁶Norok kók kubui sama bai ang ba tabuk tamo norokni kena ari da wng lang?

¹⁷A bororok norokno khá súgwi phunuksa tiro, tamo khe bórok norokni kaham nai ya. Norok bórokno khá sukna tẃi khe bórok ang bai norokno swkakna nai-o.

¹⁸Kahamni bagwi khá súgwi tongma kaham se, ang norok bai tong phuru simi ya, ang kwrwi phuru phano omo kubui se.

¹⁹Angsarok, Khristoni tongmung norokni bwkha bisingo phai ya sak bwsa bána phuru bwrwirok bohok sajakma hai angbo haino hai abo haino sajago.

²⁰Ang tabuk norok bai bwswk se tongna muchung, hakhe ang norokno kók juda saui mannai. Norokni bagwi ang belai khe uanama klai kha.

²¹Kerongni yago tongna muchungnairok ang norokno o kók sẃngo: Kerongo samani o kók norok khna ya diba?

²²Abrahamni bwsla khoroknwi tongo hwnwi Kerongo sa-o, khoroksa khe selengjwkni nokni, tei khoroksa khe bihikni nokni.

²³Selengjwkni nokni bini a bwsla khe ahaino achaimani, phiya bihikni nokni abo khe Kaitor kók rwma bai achaimani.

²⁴O kókni kothoma tongo, abo khe hai: a bwrwi khoroknwirok wng kha swmai tháinwini kók se. Aboni bere tháisa khe Sinai Hatháini phaimani, abono Hagar, bini bwsarok’-no seleng wngwi achainai.

²⁵Hagar khe Arabiani Sinai Hathái, bo wng kha tabukni Jerusalem taun, bini aroni bebak bororok bai baksa bo seleng khatijak.

²⁶Phiya ba chuknohani Jerusalem khe seleng khatijak ya, bo wng kha chini ama se.

²⁷Tamni hwn khe Elembago hai hwnwi sa-o, “O bwsa man ya bwrwima, nwng khá srang di! O bánani bohok ma sajak ya bwrwima, nwng tongthogwi chirikhók di! Tamni hwn khe bwsai bai tongnai bwrwini slái bwsai bai tong ya bwrwini bwsa báng kuknai.”

²⁸Takhukrok, norok tabuk hai khe Kaitor kók rwma bai katswi Isak hai Kaitorni bwsa wng kha.

²⁹Aphuru haino achainai a bwsa Kaitorni Phola bai achainai a bwsano sátok kha; hakhe tabukbo abo haino wngwi tongo.

³⁰Yang elembago tamo sa? Elembago hai hwnwi sa-o, “A selengjwk bai bini bwslano rwkhlaiwi rohor di, tamni hwn khe a selengjwkni bwsla a bihikni bwsla hai buphani sompoti man glak.”

³¹Hakhe takhukrok, chwng a selengjwkni bwsa ya, chwng a bihikni bwsa se.