Read Kok Borok GALATIA 5 Bible Online

GALATIA 5 - Kok Borok bible

GALATIA 5

¹Chwng phiyókjak kha, Khristo chwngno phiyók kha! Phiyókjak borok hai khe tong di, haino hai seleng ta wng phi di.

²Khna di, ang Pol norokno o kók sa-o: norok sakur ra rwjak khe Khristo norokni thani samung nang súk ya se wngma klai-o.

³Ang tei uáisa hwno, sakur ra rwjak khe a borok Kerongo tongmani bebak’-no ma se ma rákhok thai klai-o.

⁴Norokni bere Kerong rákhogwi Kaitor bai kaham hwnwi romjakna nainairok norok Khristo bai se kak lai-o. Norok Kaitorni khairokma se keple-o.

⁵Chwng hwn khe hai, Kaitor chwngno kaham hwnwi romnai hwnwi khatungwi tongo; chwng poito khlaima bising tẃi Kaitorni Phola samung khlaima bai chwng omono’-no naisingwi tongo.

⁶Tamni hwn khe Khristo Jisu bai chwng thansa wng kheno sakur rajak bai sakur rajak ya abo phér laina kwrwi kha; oro kók wng kha tamo, omo poito khlaiwi hamjak laimani kók se.

⁷Norok agi kaham’-no tong laimani. Kubui khe tongnani norokno sabo kebeng ba? Bo bahai khe norokno mothor kha ba?

⁸Omo norokno ringnai Kaitor khlai ya.

⁹Kógono tongo “Chuan kisicha bai se aswk mai kwbángma lomo.”

¹⁰Norokno ang tabuk phano katswi sói hwnwi tongo. Subrai bai chwng thansa wngma bai norok juda khe uansuk glak hwnwi ang poito khlai-o; norokno khá swbainai borok, bo jesa phano wng thung, bo Kaitor bai yagul sujaknai.

¹¹Tamo khe takhukrok, sakur rajakna nangnai hwnwi ang pírwi tongo hwn khe tamo wngwi ang ba tabuk phano sátokjagwi ma tong sla? Abo kubui wng khe ang Khristoni krusni kók pírmani abo tekto rwma klai ya.

¹²Ang nai-o tamo, norokno khá swbainairok bórok sak sakno mála suda karwi na thung.

¹³Takhukrok, norok hwn khe phiyókjakna bagwi se ringjago. Tamo khe phiyókjakma bai norok sak tongthokna lama ta nai di. Hai wng yaui norok hamjak laiwi khoroksa tei khoroksano nai di.

¹⁴Tamni hwn khe Kerongo tongmani bebak’-no o kók tháisa’-ono khopjago: “Nwng sakno hamjak tẃi’-no buinobo hamjak di.”

¹⁵Hus wng di, tumungno norok uak-tokrok tongma hai uásik lai khe, uáthar lai khe norok kiching norok sokomor súk laina se.

¹⁶Ang sama khe hai se: norok Phola bai dului tẃijak di, sakni muchung tẃi ta tong di.

¹⁷Tamni hwn khe chwng sakni muchungmani abo Phola muchungmano kebengo, phiya Phola muchungmani abo chini sakni muchungmano kebengo. O kwnwi wng kha bobo bini kena ari, hakhe norok muchung tẃi khlaiwi man ya.

¹⁸Tumungno Phola norokno dului tẃi khe norok Kerongni yago kwrwi kha.

¹⁹Borok sakni muchung tẃi tongmani abo wng kha katswi pháng pháng. Borok buitali-buitala wngo, tongmung sitra tongo, sak tongthok tongo,

²⁰takjak mwtaino suri-o, swkal wngo. Bórok kena ari wng lai-o, bu lai-o, músú lai-o, joli lai-o, sak hamna batai lai-o, kak laiwi gut kha lai-o;

²¹bórok risi gwnang, chuak nungwi jurang uaija lai-o, omo hai teibo samung khlai lai-o. Swkango hwnma hai tabukbo ang norokno hwno, omo tẃi tongmung tongnairok bórok Kaitorni ha-o ha banta man glak.

²²Phola khe borokno hamjak rw-o, tongthok rw-o, khá kwchang rw-o, hama lok rw-o, khairok rw-o, Phola bai se borok kaham wngo, kók khnanai wngo,

²³Koinene wngo, sak soinai wngo. Omo tẃirokno hamya hwnnai abo tẃi kerong kwrwi.

²⁴Khristo Jisuni borok wngnairok bórok sakni muchung tẃi sak motók tẃi tongmano kruso kanta bu-ui khibi kha.

²⁵Phola chwngno mwthang kha; bo chwngno yak tolwi se tẃinai ta.

²⁶Chwng kung ta chuk thung, chwng bai chwng tekto ta phnang thung, ta músú lai thung.