Read Kok Borok GALATIA 6 Bible Online

GALATIA 6 - Kok Borok bible

GALATIA 6

¹Takhukrok, tumungno khoroksa swk samung hamya khlaiwi romjak khe norok kahamrok bono lama kahamno tubuthai klai-o; tamo khe norok abo kwchang kwchang khe ma khlaithai klai-o. Phiya nwng belokjak ya tẃi khe hus khe tong di.

²Khoroksa tei khoroksani poja tẃi chru lai di, hakhe omo tẃi kheno norok Khristoni kerongno rákhokma klainai.

³Mungsa wng yaui’-no khoroksa swk bo sakno akhini mungsa swk hwnwi khá kaui tongsa ti khe a borok sakno se bandi-o.

⁴Jotono janija tongmungno uansugui nai thung. Tumungno abo kaham hwn khe buini tongmung bai abono su yaui’-no bo ahaino kung chugui mano.

⁵Tamni hwn khe jotono janija pojano ma tẃithai.

⁶Khristanni kók phrwngjaknai a borok le bini manwi kahamrokno a phrwngnaino banta khlaiwi rw thung.

⁷Norok lama ta koró di, Kaitorno khoroksa phano bandiui man ya. Borok káimani abono’-no bo ma ranai.

⁸Bo tumungno sakni muchungmani kheto manwi kái khe bo abo thwinani manwino se raui thumnai; bo tumungno Pholani kheto manwi kái khe abo mwthang phlainai manwino se raui thumnai.

⁹Abo baino phai di, chwng samung kaham khlainano ta yakar di; chwng khá bái yaui samung kaham khlaiwi tong kha hwn khe ranani jora haino sók phainai.

¹⁰Hakhe abo baino lama man brúm brúm chwng jotoni’-no kaham ma khlaithai, aboni bere se chwng hai poito khlainai takhukrokni khe teibo ma khlaithai klai-o.

¹¹Tabuk nai di, norokni thani ang yak baithang bwswk rikthai kotor khe swi kha.

¹²Saka saka bwsak simi kaham khe phunuknairok le bórok norokno juraboli khe sakur ra rwna nai-o. Hai phano Khristoni krusni bagwi sátokjaknani yókna hwnwi se bórok omono khlai-o.

¹³Sakur rajaknairok phano se Kerong rákhok ya; bórok norokno sakur rana nai-o, hakhe norok o sakur rajakma bai bórok kók kotor saui mano.

¹⁴Hai phano ang le chini Subrai Jisu Khristoni krusni bagwi simi se kók kotor sanai; tamni hwn khe bini krus bai khe o swngchar ani thani kwthwi se, phiya angbo o swngcharni thani kwthwi.

¹⁵Tamni hwn ba Khristo Jisu-o le sakur rajak phano wng thung, eba rajak ya phano wng thung, abo kusu buya. Oro kók wng kha tamo? Omo borok kwtal wngmani kók se.

¹⁶O kók hai khe tongnairok bórok khá kwchang rwjak thung, maya chájak thung bórok bai Kaitorni bebak bororokbo haino khlaijak thung.

¹⁷Páinanogo, kebo ano tekto ta rw bai si thung, tamni hwn khe ani bwsago marirok tongmani abono ang Jisuni seleng hwnwi phunugo.

¹⁸Takhukrok, chini Subrai Jisu Khristo norokno khairok thung. Amen.