Read Kok Borok EPIS 3 Bible Online

EPIS 3 - Kok Borok bible

EPIS 3

¹Aboni bagwino norok buini bororokni bagwi Khristo Jisu bai alongo chopjaknai ang Pol Kaitorni thani suri sano.

²Norokni kahamni bagwi Kaitor khairogwi ano o samungno bermani abo norok khw se khna khna ta.

³Kaitor bini khá bisingni kók si rwma bai ang abono saui mano. (O kókno ang barasa khe swi kha,

⁴hakhe ang swimani abono pori khe Khristoni bisingni kók ang saui manmano norok saui mannai.)

⁵Agi bororokno bisingni o kókno sajak ya, tamo khe Kaitor tabuk Pholani bising tẃi khe bini chonghor kwtharrok bai diyarirokno abono si rw kha.

⁶Bisingni a kók khe omo hai: Kothoma Kahamni bising tẃi Kaitor rwna hwnwi kók rwmarokno buini bororok Judairok bai baksa mannai; bórok bwsak kaisani yakung yak, phiya Khristo Jisu tẃi Kaitor rwna hwnwi kók rwmani arobo bórok khopjak kha.

⁷Kaitor khairokma bai ang o Kothoma Kaham pírna bagwi seleng snamjak kha, abo bini phan bai se wngo.

⁸Kaitorni borok kusurokni bisingo buini bororokni thani Khristo aswk khairokmani Kothoma Kahamno pírnani, phiya Kaitorni khá bisingni kók bahai khe samungo nangwi tong kha abono bebak bororokno phunuknani samungno Kaitor khairogwi ano ber kha. Tabukni o molo mothani bising tẃi chuknohani bugrarok bai bokhorokrok Kaitorni podrepot elemno saui man thung hwnwi Jisu Khristoni tẃi bebak snamnaisa Kaitor bini khá bisingni kókno agirogo mol brúm brúm khogwi phai kha.

¹¹Kaitor yaphangni simi bini khá chapma hai omo khlai kha, omo wng kha chini Subrai Khristo Jisuni bising tẃi khlaimani.

¹²Bo bai thansa wngwi poito khlaima bising tẃi chwng khá torwi Kaitorni bwskango khá khibiui bachaui manẃi kha.

¹³Ang norokni bagwi sátokjagwi tongma bai norok bwkha ta bái di hwnwi ang koi ja-o; omo bebak norokni kahamni bagwi se.

¹⁴Hakhe aboni bagwi’-no ang chini Subrai Jisu Khristoni Buphani bwskango yáskú sungo,

¹⁵chuknohani bai o swngcharni joto nokni borok bini thani se tongmung kubuino mano.

¹⁶Norok khá kwrak wng thung hwnwi Kaitor bini aswk chẃngsachani bai bini Pholani bising tẃi norokno phan rw thung hwnwi ang Kaitorno sano;

¹⁷norok poito khlaima bising tẃi Khristo norokni bwkha bisingo tong phai thung hwnwibo ang Kaitorno sano. Norok hamjakma bising tẃi yarwng súrwi rak rwrwk thung hwnwi ang suri sanwi tongo.

¹⁸Hakhe Kaitorni bebak bororok bai baksa norokbo Khristo chwngno hamjakmani abo bwswk se kotor, bwswk se kolok, bwswk se kuchuk, bwswk se kuthuk, abono khá kwrak wngwi saui mannai.

¹⁹Au, bo chwngno hamjakmani abono norok saui man thung abono saui man súk ya phano; hakhe Kaitorni bebak tongmung norokni bisingo kupulung wngnai.

²⁰Chini bisingo tongnai a phan bai chwng sanma bára khlaiwi mannai, chwng uansukma bára suda khlaiwi mannai a Kaitor

²¹bo motha tẃibo Khristo Jisu tẃibo piri brúm brúm mol brúm brúm chẃngsacha wng thung! Amen.