Read Kok Borok EPIS 5 Bible Online

EPIS 5 - Kok Borok bible

EPIS 5

¹Norok Kaitorni khajama bwsa wng kha ba bo hai wngna khlai di.

²Khristo chwngno hamjagwi Kaitorno hamjak rwnai satrai motom bai mera ratharjak hai chini bagwi bo sakno rwma hai norokbo buino hamjagwi ma tongnai.

³Norok Kaitorni borok wng kha ba norokni bisingo buitali-buitalani kók, tongmung sitrani kók, phiya khámaimani kók kasa laina kók kwrwi.

⁴Kók sitra, kók nang ya tei kók labra samarok norok mwchang li ya. Hai wng yaui norok Kaitorno se hambai rwthai klai-o.

⁵Norok omono saui man súk di, buitali-buitala wngnai, tongmung sitra tongnai, eba khámainai borok (khámaima le abo takjak mwtaino surima hai se) bo Khristoni bai Kaitorni ha-o ha banta man glak.

⁶Kók nang ya saui kebo bai lama ta koró rwjak di. Katswi omoni bagwi’-no Kaitor bini kók khna yarokno jolijagwi yagul sunai.

⁷Abo baino abo tẃi bororok bai ta tong di.

⁸Norok agi mwnakma-o tongma se, tamo khe tabuk Kaitorni borok wng kha ba pohoro sók phai kha. Abo baino pohorni borok hai khe norok tongna khlai di.

⁹Tamni hwn ba o pohor wng kha joto kisimni kaham, joto kisimni sutrang tei joto kisimni kubui manwirok kwbáng khe rw phainai.

¹⁰Tamo khlai khe Subrai hamjakno abono saui manna nai di.

¹¹Bororok khlaimani abo tẃi chúk ya samungrokno khlaina kók kwrwi, abo wng kha mwnakmani samung se. Abo hai khlai yaui abórokno se pohoro tubu di.

¹²(Bórok tep tep khlaimani a samungrokno sa laina phano belai lachimasingcha.)

¹³Bebak manwino pohoro tubu khe aphuru abórok sabo tamo pháng pháng khe nukjak anw;

¹⁴tamni hwn ba mungsa swk pháng pháng khe nukjak kheno abo pohor wng kha. Abo baino omo hai hwnwi sajak kha, “O muktrwi thángjak sicha di, thangwi bacha di! Hakhe Khristoni pohor nini saka klainai.”

¹⁵Abo baino norok bahai khe tong abono se kaham khe nai di. Si yarok hai khe ta tong di, sinairok hai khe tong di.

¹⁶Lama man kha hwn khe ta yakar di, tamni hwn khe omo wng kha mol hamya.

¹⁷Butua ta wng di, tamo khe Kaitor norokno tamo khlaina nai abono sina nai di.

¹⁸Angur bwtwi phegwi ta tong di, abo norokno sokomornai; aboni slái Phola bai koboljak di.

¹⁹Lobmung tei rwchapmung kwthar bai norok kiching norok kók sa lai di; bwkha bisingo Subraino lob twtwi rwchapmung rwchap di.

²⁰Bebakni bagwino Apha Kaitorno chini Subrai Jisu Khristoni mungwi hambai rw máng tong di.

²¹Khristono norok suriui tongma bai norok kiching norok kók khna lai di.

²²O hik hwnjaknairok, Subraini kók khnama haino norok sai-sani kók khna di.

²³Tamni hwn ba Khristo mothani bokhorok wngma haino saibo bihikni bokhorok; Khristo sak baithang mothano mwthangnaisa, motha wng kha bini bwsak.

²⁴Motha Khristoni kók khnama haino hik hwnjaknairokbo sai-sani kók ma se ma khnathai klai-o.

²⁵O sai hwnjaknairok, Khristo bo sakno rwui mothano hamjakma haino norokbo nihiksongno hamjak di.

²⁶Mothano twi-o sú-ui kuphur khlai baiwi bini kók bai abono Kaitorni yago yapharwi rwna hwnwi se bo sakno rw-o.

²⁷Mothano sap-sutra khe, majra kwrwi khe, kosom kwrwi khe, kodrojak kwrwi khe eba tei mungsa derama kwrwi khe naithok rw súgwi bini thani yapharwi manna tẃi khe bo omono khlai-o.

²⁸Omo tẃi khe sak sakno hamjakma hai’-no sai hwnjaknairok hikno hamjak thai klai-o. Hikno hamjaknai borok bo sakno hamjago.

²⁹Bwsakno naislernai khoroksa phano kwrwi. Abo wng yaui bo abono chá rw-o, khan rw-o, nai-o nugo; abo hai kheno Khristo mothanobo khlai-o,

³⁰tamni hwn khe chwng bini bwsakni se, bini bahan tei bekrengrokni.

³¹Elembago hai hwnwi sama hai, “Omoni bagwino borok buma bupha bai kagwi bihik bai thansa wngnai, hakhe a kwnwi kaisa wngnai.”

³²Elembakni o kók tháisa belai kotor, hakhe ang abono hai hwnwi romo, abo Khristo bai mothani kók se.

³³Hai phano norokni bagwibo o kókno: sai hwnjaknairok sakno hamjakma hai joto’-no hikno hamjak thai klai-o, phiya hik hwnjaknairok bórok joto’-no sai-sano sak nang ya ta wng thung.