Read Kok Borok PHILIPI 1 Bible Online

PHILIPI 1 - Kok Borok bible

PHILIPI 1

¹Khristo Jisuni seleng Pol bai Timothi omono swihoro. Khristo Jisu bai thansa wngnairok Philipi-o tongnai Kaitorni bebak bororokno tei mothani bokhorokrok bai samung khlainairokno omono swihoro.

²Chini Apha Kaitor bai Subrai Jisu Khristo norokno khairok thung, norokno khá kwchang rw thung.

³Kothoma Kahamni samungo puilani simi tabuk phano norok ano chuba chru-ui tongmani bagwi ang norokni kók uansuk brúm brúm norokni bagwi Kaitorno hambai rw-o, phiya norok bebakni bagwi suri san brúm brúm ang khápang kwsrang khe suri sano.

⁶Hakhe ang o kókno saui man súgo, norokni bisingo o samung kahamno chengsa granai Kaitor bo omono khlai te khlai te Jisu Khristoni a salo pái rwnai.

⁷Ang norokno muitu man máng tongo, hakhe norokni kókno ang omo hai kheno uansuk thai tongo. Kaitor ano khairogwi bermani o samungo norokbo ang bai baksa tongo tabuk ang alongo tong phurubo norok ang bai baksa tongo, Kothoma Kahamno narwgwi songcha phurubo norok ang bai baksa tongo.

⁸Norok bebak’-no ang khá sukmani abo Khristo Jisuni aroni ongkhorwi phaima se hwnwi sa khe o kók kubuino abo Kaitor saui mano.

⁹Norokni bagwi ang omo hai khe suri sano: norok bubo kaham abono saui manna tẃi khe sói khe sima bai nukma bai teibo hamjak rwrwkna bagwi ang suri sano. Hakhe Khristoni salo norok sutrang khe majra kwrwi wngnai.

¹¹Kaitor chẃngsacha wngwi lobjakna tẃi khe norokni bisingo sói tongmung kaham máng wngnai, abo Jisu Khristo simi se rwui mano.

¹²Takhukrok, norokno ang saui man rwna muchungo, ang manjakmarok abo bai Kothoma Kaham teibo se pírjak si-o.

¹³Aboni yagulo nukjak kha peles mwrwknairok bai oro tongnairok bebak’-no ang Khristoni seleng wngma bai se alongo chopjago hwnwi saui man bai kha.

¹⁴Hakhe ang alongo chopjakmani abo swk takhukrokno Subraino teibo poito khlaiwi rw kha, hakhe bórok kirima kwrwi khe Kaitorni kók pírmani bagwi khá tor rwrwgwi phai kha.

¹⁵Abo hai phano baksa baksa músúma bai batai laiwi Khristoni kókno píro, baksa ba khá kahamni bai bini kókno píro.

¹⁶Bórok hamjagwi se píro, tamni hwn khe Kaitor ano Kothoma Kaham narwknani samungno ber kha abo bórok saui mano.

¹⁷A músúma bai Khristoni kók pírnairok bórok khá sutrang khe pír ya, batai laiwi se píro; ang alongo tong phuru ano teibo tekto rwna hwnwi se bórok uansugo.

¹⁸Omo kusu buya! Ang omoni bagwi khá tongthok kha, chamani tẃi phano cha yani tẃi phano, hai ya khe hai phano Khristoni kók pírjagwi tongo. Hakhe ang khá tongthogwi tongnai,

¹⁹tamni hwn khe norok ani bagwi suri sanma bai, phiya Jisu Khristoni Pholani phan bai se ang phiyókjaknai hwnwi saui mano.

²⁰Ani bwkhani muchungma bai khatungma khe omo hai, ani samungni bagwi ang lachi ya; tamo khe sal brúm brúm ang khá torwi man suknai, aboni bere se tabuk ang khá torwi man suknai, hakhe ang thwi phano thang phano ani o bwsak rwui Khristoni mwkhang chẃng rwui mannai.

²¹Kwthang tongmani abo tamo? Ani thani khe abo Khristo se. Abo baino thwi khe ham kugo.

²²Tamo khe o swngcharo kwthang tongwi ang aswk samung kaham khlaiwi man khe bubono ang naithai abo ang saui man li ya.

²³Ang ba kesebo se klai si-o. Ang thángwi Khristo bai tongna muchung súk kha, abo se belai kaham;

²⁴tamo khe norokni bagwi ang kwthang tongthai klai kugo.

²⁵Ang abono saui man súgo, hakhe ang kwthang tongnai hwnwi saui mano. Norok poito khlainairokno kasa rwna bagwi, tongthok rwna bagwi ang norok bebak bai baksa tongnai.

²⁶Abo baino ang norok bai haino hai tong phai phuru Khristo Jisuni bising tẃi norok ani bagwi teibo kung chugui man anw.

²⁷Tabuk, Khristoni Kothoma Kaham naima hai norok tongna nangnai, hakhe ang norokno nainani thángwi man thung man ya thung, norok mungsano tẃiwi kwrak khe bacha lai-o, phiya khá baksa khe thansa wngwi Kothoma Kahamni kókno tẃiwi nang laiwi tongo hwnwi ang khna anw.

²⁸Norokni kena arirokno kisa phano ta kiri di, khá torwi máng tong di; hakhe bórok chennai, abo bórok nuk anw, tamni hwn khe Kaitor se norokno kwplai khlainai.

²⁹Tamni hwn ba norok khairokjagwi Khristoni samung khlainani berjak kha, bono poito khlainani bagwi simi ya, bini bagwi tekto rwjakna bagwibo.

³⁰Nang lai thani tabuk norok ang bai baksa tongwi mannai. Norok ano agi nang laima nukmani abo’-no abo, phiya tabuk phano ang abo baino nang laiwi tong kho abo norok khnajak.