Read Kok Borok PHILIPI 2 Bible Online

PHILIPI 2 - Kok Borok bible

PHILIPI 2

¹Khristo bai tongwi norok phan da man? Bo norokno hamjakmani abo norokno khá da kwchang rw? Phola bai norok thansa da wng? Norok kiching norok khá da khairok lai? Khá da khá súk lai?

²Hakhe norokno ang koi ja-o, norok khá baksa wng laiwi, baksa khe hamjak laiwi, yak bai khúk bai baksa wng laiwi ano tongthok rw súk di.

³Sakni kahamni bagwi simi eba kung chukna bagwi mungsabo ta khlai di; tamo khe buini slái kaham hwnwi uansuk yaui norok kiching norok koi laiwi tong di.

⁴Buini kaham nai di, sakni bagwi simi ta nai di.

⁵Khristo Jisu uansukma haino norokbo uansuk thai klai-o:

⁶Bo Kaitor bai baksa wngwi phano bo juraboli khe Kaitor bai baksa wngna hwnwi khá ka ya.

⁷Aboni slái bo sakno bukcha khlaiwi seleng hai se wng phai si-o. Bo borok wngwi phai kha, hakhe borok hai kheno nukjak phai kha.

⁸Bo sakno borok kusu snam kha, hakhe kók khnaui thwina lama himna gosi kha, kruso suda thwina gosi kha.

⁹Omoni bagwi Kaitor bono jotoni slái kuchugo tisa kha, hakhe tei mungrokni slái bono mung kotor rw kha.

¹⁰Abo baino Jisuni mungno surina bagwi chuknoha-o tongnairok, o swngcharo tongnairok, ha tola-o tongnairok, jotono yáskú ma sung anw,

¹¹hakhe Apha Kaitorni chẃngsachani bagwi Jisu Khristo se Subrai hwnwi bebak’-no pháng pháng khe ma sa anw.

¹²Hakhe ani khájani takhukrok, ang norok bai tong phuru norok bebago’-no ani kók khnamani slái ang kwrwi phuru norok ani kók khnama se teibo nang kugo. Mwthangjak sukna bagwi kirima gwnang khe samung khlaiwi tong di.

¹³Tamni hwn khe Kaitor bini khá chapma haino norokno tongna muchung rwna bagwi, phiya bini khá chapma haino norokno khlai rwui manna bagwi norokni bisingo samung khlaiwi máng tongo.

¹⁴Hunu-hanai sa lai yaui eba kók báng lai yaui joto samungno tangwi tháng di,

¹⁵hai khe se o swngcharni bwkha sitra kók khna ya bororokni bisingo norok majra kwrwi khe kaham wngwi sói Kaitorni bwsa hai wngwi mannai. Norok bórokno mwthangjaknani kók sa twtwi’-no nokha-o athukirirok chẃngma hai bórokni bisingo norok ma se ma chẃngna nangnai. Tumungno norok omo hai wng khe Khristoni Salo omoni jarwi ang kung chugui man anw, tamni hwn khe ang aswk lengwi samung khlaimani abo ahaino tháng li ya omo abono phunuk anw.

¹⁷Norok poito khlaimani abo Kaitorni thani ratharwi barokma hai, aro ani sakni thẃi lukhlaijakna tongo. Tumungno abo hai khlaijak khe ang khápang srango, hakhe ang norok bebak bai baksa tongthogo.

¹⁸Abo haino norokbo khápang srangwi ang bai baksa tongthok thai klai-o.

¹⁹Norokni kók khnaui ang khá srangwi manna tẃi khe Timothino norokni thani dakti’-no rohorwi man anw hwnwi ang Subrai Jisu tẃi khatungwi tongo.

²⁰Bo simi se ang bai khá baksa wngwi norokni bagwi sói khe uansuknai.

²¹Jotono sakni bagwi simi se nai bai-o, Jisu Khristoni bagwi nai ya.

²²Timothi bwswk khe samung nangnai borok wngwi phunuk kha abo norok’-no saui man bai-o; bwsla bai bupha hai khe bo bai ang Kothoma Kahamni bagwi bwswk khe samung khlai lai kha abo norok’-no saui man bai-o.

²³Ani tamo wngno wng ya abo saui manma logi’-no ang bono norokni thani rohorna hwnwi khá chongwi tong kha.

²⁴Ang sak baithang norokni thani dakti’-no thángwi man anw hwnwi Subrai tẃi ang khatungwi tongo.

²⁵Chini takhuk Epaphroditno norokni thani rohorna nangnai hwnwi ang uansuk kha, bo ang bai baksa samungbo khlai kha, ang bai baksa nabo nang lai kha, phiya norok bai rohorjagwi ano chubana bagwi samung khlai kha.

²⁶Bo norok bebakno khá thángjagwi tong kha, phiya bo hamya hwnwi norok khnamani bai bo belai uanajagwi tong kha.

²⁷Hai le bo hamya le klaijakno thwi tẃi thwi tẃi. Tamo khe Kaitor bono khairok kha, bono simi ya, ano suda khairok kha, hakhe khá bái rw li ya.

²⁸Hakhe bono haino hai nugwi norok tongthokna tẃi khe, phiya ani dukhubo kwmana tẃi khe bono norokni thani rohornani ang belai khe muchungwi tong kha.

²⁹Abo baino jai khe’-no khápang kwsrang khe Subrai tẃi takhuk hwnwi bono yachak di. Bo hai bebak bororokno bórom khlai di,

³⁰tamni hwn khe norok sak baithang ano chubaui man yano chubaui manna tẃi khe bo Khristoni samungni bagwi thwina phano gosiui phaijak, hakhe thwi tẃi thwi tẃibo wng kha.