Read Kok Borok KOLOSAI 1 Bible Online

KOLOSAI 1 - Kok Borok bible

KOLOSAI 1

¹Kaitorni muchung tẃi Khristo Jisuni chonghor ang Pol omono swihoro, ang bai baksa chini takhuk Timothibo omono swihoro.

²Kolosai-o tongnai Kaitorni bororok Khristono kwrak khe poito khlainai takhukrokno omono swihoro. Chini Apha Kaitor, Subrai Jisu Khristo norokno khairok thung, norokno khá kwchang rw thung.

³Norokni bagwi suri san brúm brúm chini Subrai Jisu Khristoni Bupha Kaitorno chwng hambai rw-o.

⁴Tamni hwn khe norok Khristo Jisuno poito khlaima kókno chwng khna kha, norok Kaitorni bebak bororokno hamjakma kóknobo chwng khna kha.

⁵Kothoma Kahamni a kók kubui norokni thani sók phai phuru norok aroni khatung-khajani kók khna kha. Hakhe norok poito khlaimani, norok hamjakmani abo norok manna hwnwi khatungmano tẃiwi se, abo norokni bagwi chuknoha-o khatiui tonjak.

⁶Norok puila Kaitor khairokmani kók khnaui abo bwswk tamo saui man phuruni simi norokni bisingo wngma haino Kothoma Kaham bororokni kaham khlai-o, phiya swngchar gwnangwi pírjak rwrwgo.

⁷Chwng bai baksa seleng khatinai chini khájani Epaphrani thani norok omono saui man kha, chini wngwi bo kaham khe Khristoni samung khlainai borok.

⁸Phola norokno hamjak rwmani a kókno bo chwngno khna rw kha.

⁹Aboni bagwino norokni kók khna phuruni simi chwng sal brúm brúm norokni bagwi suri san máng phai kha. Kaitorni Phola norokno kaham khe si rwma bai, saui man rwma bai Kaitor tamo muchung abo norok saui man súk thung hwnwi chwng Kaitorni thani sano.

¹⁰Hakhe Subrai naima hai norok tongwi mannai, tamo khlai khe bo hamjak abo máng khlaiwi tongwi mannai, bebak kisimni samung kahamni bising tẃi norok bwthái kwbáng tháinai, phiya Kaitorni kókno si rwrwknai.

¹¹Norok bebago’-no khá logwi soiwi manna tẃi khe bini phankrak phanrok bai norok rak rwjak thung.

¹²Pohorni ha-o Kaitor bini bororokni bagwi khatiui tonmano bui bai baksa man rwna bagwi norokno chúk rwnai a Aphano khá tongthogwi hambai rw di.

¹³Bo chwngno mwnakmani yakni phiyók kha, hakhe bini khájani Sajlani ha-o kaham kwrwng khe tubu kha,

¹⁴bini thẃini jarwi se chwng phiyókjago, abo tamo hwnma le chini sumsok nakarjago.

¹⁵Khristo wng kha nukjak ya Kaitorni mangtang. Bo se puila achai granai Sajla, aswk snamjaknairokni slái bo se kotor.

¹⁶Tamni hwn ba bo bai se Kaitor chuknoha bai o swngcharo joto manwino snamo, mwtairok, hodarok, bugrarok tei bokhorokrok bai nukjak ya phano wng thung nukjaknai phano wng thung bebak manwino snamo. Kaitor bini yak tẃi, bini bagwi bebak swngcharo snam kha.

¹⁷Bebak manwirok wng ya sini’-no bo tongo, bo bai thansa wngma bising tẃi se aswk manwirok janija khrapsa wngwi tongo.

¹⁸Bo wng kha bini bwsak mothani bokhorok; bo se bwsakno mwthangnai, bo simi se bebakni bokhorok wngwi manna tẃi khe bo se puila kwthwini mwthangwi tisajaknai.

¹⁹Tamni hwn khe Sajla katswi Kaitor hai’-no abo Kaitor khá chongma bai se wngo.

²⁰Hakhe Sajlani bising tẃi bebak swngcharno bo bai kwtha rwna hwnwi Kaitor khá chong kha. Bini Sajla kruso thẃi rwmani bising tẃi Kaitor kwtha rw kha, hakhe abo baino swngchar bai chuknohani bebak’-no bo bai kwtha rw kha.

²¹Norok hamya khlaima bai, hamya uansukma bai norok salsa Kaitor bai hakchal wngwi tongma se, bini kena ari wngwi tongma se.

²²Phiya ba Kaitor tabuk bini bwskango norokno kwthar khe, kuphur khe tei majra kwrwi khe tubuna bagwi bini Sajla thwimani bising tẃi norokno bo bai kwtha rw kha.

²³Hai phano norok poito khlaiwi kwrak khe khá songcha súgwi ma se ma tongthai klai-o, phiya Kothoma Kaham khna phuru norok khatung-khaja wngmani aroni norok bigrok thai klai ya. Ang Pol o Kothoma Kahamni seleng wng phai kha, swngcharni joto borokni thani pírjakmani omo’-no a Kothoma Kaham.

²⁴Hakhe norokni bagwi sátokjakmani bai ang tabuk khá tongthogwi tongo. Tamni hwn ba Khristo bini bwsak mothani bagwi tei kisa sátokjakna tongmani ang sátokjakma bising tẃi abono pai kha.

²⁵Ang Kaitor bai se mothani seleng snamjak kha, norokni kahamni bagwi bo ano o samungno rw kha. O samung wng kha Kaitorni rwmani kók pír sukna se.

²⁶Agirogo mol brúm brúm bo swngcharni bebak bororokno bisingni a kók khogwi tono, tamo khe tabuk bini bororokni thani tikhlaiwi phunuk kha.

²⁷Kaitorni chapma hwn khe hai: o uanamasingcha kók kotor bini bororokno si rwnani, omo bebak bororokni bagwi se. Bisingni a kók khe hai: Khristo norokni bisingo tongo, omo Kaitorni chẃngsacha-o norokbo khopjaknai hwnma se.

²⁸Abo baino Khristono chwng joto borokni thani píro. Khristo Jisu bai thansa wngma tẃi khoroksa khoroksano poito rak rwui khoroksa khoroksa khe Kaitorni bwskango tubu-ui manna tẃi khe sima jora tẃi chwng jotono’-no ragdama khe phrwngo.

²⁹Aboni bagwi’-no ani bisingo tongnai Khristo rwmani phankrak phan bai ang kolomtwi khiklaiwi panjalwi nangwi ma tongo.