Read Kok Borok KOLOSAI 2 Bible Online

KOLOSAI 2 - Kok Borok bible

KOLOSAI 2

¹Ang norokni bagwi, Laodikiarokni bagwi, phiya ano sini yarokni jotoni bagwi bwswk belai khe samung khlai kha abo ang norokno sana nai-o.

²Bórok khá tor súgwi manna tẃi khe, bórok hamjak laiwi thansa wngwi manna tẃi khe, phiya bórok kaham khe saui manma bai si súgwi manna tẃi khe ang omo hai samungno khlai-o. Hakhe bórok Kaitorni bisingni a kók saui man anw, abo’-no Khristo.

³Bo’-no Kaitorno huiwi tonjak kwbángma sima nukmano saui mannani lama.

⁴Hakhe ang norokno o kók sa-o, buini kók tatal bai lama ta koró di, a kók katswi khna thotok phano wng thung.

⁵Tamni hwn ba ang sak baithang kwrwi phano pholani bising tẃi ang norok bai tongo, hakhe norok thansa khe khá kwrak wngwi Khristono poito khlaiwi tongma saui manẃi ang khá tongthok kha.

⁶Khristo Jisuno Subrai songwi phai kha ba bo bai thansa khe tongna khlai di.

⁷Bini bisingo yarwng súrna khlai di, bini saka tẃi sakno songchana khlai di, norokno phrwngma haino poito rak rwrwk di. Hambai máng rwui tong di.

⁸Borokni samung nang ya kókrok bai phemlokjagwi kebo bai phano romjak ya tẃi khe hus khe tong di, abo tẃi kókrok bororok manẃi phaima se, mwtai hamyarokni aroni phaima se, Khristoni aroni phaima ya.

⁹Tamni hwn ba katswi Kaitorni bebak kupulung khe se Khristoni aro mang wngwi tong kha,

¹⁰hakhe Khristo bai thansa wngma bising tẃi norok mwthangjak súk kha. Bo wng kha bebak bugrarok bai bebak bokhorokrokni bokhorok.

¹¹Khristo Jisu bai thansa wngma tẃi norok sakur rajak kha, borok khlaimani a sakur rama ya, tamo khe Khristo sak baithang sakur rajakma bising tẃi se norok sakur rajago, abo wng kha o sumsok gwnang bwsakni yakni phiyókjak se.

¹²Tamni hwn ba norok baptisma wng phuru Khristo bai baksa norok phobjak kha, phiya a baptisma wng thani Khristono kwthwini mwthangwi tisanai Kaitor samung khlaima bai norokbo Khristo bai baksa tisajak kha.

¹³Salsa norok sumsok gwnang wngma bai, phiya Kerong man ya buini borok wngwi tongma bai norok Kaitorni mokolo kwthwi wngwi tongma se. Tamo khe tabuk Kaitor norokno Khristo bai baksa mwthang kha. Kaitor chini bebak sumsokno nakar kha.

¹⁴Chini mungwi swiwi narwkmani lakaino bo tanwi rw kha, khlaithai hwnwi kerong tongmani abonobo tanwi rw kha; bo abono kruso kanta bu-ui khibiui rw súk kha.

¹⁵A kruso’-no Khristo sakno mwtai hamyarokni bugrarok bai bokhorokrokni yakni phiyók kha; bo kwplai wngwi bórokno khaui misil khe tlangwi lukurokno pháng pháng khe phunuk kha.

¹⁶Abo baino norokni chámung nungmungno tẃiwi, eba terno tẃiwi, eba tal kwtalni terno tẃiwi, eba Sabat salno tẃiwi tamo khlainai khlai ya kebono kók ta sa rw di.

¹⁷Omo tẃirok bwskango tamo wngno wng ya aboni sampili simi se; yaphang hwn khe Khristo se.

¹⁸Kaitor bai imang phunukjak kha hwnwi sakno kotor khlaiwi tongnai abo tẃi borok bai majra ta berjak di. Abo tẃi borok saka saka kaham khe tong di hwno, suarirokno suri di hwnwibo hwno. Bo saichung sak kaisa uansukma bai kwrwi kwrwi’-no torsajak wngwi tongo.

¹⁹Bo Khristo bokhorokno khe rom li ya. Khristo bai se bwsak klang-kling ragwi jora bai jora khrapsa khe nang laiwi Kaitor naima haino tor rwrwgo.

²⁰Norok Khristo bai baksa thwi kha, hakhe o swngcharni mwtai hamyarokni yakni phiyókjak kha. Hakhe tamo wngwi o swngcharni borok hai khe norok tong ba? Norok tamo wngwi “Yak ta rw di,” “Ta chá di,” “Ta tang di,” hwnmarokno rákhogwi tong ba?

²²Samungno phnangjak khe’-no omo tẃi manwirok samung nang ya wngwi phai bai-o. Omorok wng kha borok banokmani kerong se, borok phrwngmani kók se.

²³Abo hai phano suarirokno ma surinai, saka saka kaham ma phunuknai, bwsakno panjalwi’-no ma sátoknai hwnwi hwnmani o kókrok kók elemi hai nugo; phiya ba sak muchungmarokno kisa phano khalwi narwgwi man ya.