Read Kok Borok KOLOSAI 3 Bible Online

KOLOSAI 3 - Kok Borok bible

KOLOSAI 3

¹Khristo bai baksa norok mwthangwi tisajak kha. Hakhe Kaitorni aroni kók uansugui tong di, aro Kaitorni yagra bwkhak Khristo achukjak.

²Aroni kók se uansugui tong di, o swngcharni kók ya.

³Tamni hwn ba norok thwiwi thang kha, hakhe norokni langma Khristo bai baksa Kaitorni thani tonjak kha.

⁴Khristo se norokno saiwi mwthangnai, hakhe bo nukjak phai phuru norokbo bo bai baksa nukjak phaiwi bini chẃngsacha-o khopjaknai.

⁵Norokni bisingni o swngcharni tongmungno ma se ma khibinai buitali-buitala wngmani, tongmung sitra tongmani, sak motók tongmani, hamya muchungmani tei khámaimarokno khibi di (khámaima le takjak mwtaino surima hai se.)

⁶Omo tẃi tongmung tongma bagwi Kaitorni kók khna yarok Kaitor bai jolijagwi yagul sujaknai.[1]

⁷Omo hai muchungma tẃi’-no norokbo agi tongwi phai kha.

⁸Tabuk norok abo tẃirokno khibi si, di ta joli si di, khá ta tẃi si di, ta naisler si di, kók hamya ta sa si di, búkhúk hamya ta tikhlai si di.

⁹Tatal ta sa lai si di, tamni hwn ba norok agini tongmung tongmano khibi kha,

¹⁰hakhe tongmung kwtal tong kha. Omo’-no a borok kwtal, norokno Kaitorno si rw sukna bagwi a borokno snamnaisa Kaitor bono bo hai khlai rwrwgo.

¹¹Hakhe aboni bai nukjak kha oro buini borok hwnwibo kwrwi, Judai hwnwibo kwrwi; sakur rajak hwnwibo kwrwi, rajak ya hwnwibo kwrwi; borbor, bolongni borok, seleng eba seleng ya hwnwibo kwrwi; tamo khe Khristo se bebak, Khristo se bebago’-no.

¹²Norok wng kha Kaitorni borok; bo norokno hamjago, hakhe bini borok wngna bagwi noroknobo chong kha. Hakhe tabuk, norok maya chána nangnai, khairokna nangnai; norok borok koinene, borok kwchang tei khá kolok w se wngna nangnai.

¹³Norok kiching norok hama lok lai di, khoroksa swk tei khoroksani bagwi hwnna tong khe nakar lai di. Subrai norokno nakarma haino norokbo abo hai kheno norok kiching norok nakar lai thai.

¹⁴Omo hai khe tongwi norok kiching norok hamjak lai di, omo se bebakno’-no kaham khe thansa khe khaui tono.

¹⁵Khristo khá kwchang rwmani abo norokni bwkha bisingo kotor wngwi tong thung; tamni hwn ba omo hai kwchangwi tongna bagwi’-no norokno bwsak kaisa wngna hwnwi Kaitor norokno ringo. Hakhe hambai rw di.

¹⁶Norokni khá-o Khristoni kók máng kwbángma khe ton di. Norok kiching norok elem kwrwng wngwi phwbo phrwng lai di, hwbo hwn lai di. Lobmung tei rwchapmung kwtharno rwchap lai di; khá bising bising hambai rwui Kaitorni mungwi rwchap lai di.

¹⁷Norok Khristoni bising tẃi Apha Kaitorno hambai rw twtwi norok joto khlaimani abo Khristoni mungwi khlai di, joto samani abo Khristoni mungwi sa di.

¹⁸O hik hwnjaknairok, norok bwsaini kók khna di, tamni hwn ba Khristan bwrwirok omo hai’-no ma khnathai klai-o.

¹⁹O bwsai hwnjaknairok, norok nihiksongno hamjak di, bórok bai búkhúk kwprap ta wng di.

²⁰O chwrairok, norok bebago’-no ma-phani kók khna di; abo Subrai nai-o, abo’-no Kaitor hamjago.

²¹O bupha hwnjaknairok, norok bwsa-bẃtẃirokno ta joli rw di, joli rw khe bórok khá báijaknai se.

²²O selengrok, norok o swngcharni nokphangrokni bebak kókno khna di; kaham hwnjakna bagwi bórok naiwi tong phuru simi omo hai ta wng di, tamo khe Subraino suriui tongma bai khá sutrang khe kók khna di.

²³Norok mungsa swk phano samung tang khe abo borokni samung hwn yaui Subraini samung hwnwi khá rwui tang di.

²⁴Muitu narwk di, Subrai norokno sokat rwnai; bo bini bororokni bagwi khatiui tonmano norok mannai. Tamni hwn ba norok seleng khatimani a nokphang wng kha Khristo se.

²⁵Hakhe samung hamya khlainai borok, bo jesa phano wng thung, bo bini samung hamyani yagul sujaknai, tamni hwn ba Kaitor jotono’-no baksa khe nugo.