Read Kok Borok KOLOSAI 4 Bible Online

KOLOSAI 4 - Kok Borok bible

KOLOSAI 4

¹O nokphangrok, norok sak sakni selengrokno kaham khe sói khe nai di. Muitu narwk di, noroknibo chuknoha-o nokphang tongo.

²Suri san máng tong di, hakhe suri san phuru hambai rw twtwi sichaui tong di.

³Kaitorni aroni kók pírnani, Khristoni bisingni kókno sanani lama Kaitor chwngno rw thung hwnwi chini bagwibo suri san di; tamni hwn ba aboni bagwi’-no ang tabuk alongo klaijak.

⁴Hakhe ang sana nangmano abo hai khe’-no srai-srai khe saui manna tẃi khe ani bagwi suri san di.

⁵Poito kwrwirok bai siyan kwrwng khe tong di; lama man kha hwn khe ta yakar di.

⁶Khá kwchang rwnai khna thotok wngnai abo tẃi kók sal brúm brúm sana nang anw, phiya joto borokno bahai khe sanai abo norok saui manna nang anw.

⁷Subraini samungo chwng bai baksa kaham khe samung khlainai seleng chini khájani takhuk Tukhik ani bebak kókno norokno sanai.

⁸Aboni bagwi’-no oro chwng bebak bahai khe tong bai kha abono norokno saui khá rak rwna hwnwi ang bono norokni thani rohoro.

⁹Khájani poito kwrak takhuk Onisimbo bo bai baksa thángnai, bo norokni borok. Bórok oro wngmarokno tháisa koró ya tẃi norokno saui khna rwnai.

¹⁰Ang bai baksa alongo tongnai Aristark norokno khápang rohoro, Barnabani sandai Markbo haino norokno khápang rohoro. (Bo tumungno norokni aro tháng khe bono yachak sókna bagwi sahormani abono norok khna khna.)

¹¹Justo hwnjaknai Jisubo khápang rohoro. Judaini Khristano hap phainairokni bere o khoroktham susukno ang bai baksa samung khlai-o, bórok ano kwbángma’-no chuba kha.

¹²Norokni borok Khristoni seleng Epaphrabo norokno khápang rohoro. Norok bebago’-no Kaitor naima haino tongwi manna tẃi khe Kaitor norokno kwrak khe bacha rw thung, poito rak rw thung, khá hap rw thung hwnwi bo Kaitorno sa saui sal brúm brúm suri sanwi tongo.

¹³Bo norokni bagwi phiya Laodikiarok bai Hierapolirokni bagwi jai kheno samung khlaimano ang sak baithang’-no saui mano.

¹⁴Chini khájani daktor Luk bai Dimabo norokno khápang rohoro.

¹⁵Laodikiani takhukrokno, Nimphano tei bini nogo achuk achukmani a mothano ham di hwnwi sahoro.

¹⁶Norok o kóktunno pori baiwi Laodikia mothani thanibo porijakna bagwi rohor di. Laodikiasong norokno rohormani a kóktunnobo norok porina khlai di.

¹⁷Arkhipno hai hwnwi sa di, “Subrai nono samung bermano khlaiwi pái di!”

¹⁸Ang yak baithang omono swi-o: Ang Pol khápang rohoro. Ani sorni dwkhwino ta pok di. Kaitor norokno khairok thung.