Read Kok Borok 1 THESALONIKI 1 Bible Online

1 THESALONIKI 1 - Kok Borok bible

1 THESALONIKI 1

¹Pol, Sila tei Timothi omono swihoro. Thesaloniki motha-o tongnai Apha Kaitorni tei Subrai Jisu Khristoni bororokno omono swihoro. Chini Apha Kaitor tei Subrai Jisu Khristoni hamari, khakchangma norok bai tong thung.

²Norokni bagwi chwng sal brúm brúm Kaitorno hambai rw-o, chwng suri san brúm brúm’-no norokni kókbo sa-o.

³Tamni hwn ba norokni poito norokno bahai khe samungo phnang kha, norok hamjakna bai bahai khe samung kwrak khlai kha, phiya norok bahai khe chini Subrai Jisu Khristono kwrak khe poito khlai kha, abono chwng chini Apha Kaitorni thani muitu khlai-o.

⁴Takhukrok, chwng saui mano Kaitor norokno hamjago, hakhe bini borok wngna bagwi norokno chong kha.

⁵Tamni hwn ba chwng kók bai simi Kothoma Kahamno norokni thani tubu ya, tamo khe phan bai, Phola Kwthar bai tei abono kubui hwnwi si sukma bai se tubu-o. Norok bai tong phuru chwng bahai khe tongbu kha abo norok saui mano; abo norokni kahamni bagwi se.

⁶Norok chini thani tei Subraini thani srwng kha; phiya norok belai khe sátokjak phano Phola Kwthar khá tongthok rwma bai norok a kók kahamno yachak kha.

⁷Abo bai’-no Makidonia bai Grisni bebak poito khlainairokni thani norok phunukna klai kha.

⁸Tamni hwn ba norokni aroni Subraini kók Makidonia bai Griso khna bai kha, abo simi ya, Kaitorno norok poito khlaima kók ha gwnangwi thang kha. Hakhe oro chini tei tháisa phano sana kwrwi kha.

⁹Chwng norokni aro tháng phuru norok chwngno bahai khe yachak sók kha, phiya kubo kubui kwbo kwthang Kaitorni seleng khati twtwi chuknohani phainai hwnmani bini Sajlano naisingwi tongna bagwi norok bahai khe takjak mwtairokno yakarwi Kaitorni thani phai kha o kókno a bororok saui ma tongo. Bini a Sajla wng kha Jisu, bo Kaitor bai kwthwini mwthangwi tisajak kha, Kaitor jolijagwi yagul suna hwnmani yakni bo chwngno phiyók kha.