Read Kok Borok 1 THESALONIKI 2 Bible Online

1 THESALONIKI 2 - Kok Borok bible

1 THESALONIKI 2

¹Takhukrok, chwng norokni aro thángmani abo haino tháng li ya, abo norok’-no saui mano.

²Thesaloniki-o norokni thani thángna swkang chwng Philipi-o bahai khe sátokjak kha, bahai khe lachi rwjak kha, abo norok saui mano. Teibo se, kena ari kwbángma tong phano Kaitor chwngno bini aroni Kothoma Kaham norokno sana bagwi khá rak rwui tono.

³Chwng norokno koiwi kók samani omo cha yani bagwi sama buya, bwkha sitrani bagwi sama buya, chwng khoroksano phano phemlokna naima buya.

⁴Abo wng yaui Kaitor chwngno saui di hwnma hai’-no chwng sa máng tongo, tamni hwn khe bo chwngno samung chúknai hwnwi khá kaui Kothoma Kahamno chini yago yaphar kha. Chwng bororok bai hamjakna nai ya, chini bwkhano potalinai Kaitor bai se hamjakna nai-o.

⁵Chwng norokno kók kwtẃi sa ya, phobwi tonjaknai kókbo sa ya, abo norok kaham khe saui mano Kaitor chini bagwi sakki tongo.

⁶Chwng kebo bai kaham hwnjakna nai ya, norok bai buya, bui bai buya.

⁷Khristoni chonghor wngma bai chwng naiwi man phano nai ya. Bwsa-bẃtẃirokno nai phuru buma kwchang kwchang wngma hai norok bai tong phuru chwngbo abo haino kwchang kwchang.

⁸Chwng norokno hamjakma bai Kaitorni aroni Kothoma Kahamno norokno rwna tiyar tongo, abo simi ya, chini sakno suda norokno rwna tiyar tongo. Norok aswk khe chini khájani borok!

⁹Takhukrok, chwng bwswk khe kolomtwi khiklaiwi samung tang kha norok sói’-no muitu tongo. Kaitorni aroni Kothoma Kahamno norokno pír thani norok mungsabo tekto nangjak ya tẃi khe chwng hor sal samung tango.

¹⁰Norok poito khlainairok bai chwng kaham khe sói khe tei majra kwrwi khe tongo norok aboni sakki, Kaitorbo haino aboni sakki.

¹¹Bupha bwsa-bẃtẃino khlaima hai’-no chwngbo norokno khlai-o, abo norok saui mano.

¹²Chwng norokno khá rak rw-o, khá kwchang rw-o, phiya bini ha bai chẃngsacha-o tongna bagwi norokno ringnai Kaitor bai hamjakna tẃi khe tong di hwnwi chwng norokno hwno.

¹³Hakhe omo tẃini bagwibo chwng Kaitorno sal brúm brúm hambai rw-o, Kaitorni aroni kókno chwng norokni thani tubu phuru norok abono borokni aroni hwn yaui Kaitorni aroni kók hwnwi khna kha, hakhe khá’-obo chop kha, abo Kaitorni aroni kók’-no ba. Tamni hwn ba norok poito khlainairokni bisingo Kaitor samung khlaiwi tongo.

¹⁴Takhukrok, Judiani Kaitorni motharogo wngma hai, a motharogo tongnai Khristo Jisuni bororokni thani wngma hai, noroknibo ahai’-no wng kha. Bórok Judairok bai sátokjakma hai norokbo ahai’-no norokni bororok bai sátokjak kha.

¹⁵A Judai rok’-no Subrai Jisuno tei diyarirokno butharo, chwngno sátoknaibo bórok’-no. Kaitorni thani bórok bwswk se borok bejua gwja! Bórok bwswk se bebak bororokni kena ari gwja!

¹⁶Chwng Judai yarokni thani mwthangjaknani kók pírma suda bórok kasuna nai-o. Bórok sumsok khlai phaimani bere omoni bára tei sumsok kwrwi kha. Hakhe tabuk ulo hwn khe Kaitor bórokno jolijagwi yagul su kha.

¹⁷Takhukrok, norok bai kisa kak laiwi tongma bai se chwng norokno bwswk se khátang kha, hakhe norokno tei uáisa naina hwnwi chwng bwswk se káphra kha! (Aile abo ahaino se kak lai phano bwkha bai kak laima ya.)

¹⁸Chwng norokni thani tei uáisa phaina nai-o. Ang Pol uáinwi uáithamno phaina nai kha, tamo khe Soitan chwngno phai rw li ya.

¹⁹Hai phano chini Subrai Jisu Khristo phai phuru bini bwskango chwng tamni bagwi khatungnai, tamni bagwi tongthoknai, tamni bagwi kwplai khe kung chuknai? Norokni bagwi ya diba?

²⁰Sói’-no, norokni bagwi se chwng kung chuknai, norokni bagwi se chwng tongthoknai.