Read Kok Borok 1 THESALONIKI 3 Bible Online

1 THESALONIKI 3 - Kok Borok bible

1 THESALONIKI 3

¹Ulo chwng tei kisa phano tongwi man súk li ya. Hakhe chwng simi Athenso tong laina hwnwi khá chong kha,

²Aphuru’-no Khristoni Kothoma kahamno pír thani chwng bai baksa Kaitorni samung khlainai chini takhuk Timothino chwng rohoro. Norok omo tẃi sátokjak phano uslu ya tẃi khe norokno khá rak rwna bagwi se, phiya norokno poito rak rwna bagwi se chwng bono rohoro. Omo tẃi sátokjakmarok wng kha chini bagwi Kaitor khá tholma se abo norok saui mano.

⁴Tamni hwn ba chwng sátokjaknai hwnwi o kókno norok bai tong phuru’-no norokno swkang baira sa kha; hakhe katswi abo hai’-no wng kha abo norok kaham khe saui mano.

⁵Aboni bagwi’-no ang Timothino ma rohor kha. Ang tei kisa phano tongwi man súk li ya, Soitan norokno belokma bai chini bebak samung cha ya da wng langno hwnwi norokni poitono saui manna bagwi ang bono rohoro.

⁶Tabuk Timothi norokni aroni chini thani kiphilwi phai kha, hakhe bo norokni poito bai hamjakmani kók kahamno tubu kha. Norok chwngno kaham hwnwi uansuk máng tongo, phiya katswi norokno chwng naina muchungma hai’-no norokbo chwngno naina muchungjagwi tong kha hwnwi bo chwngno sa phai kha.

⁷Takhukrok, abo baino chwng tekto rwjagwi sátokjak phano norokno tẃiwi chwng khá twtwng ma tongo. Norokni poitoni kók se chwngno khá twtwng khe tono,

⁸tamni hwn khe tumungno norok Subrai bai tongwi kwrak khe bachaui tong khe chwng thang súk kha.

⁹Tabuk norokni bagwi chwng Kaitorno hambai rwui mano. Norokni bagwi chwng tongthokma bai bono chwng hambai rw-o.

¹⁰Chwng norokno poito rak rwui manna tẃi khe Kaitor norok bai chwngno malai rw thung hwnwi chwng khá rw súgwi hor bai sal bai bini thani sano.

¹¹Chwng norokni thani phaina bagwi chini Apha Kaitor sakphang’-no tei chini Subrai Jisu chini bagwi lama snam ja thung.

¹²Subrai norok kiching norokno teibo hamjak rw thung, phiya bebak bororoknobo teibo hamjak rw thung; chwng norokno hamjakma hai’-no noroknobo hamjak rw thung.

¹³Omo hai khe’-no bo norokni bwkhano rak rwnai, hakhe chini Subrai Jisu bini bebak bororok bai phai phuru norok chini Kaitorni bwskango majra kwrwi tei kwthar wngnai.