Read Kok Borok 1 THESALONIKI 4 Bible Online

1 THESALONIKI 4 - Kok Borok bible

1 THESALONIKI 4

¹Takhukrok, páinanogo Kaitor bai hamjakna bagwi bahai khe tongna nang abo norok chini thani srwng kha. Hai phano norok omo hai khe’-no tongwi phai-o. Hakhe omo hai khe teibo tong ja di hwnwi chwng Subrai Jisuni mungwi norokno koiwi sa-o.

²Tamni hwn ba Subrai Jisuni wngwi chwng norokno khlai di hwnmarokno norok saui mano.

³Kaitor norokno omo tẃi khe tonna hwnwi muchungjago: Norok kwthar wng thung, buitali-buitala ta wng thung hwnwi bo muchungjago.

⁴Norok chwlarok kwthar khe kaham khe káijaknano saui manna nangnai,

⁵Kaitorno sini ya poito kwrwirok sak motókma bai káijakma hai ya.

⁶Hakhe omono tẃiwi khoroksa phano bini takhukno cha ya khlaina kók kwrwi, kebengnabo kók kwrwi. Chwng o kókno norokno swkang’-no sa kha, omo tẃi samung cha ya khlainairokno Subrai yagul sunai hwnwi chwng norokno ragdama khlai kha.

⁷Tongmung sitra tongna bagwi Kaitor chwngno ring ya, kwthar khe tongna bagwi se ringo.

⁸Abo bai’-no o kókno khna ya borok bo borokni kók khna ya wngma klai ya, Phola Kwthar rwnai a Kaitorni kók se khna ya wngma klai-o.

⁹Norok bai baksa poito khlainairokno bahai khe hamjakna nang a kókno norokni thani swina nang glak. Norok kiching norok bahai khe hamjakna nangnai abo norok sak’-no Kaitor bai phrwngjagwi phai kha.

¹⁰Makidonia gwnangwi bebak takhukrokno norok omo hai kheno hamjagwi phai kha. Takhukrok, abo baino teibo omo hai khe hamjak laiwi tong di hwnwi chwng norokno koi ja-o.

¹¹Chwng norokno swkango sama hai kwchang kwchang khe tongnano se nai di, sakni samungo khá achuk rwnano se nai di, samung tangwi chánano se nai di.

¹²Omo tẃi khe norok poito kwrwirok bai kaham hwnjaknai, phiya khoroksani thani phano yapha phehelna nang glak.

¹³Takhukrok, khatung yarok hai norok khá thwijak ya tẃi khe chwng norokno thwinairokni kókno saui man rwna nai-o.

¹⁴Jisu thwi kha, hakhe thangwi bacha kha abo chwng poito khlai-o; abo baino Jisuno poito khlaiwi thwinairokno Kaitor Jisu bai baksa tubunai, abono chwng poito khlai-o.

¹⁵Subrai chwngno phrwngmani omono’-no norokno sa-o: Subrai phai phuru chwng kwthang tong sóknairok chwng a thwinairokni slái swkang thang glak.

¹⁶Aphuru chirikhógwi dagimani kók khna anw, suari okra samani kók khna anw, Kaitorni totro khorang khna anw, hakhe Subrai bo sak’-no chuknohani ongkhorwi phai anw. Khristono poito khlaiwi thwinairok bórok puila thangwi bacha granai;

¹⁷ulo Subrai bai nokha-o malaina bagwi chwng kwthang tongnairok bórok bai baksa chumui-o tisaui tlangjaknai. Hakhe abo baino chwng Subrai bai máng ma tongnai.

¹⁸Aboni bagwi o kókrok bai norok kiching norok khápang srang rw di.