Read Kok Borok 1 THESALONIKI 5 Bible Online

1 THESALONIKI 5 - Kok Borok bible

1 THESALONIKI 5

¹Takhukrok, omorok buphuru bahai khe wngnai aboni kókno norokno swina nang ya.

²Subrai phainani a sal wng kha horo sikhok phai tẃi se wngnai, abo norokno kaham khe saui mano.

³Bororok, “Bebakno kwchang kwchangno bla, kahamno bla,” hwnwi tong phuruno bórok achomsa sokomorjaknai. Bórok yók bai glak, omo sak kengna phuru bwrwirok ok sajakma hai se wngnai.

⁴Tamo khe takhukrok, norok mwnakma-o tong ya bla, hakhe a sal sikhok hai khe norokni thani achomsa phai glak.

⁵Norok wng kha bebak’-no pohorni borok, norok wng kha salni borok, chwng horni borok ya, mwnakni borok ya.

⁶Abo bai’-no chwng bui hai thu-ui tongna kók kwrwi, chwng sichaui tongthai, yak lái thai kwrwi.

⁷Hor hwn khe se bororok thu-o, hor hwn khe se bororok chuak nung lai-o.

⁸Chwng wng kha salni borok ba yak lái thai kwrwi. Chwng poito bai hamjakmano khaklap katijaknai hai khe se káthai, mwthangjaknai hwnwi khatungmano khorok katijaknai hai thupthai.

⁹Kaitor jolijagwi yagul suna bagwi chwngno chong ya, chini Subrai Jisu Khristoni bising tẃi mwthangna bagwi se bo chwngno chongo.

¹⁰Jisu Khristo phai phuru chwng kwthang phano wng thung kwthwi phano wng thung, aphuru bo bai baksa chwng thansa khe tongwi manna tẃi khe bo chini bagwi thwi kha.

¹¹Omoni bagwi’-no norok tabuk khlaiwi tongma hai’-no norok kiching norok khápang srang rw lai di, norok kiching norok khá rak rw lai di.

¹²Takhukrok, norokni bisingo samung khlainairokno, norokno chabwi tẃina bagwi tei phrwngna bagwi Kaitor chongma bororokno kaham khe bórom khlai di hwnwi chwng norokno koi ja-o.

¹³Bórok khlaimani a samungni bagwi bórokno hamjagwi kaham khe bórom khlai di. Norok kwchang kwchang khe tong lai di.

¹⁴Takhukrok, chwng norokno hai hwnwi hwno, selerrokno hwn di, khitoprokno khá tor rw di, yak chúk yarokno chuba di, joto bai’-no khá kolok wng di.

¹⁵Nai di, khoroksa swk phano hamya khlaijak khe bo samung hamya bai yagul ta su di, tamo khe norok kiching norok kaham máng se khlaina nai di, bebak bororoknibo kaham khlaina nai di.

¹⁶Norok tongthok máng tong di.

¹⁷Suri san máng tong di.

¹⁸Bebago’-no hambai rw di. Khristo Jisu bai tongwi norok omo hai kheno wng thung hwnwi Kaitor muchungjago.

¹⁹Phola Kwtharno ta kebeng di.

²⁰Kók diyarino samung nang ya ta wng di.

²¹Bebakno’-no chánaiwi nai di; kahamno khe narwk di,

²²bebak hamyano khe khibi di.

²³Chwngno khá kwchang rwnai Kaitor norokno bebago’-no kwthar khlai thung, phiya bo norokno, norokni pholano, bwkhano tei bwsakno chini Subrai Jisu Khristo phai phuru majra kwrwi khe ton sók thung.

²⁴Norokno ringnai bo wng kha kók narwknai, hakhe bo omono khlainai.

²⁵Takhukrok, chini bagwibo suri san di.

²⁶Bebak takhukrokno takhuk hwnwi motom su laiwi khápang rw lai di.

²⁷O kóktunno bebak takhukrokno khna rw di hwnwi Subraini bising tẃi ang norokno dagi ja-o.

²⁸Chini Subrai Jisu Khristo norokno khairok thung.