Read Kok Borok JOSUA 1 Bible Online

JOSUA 1 - Kok Borok bible

JOSUA 1

¹Subraiyungni seleng Musi thwimani yagulo khe Subraiyung Musini yakchu Nunni bwsla Josuano hai hwnwi sa kha,

²“Ani seleng Musi thwi kha. Hakhe tabuk bachaui nwng tei o borokrok bai Jordan ayang naro Israilrokno rwnani hwnmani a ha-o tháng di.

³Ang Musino swmai rwma tẃi’-no nono bo rw-o: Nini bebak yapri kámani hano ang nono rwnai.”

⁴Hasing panthor tei Lebanonni simi twima kotor jora, Uphratis twima tei bebak Hitirokni hani khe salthángbai phaising twijlang jora nini ha wngnai.

⁵Nini langma tong sak khoroksa phano nono kebengwi bachaui man glak. Ang Musi bai tongma hai’-no, nini logibo tongnai, ang nono khibo khibi glak tei yabo yakar glak.

⁶Phan rak di tei kiri ya wng di, ang nini chuchusongni thani gosimani hai kheno nwng o bororokno a ha-o tlangwi man anw.

⁷Phan simi se ragwi kiri ya wng di, bebak nwng tháng thani ani seleng Musi dagimani kerongno simi se kaham khe tẃi di, samung chanani bagwi aboni yagra eba khe yaksi bwkhak kisa phano ta phér di.

⁸O kerong bijap nini búkhúkni kwmaui ta tháng thung, a bisingo swijak tongmarokno kaham khe samung khlai mannani bagwi hor-sal uansuk di, hai khe se nini samung chanai tei chasanai.

⁹“Ang nono dagi ya da? Phan rak di, kiri ya wng di, sikiri sokro ta khlaijak di, bwkhabo ta thwi di, tamni hwn ba Subraiyung nini Kaitor nwng tongma-o nwng bai baksa tongo.”

¹⁰Hakhe Josua bororokni tẃiphangrokno dagi kha,

¹¹batham bwkhak tẃi thángwi bororokno hai hwnwi saui di, “Norokni chámung tiyar khlai bai di, salthamo norok o Jordanno basu-ui Subraiyung norokni Kaitor norokno rwna hwnmani hano naui di.”

¹²Josua Rubenrokno, Gadrokno tei Manaseni khaksa bosongrokno hai hwnwi sa kha,

¹³“Subraiyungni seleng Musino samani, Subraiyung norokni Kaitor o hano norokni bagwi lenglajaknai rwnai,” hwnmani kókno muitu khlai di,

¹⁴“Norokni hikrok, norokni bwsa-bẃtẃirok, norokni mal-matarok, Musi rwmani Jordan ayang naro ma tong rwknai tei bebak sengkrakrok yago da-seng tẃiwi norokni takhukrokni bwskango ma thángnai tei bórokno ma chubanai.

¹⁵Subraiyung norokni takhuksongno tei nono lengla rw ya sak tei Subraiyung norokni Kaitor rwnani hwnmani ha-o bórok kaham khe achuk ya sak, hakhe norok sakni ha-o phaiwi Subraiyungni seleng Musi Jordan twima ayang naro salka phaising rwma-o achuk phai di.”

¹⁶Hakhe bórok Josuano hai hwnwi sa kha, “Nwng chwngno bebak dagima tẃi’-no chwng abo khlainai; tei nwng chwngno rohor thanio’-no chwng thángnai.

¹⁷Chwng bebak Musini kókrokno khnamani haino nini kókbo chwng khnanai tei Musi bai tongma hai kheno Subraiyung Kaitor nwng bai baksa tongnai.

¹⁸Khoroksa swk nwng dagimarokno kebengnai tei kók khna ya wngnai, bo ma thwinai, nwng rá simi se rak di tei bwkha kwrak wng di.”