Read Kok Borok JOSUA 11 Bible Online

JOSUA 11 - Kok Borok bible

JOSUA 11

¹Hajorni habugra Jabin abórokno khna khe, bo Madonni habugra Jobabno tei Simron bai Aksapni habugrarokno

²salsibai-o tongnai hathái kamirokni habugrarokno, Jordan harungni salsibai phaisingo tongnai Galili, hathái yaphango tongnai, salthángni habugra Dor gana-o tongnai bebak habugrarokno sa hor kha.

³Bo teibo Jordanni salka tei saltháng bwkhak tongnai Kananrok, Amorrok, Hitisarok, Peressarok tei Mijpa hani Harmon hachuk yaphango tong bainai Hibisarokno sa hór kha.

⁴Bebak bórokni sengkrakrok bai twijlang rukungni hasingsa hai khe kwbángma korairok tei korai malkhungrok bai khe phai lai kha.

⁵A habugrarok bebak thansa khe phai laiwi Israilrok bai choba nang lainani Merom twi rukungo batham khlai phai kha.

⁶Subraiyung Josuano hai hwnwi sa kha, “Bórokno ta kiri di, khwna omo hai jora-o Israilni bagwi bórokno bebakno butharnai, nwng bórokni korairokno khora khlaiwi tei korai malkhungrokno hór bai sógwi ma pái bainai.”

⁷Hakhe Josua bebak bini bororok bai achomsa khe bórokni saka-o Merom twi rukungo phai laiwi choprok kha.

⁸Subraiyung Israilrokni yago bórokno yaphar kha, bórokno swpragwi Misrephotmaim bai Sidon tei bo salka phaising Mijpa harung jora rohor lai kha, khoroksa bo kwthang tong rwk li ya kheno nang lai kha.

⁹Hakhe Subraiyung dagimani haino Josua khlai kha, korairokno khora khlaiwi, korai malkhungrokno hór bai sógwi pái bai kha.

¹⁰Josua uphilwi Hajorno nai phi kha, habugrano khe buthar kha. A jora-o Hajor’-no bebak habugrarokni slái kwplai kuk tongmani.

¹¹Bórok aro tongnai bebakno butharwi pái lai kha, khoroksa phano kwthang tong rwk li ya, kamiyungno khe hór bai sógwi pái lai kha.

¹²Bebak habugrarok bai kamiyungrokno Josua naui pái kha, Subraiyungni seleng Musi dagimani tẃi’-no bebakno buthar bai kha.

¹³Phiya ba Hajorno karwi Israilsong o hatháini kamiyungrokno sók lai li ya, abo Josuano sókcha-o.

¹⁴Israilrokni bororok o kamiyungni manwi kahamrok, yabrwirok, sak sakni bagwi na lai kha. Tei bororokno khe buthar baiwi, khoroksano bo kwthang narwk lai li ya,

¹⁵Subraiyung bini seleng Musino dagimani hai tei Josua abo haino khlai kha. Subraiyung Musino dagimani bebakno Josua khlai kha.

¹⁶Hakhe Josua bebak hano, hatháini kami tei salgrabaini hathái yaphang, bebak Gosenni harok ha panthorrok tei Jordan harungno tei Israilni hathái hapharrokno segwi na kha

¹⁷Halak hachukni simi salgrabai bwkhak Idom gandar jora tei hakchal Balgadni salsibai harung Lebanonni hacher hathái Harmon jora ha ari phuarjak kha. Bo bebak ha arini habugrarok bai choba sal kwdwkma romwi choba nang lai kha tei bórokno mechenwi buthar bai kha.

¹⁸Josua aroni habugrarok bai kwdwkma choba nang laiwi bórokno buthar baiwi segwi na bai kha.

¹⁹Aro Gibeono tongnai Hibisarokno karwi tei kebo Israilrok bai kwtha lainai kwrwi. Bórok bebakno choba nang laiwi na bai kha.

²⁰Omo Subraiyungno bórokni bwkhano kwrak khlaiwi Israilrok bai choba nang lai rw kha, hakhe Subraiyung Musino dagimani hai kubui’-no ma komor bai súk kha tei bebak khairokma kwrwi khe butharjak bai kha.

²¹A jora Josua hathái kami-o Hebron, Debir, Anab tei Juda bai Israilni hathái kamirogo tong bainai Anakimni bosongno sokomor kha, Josua bórokno tei bórokni kamiyungrokno sokomor súk kha,

²²Israilni ha-o Anakimrok khoroksa phano yógwi tong rwk li ya, Gaja, Gat, Asdodo le kisa karjagwi tong rwk kha.

²³Hakhe Subraiyung Musino dagimani haino Josua bebak hano yago na bai kha, Josua Israilrokni bisingo bosong thwgwino ha banta khe rw bai kha. Hakhe o ha chobani lenglama man kha.