Read Kok Borok JOSUA 14 Bible Online

JOSUA 14 - Kok Borok bible

JOSUA 14

¹Omorokno Israilrok Kanano ha-o ha banta manmani, abo ochai Eliasar, Nunni bwsla Josua tei Israil bosongni bokhorokrok bai bórok ha banta khlaiwi rwjagwi ha banta khe rwjagwi manmani.

²Tamni hwn khe dopha chuku tei khaksa dopharokno Musini yak tẃi khe Subraiyung dagima hai kheno bórokni manthaino pat karwi banta khe rwjak kha.

³Tamni hwn khe Musi Jordanni salka phaising kainwi tei khaksa dopharokno o ha banta rw kha, tamo khe bórokni bisingo Musi Lebirokno khe mungsa ha banta rw li ya.

⁴Tamni hwn khe Josepni bosongrok wng kha kainwi dopha, Manase bai Ephraim. Tei bórok ha-o Lebirokno kamiyungrogo tongnani nokthaino tei bórokni mal-matano mwrwknani sulano karwi tei mungsa banta man li ya.

⁵Subraiyung Musino dagimani hai kheno Israil bororok khlai lai kha; tei bórok hano banta khlai lai kha.

⁶Hakhe Judani bororok Gilgalo Josuani thani phai lai kha. Kenijisa Jephuneni bwsla Kaleb bono hai hwnwi sa kha, “Subraiyung Kaitorni borok Musino Kades Barnia-o nwng bai ano tẃiwi samani kókno nwng saui mano.

⁷Subraiyungni seleng Musi ano Kades Barniani hano naichomna rohor kha aphuru ani umor wng kha nokha bisi brwichi tei ani bwkha-o tongma hai kheno bini thani kók tubu-ui kiphilwi phai kha.

⁸Phiya ba ang bai baksa thángnairok kiphilwi phai bororokno sikiriui rw phai kha. Tamo khe ang le kaham kheno ani Subraiyung Kaitorni kók khna kha.”

⁹Abo bai’-no a salo Musi swmai tangwi hai hwnwi sa kha, “Kubui’-no nini yapri kámani hano nwng bai nini bwsarok kusung kusungni bagwi mannai, tamni hwn ba nwng Subraiyung ani Kaitorni kókno kaham khe khna kha.

¹⁰Tabuk nai di, abo Israilrok hasing panthor tẃi tháng lai tong phuru Subraiyung Musini thani kók samani ulo nokha bisi brwichiba wng phi kha, Subraiyung swmai tangmani haino ano kwthang narwgwi ton kha, tabuk ani umor nokha bisichar chiba wng kha.

¹¹Musi ano rohor phuruni haino ang tabukbo kwrak kahamno tong kho, aphuruni hai kheno tabukbo ang choba nang lainani tei bebago’-no tháng phai wngwi man kho. Samung tangnani phanbo tong kho.

¹²Hakhe tabuk Subraiyung a salo swmai tangmani hai o hatháino rw di; nwng khna kha aphuru-o Anakimrok aro bahai khe tong lai, bórokni kamiyungrok kotor tei hamchajak tongmani baksa tongwi ang da bórokno béng khlai rohornani wngno.”

¹³Hakhe Josua Jephuneni bwsla Kalebno hamari rw kha tei Kalebni yago Hebronno rw kha.

¹⁴Tini jora Hebron Kenijisa Jephuneni bwsla Kalebni yago’-no tong kho, tamni hwn khe bo, Israilni Subraiyung Kaitorni kókno kaham khe khna kha.

¹⁵Tei swkango Hebronni mung khe Kiriat-arba hwnjago. (Arba wng kha Anakim bisingo bebakni slái kotor kuk borok tongmani.) Hakhe ha choba wngmani bathak kha.