Read Kok Borok JOSUA 20 Bible Online

JOSUA 20 - Kok Borok bible

JOSUA 20

¹Subraiyung Josuano hai bo hwnwi sa kha,

²“Israilni bororokno hai hwnwi saui di, ‘Norokni tongthai kamiyungrok saiwi na di, ang abo nono Musini khúk tẃi sa kha,

³khoroksa swk borok sislap yaui’-no tei khoroksa swkno buthar khe, aro khárwi nono yagul sunairokni yakni yógwi tongwi man anw.

⁴Bo a kamiyungo khárwi sógwi khe, kamiyung duglamo buj thumnairokni thani tẃiphangrokno bini kókno saui khna rw khe, hakhe bórok bono bisingo tlangwi bono tongthai rwnai tei bórok bai tongwi mannai,

⁵hakhe yagul sunai borok aro bono riphrik khe kamiyungni bororok bono yaphar glak, tamni hwn ba swkango bo bai mungsa-o naisler laimani kwrwi, haino deraui se butharjago.

⁶Bujni bagwi bororokni bwskango ma bacha ya sak tei a jora-o kamiyungo ochai okra thwi ya sak bo kamiyungo ma tongnai hakhe bo bini nogo eba bini kami kotoro, bo khárwi phaima-o ma tháng phinai.’ ”

⁷Hakhe bórok Naptalini hathái kami amchoi Galilini Kades, hathái kami Ephraim amchoini Sekem, hathái kami Judani Kiriat-arba (abo khe Hebron.)

⁸Jordanni salka, Jerikoni salka bwkhak hasing panthor Bejer ha hasinglwng haphar, abo Ruben bosongni, Gad bosongni ha Giliadni Ramot tei Manase bosongni ha Basan Golanno saiwi na kha.

⁹Omorokno Israil bororok bai bórokni aro tongnai buini hani bororokni bagwi chongjak khárjaknai kamiyungrok, khoroksa swk deraui tei khoroksa swkno butharjak khe bujni bagwi luku bwskango ma bacha ya sak bo yagul sunai bai butharjak glak.