Read Kok Borok JOSUA 22 Bible Online

JOSUA 22 - Kok Borok bible

JOSUA 22

¹Hakhe Josua bosong Ruben, Gad tei khaksa Manaseni bororokno thansa khe ring kha,

²tei bórokno hai hwnwi sa kha, “Subraiyungni seleng Musi norokno dagimano khlai kha tei ang tholmani bebak kókrokno khna kha.

³Aswk sal kwbángmani simi tabuk jora norok norokni takhukrokno yakar li ya, phiya Subraiyung norokni Kaitor norokno samung barja bermano khir khir khe khlai lai kha.

⁴Tabuk Subraiyung norokni Kaitor swmai tangmani haino norokni tei takhuk Israilrokno lenglama rw kha, abo bai’-no Subraiyungni seleng Musi norokni banta rwma tẃi’-no Jordanni salka bwkhak ha rwmani sakni nogo kiphilwi tháng bai si di.

⁵Tamo khe Subraiyungni seleng Musi dagimarokno tei kerong rwmarokno kaham khe tẃi di, nini Subraiyung Kaitorno hamjak di, bini lama tẃi him di, bini dagimarokno khna di, bo bai tongnani tei bebak nini bwkha rw súgwi uansukma bai bono mon di.”

⁶Hakhe Josua bórokno hamari rwui rohor kha tei bórok sak sakni nogo kiphilwi tháng bai kha.

⁷Tabuk Musi ha Basano Manaseni bosong khaksarokno ha banta rwui rw kha, phiya tei khaksarokno khe Josua bórokni takhukrok bai baksa, Jordanni salthángbai-o ha banta rw kha. Tei Josua hamari rwui bórokno nogo kiphilwi rwui rohor bai kha.

⁸Bo bórokno hai hwnwi sa kha, “Kwbángma rang-rí, mal-matarok, rangchak-rukphai, pitol tei sorrok tei kwbángma manwirok tlangwi nogo tháng bai di: norokni arirokni aro manmani manwirokno norokni takhukrokno banta khe rw di.”

⁹Hakhe Ruben, Gad tei khaksa Manase bosongrokni bororok kiphilwi tháng bai kha tei Israilrok Kanan hani Siloni sakni ha Giliado kiphil kha, omo Musini tẃi Subraiyung dagimani hai bórokni banta manmani ha.

¹⁰Bórok ha Kananni Jordan gana-o sók phai khe Ruben, Gad tei khaksa Manaseni bosongrok aro Jordan gana-o kotorma háyá kaisa khlai lai kha.

¹¹Tei Israilni bororok hai hwnwi khna kha. “Nai di, Ruben, Gad tei khaksa Manaseni bosongrok Kanan hano naharwi Israilrokni ha Kananni Jordanni ari Geliloto háyá snam lai kha.”

¹²Tei Israilni bororok abono khna kheno, bebak lukurok bórok bai choba nang lainani bagwi Silo-o kuthum lai kha.

¹³Hakhe Israilni bororok ochai Eliasarni bwsla Phinehasno ha Giliado Ruben, Gad tei khaksa Manase bosongrokni thani rohor kha,

¹⁴bo bai baksa khe khorokchi okrarokno, Israilrokni bosong thwgwini núkhungni bokhorok khoroksa khe Phinehas bai baksa ma tháng kha.

¹⁵Bórok ha Giliado Ruben, Gad tei khaksa Manaseni bosongrokni thani-o tháng lai kha tei bórok bórokno hai hwnwi sa lai kha,

¹⁶“Subraiyungni bebak lukurok hai hwnwi sa-o: Norok bahai khe Israilni Kaitorni thani-o poito swbai lai man? Norok bahai khe Subraiyungno khibiui man tei bono kebengwi sak sakni bagwi háyá snam lai kha ba?

¹⁷Peoro sumsok khlaima abo chini bagwi kisa diba? Subraiyungni bodolo bok nang phano tabuk jora aboni súchajak ya kho,

¹⁸hakhe tamo nwng Subraiyungni kókno na yaui tongnai da? Tumungno nwng tini Subraiyungno kebengwi bacha khe, bo khwna bebak Israilrokno jolinai.

¹⁹Hakhe tabuk norokni ha kwthar ya hwn khe hakhe Kaitorni ha tei bini ríni nok tongma-o phai bai di, chini bisingo norokni bagwi kisa ha na phai bai di; tamo khe omo hai khe Subraiyung chini Kaitorni háyáno karwi kubunni háyá snamwi ta kebeng di.

²⁰Jerani bwsla Akan kók khna ya wngwi swraimung nangnai manwi-o yak rw kha tei bebak Israilni lukurokni saka-o jolima klai rw ya diba? bini a sumsokni bagwi bo saichung simi komor li ya.”

²¹Ruben, Gad tei khaksa Manase bosongni bororok Israilni núkhungni bokhorokrokno uphilwi sa kha tei Israil bosongni bokhorokrokno hai hwnwi sa kha:

²²“Phan gwnangsa, Kaitor, Subraiyung! Phan gwnang, Kaitor, Subraiyung! Bo saui mano! Israilrok saui man di! Omo bai chwng Subraiyungno kebeng khe tei kók khna ya wngma klai khe tini’-no chwngno ta narwk si di.

²³Chwng Subraiyungni kók khna ya wngwi chini bagwi sókmung yapharnani, bwthái bwchlwi yapharnani tei khakchang yapharnani bagwi a háyáno snam lai khe, Subraiyung baithang’-no yagul su thung.

²⁴I’nhi, Chwng kiriui se abo hai ma khlai si-o, tamni hwn khe ulorogo norokni bwsa-bẃtẃirok chini bwsarokno hai hwnwi sa anw, ‘Norok Israilni Kaitor, Subraiyung bai tamo khlainani tong?

²⁵Tamni hwn khe Subraiyung se bórok Ruben bai Gadrok tei chini kwcharo Jordano ha kebengmung snam kha. Subraiyung bai norok mungsa kwrwi.’ Hakhe norokni bwsarok chini bwsarokno Subraiyungno kirinano mwthak anw.

²⁶Hakhe chwng hai hwnwi sa lai kha, ‘Phai di chwng chini bagwi háyá snamna tiyar wng lai anw, abo sógwi yapharna tei ratharwi yapharna bagwi ya.

²⁷Tamo khe chwng kubui’-no chini sógwi yapharmung bai ratharwi yapharma tei khakchangma yapharmungrok yapharwi Subraiyungno khulumo hwnwi abo norok bai chini bagwi tei chini ulni bosongrokni bagwi kók sanani mari wngnai, wng ya khe ulo norokni bwsarok chini bwsarokno, “Subraiyungni thani norokni mungsa man banta kwrwi,” hwnwi sa anw.’

²⁸Chwng uansuk laimani, tumung jora sók phai khe omono chwngno eba chini bosongrokno o kók sa khe hakhe hai hwnwi sa anw, ‘Nai di! chini chuchusong Subraiyungni háyáno kosol khe háyá snam kha. Abo sógwi yapharna bagwi eba ratharwi yapharna bagwi chini chuchusong abono snammani ya tamo khe chini bai nini bisingo mari wng thung hwnwi se snamo.’

²⁹Chwng Subraiyungno kebengna kók belaino kwchal tei sógwi yapharmung, bai bwthái bwchlwi yapharmung tei ratharwi yapharmungni bagwi bini rínokni bwskango Subraiyung Kaitorni háyá snamnai; kak glak ríni nok bwskango tongnai Subraiyungni háyáno karwi chwng tei kubun háyá tang glak.”

³⁰Ochai Phinehas, borokrokni tẃiphangrok tei Israil núkhungni bokhorokrok, Ruben tei Gad, Manaserok samani kókno khna khe chajak kha.

³¹Phiya Eliasarni bwsla ochai Phinehas Ruben, Gad tei Manaseno hai hwnwi sa kha, “Tabuk Subraiyung chwng bai pal tongo hwnwi saui man kha, tamni hwn khe norok Subraiyungno kebengwi cha ya khlai li ya: hakhe nwng Israilrokno Subraiyungni yakni phiyók kha.”

³²Hakhe Eliasarni bwsla ochai Phinehas tei tẃiphangrok Rubenni bwsarok, Gadrokni bwsarok Giliad hano yakarwi ha Kanano Israil bororokni thani kiphilwi tháng laiwi, bórokno kók sa phai kha.

³³Hakhe omorok Israilrokno khakchang rw kha tei Israilrok Kaitorno lob lai kha; tei bórok choba nang laiwi Rubensongni bai, Gadsongni hano sokomorna kók sa lai li ya.

³⁴Ruben bai Gadni bororok o háyáno “Sakki” hwnwi mung rw kha, tamni hwn ba bórok hai hwnwi sa lai kha, “Omo wng kha chini bai bórokni bisingo Subraiyung se chini Kaitor aboni mari.”