Read Kok Borok JOSUA 23 Bible Online

JOSUA 23 - Kok Borok bible

JOSUA 23

¹Sal kwbángmani ulo Subraiyung Israilrokno bórokni yaksi yagra arirokni yakni lenglama rw kha. Aphuru Josua chakra wngwi phai kha.

²Josua bebak Israilrokno, okrarokno, bokhorokrokno, buj thumnairok tei tẃiphangrokno ringwi hai hwnwi sa kha, “Ang tabuk le chakra laha,

³phiya Subraiyung norokni Kaitor norokni bagwi o dopharokno khlaimani bebakno nuk bai kha. Subraiyung norokni Kaitor baithang’-no norokni bagwi choba khlai kha.

⁴Ang norokni bosongrokni bagwi tabuk tong bainai dopharokni hano tei ang mechenmani Jordanni simi salthángbaini ha kwcharni twijlang jorano ha banta rw bai kha.

⁵Subraiyung norokni Kaitor swmai tangmani hai bórokno norokni bwskango’-no rwkhlai rohornai tei norok bórokni ha-o achugwi mannai.

⁶Aboni bagwi kha ragwi hus wng di tei Musini kerong bijabo swijak tongmani hai khlai di, aboni kisa phano yagra, eba yaksi ta wng di,

⁷tei nini yaksi-o tong bainai o bororok bai ta gwdal di, bórokni mung baibo swmai ta tang di, bórokno tabo ta khulum di, tabo ta mon di.

⁸Tabukni hai kheno Subraiyungni thani se kwphaui tong di.

⁹Subraiyung kwplai tei phan gwnang dopharokno rwkhlai rohor kha tei norokni bwskango tini jora kebo kebengwi bachaui man li ya.

¹⁰Subraiyung swmai tangmani hai bo norokni bagwi choba khlaima bai norokni bisingo khoroksa borok se sasai bororokno khárwi rohorwi mano.

¹¹Norok jai khe tong di, Subraiyung norokni Kaitorno hamjak di.

¹²Tamni hwn ba tumungno norok uphilwi norokni bisingo tong rwknairok dopharok bai thansa wng khe tei bórok bai kái lai-bór lai wng lai khe,

¹³kaham khe saui man di, Subraiyung norokni Kaitor o dopharokno norokni bwskangni tei rwkhlai glak, Subraiyung norokno rwmani o ha kahamni khoroksa phano kwrwi khe komor ya sak bórok se norokni bagwi biching tei khẃi wngnai, phikungni bagwi chemuk tei mokolni khe phón wngnai.

¹⁴“Ang thwina kasu kha, hani bororok thángthani’-no angbo thángwi tong laha; Subraiyung norokni Kaitor kók rwmarok khlaijak kha hwnwi bwkha bai’-no nwng saui mano, aboni mungsa phano nang yaui tháng li ya.

¹⁵Tamo khe Subraiyung norokni Kaitor bebak manwi kahamrok norokni swmai tangmano yapharma haino kók khna ya hwn khe bo abórokno bebakno sokomor phinai.

¹⁶Subraiyung norokni Kaitor dagimani bebak kerong tẃi tong yaui kubun mwtairokno monwi khulum khe, Subraiyungni jolima norokni saka-o klainai tei norokni bisingo khoroksa phano bo rwmani o ha-o yógwi tong rwk glak.”