Read Kok Borok JOSUA 24 Bible Online

JOSUA 24 - Kok Borok bible

JOSUA 24

¹Hakhe Josua bebak Israil bosongrokno Sekemo thum kha, bo okrarokno, bokhorokrokno, buj thumnairokno, Israilni tẃiphangrokno ring kha, hakhe bórok Kaitorni bwskango phai kha.

²Josua bebak bororokno hai hwnwi sa kha, “Subraiyung Israilni Kaitor hai hwnwi sa-o, ‘Agi-o norokni chuchusong Abraham bai Nahorni bupha Tera Uphratis twimani ayang naro tong bai’-o tei kubun mwtairokno khulumo.

³Hakhe twima ayang narni norokni chuchu Abrahamno tlang kha tei bebak ha Kanan bising tẃi tẃither kha, bono bosong kwbángma rw kha. Ang bono Isakno rw kha,

⁴Isakni thani Jakob bai Esauno rw kha tei Esauno Seirni hatháino rw kha, tamo khe Jakob bai bwsarok ha Ijibo tháng kha.

⁵Ulo ang Musi bai Aronno rohor kha tei ang Ijibo sátokma kotor rohorwi norokno tikhlaiwi tubu kha.

⁶Hakhe ang norokni chuchusongno ha Ijipni tikhlai tubu kha tei norok twijlango sók phai khe Ijiprok korai malkhungrok bai tei korai sengkrakrok bai khe Twijlang Kwchak jora rwkthar phai kha,

⁷bórok Subraiyungni thani kap lai khe ang bórok bai Ijiprokni kwcharo mwnakma khlai kha. Ang Ijiprokno twijlango swklwk kha, ang Ijiprokno khlaimani norokni mokol bai nuk kha. “ ‘Yagulo hasing panthoro nwng kwdwkma ma tong kha.

⁸Hakhe ang norokno Jordanni salka bwkhago tong bainai Amorrokni ha-o tubu kha. Bórok norok bai choba nang lai kha, hai phano ang bórokno norokni yago yaphar kha, norok bórokni hano na lai kha tei ang norokni bwskango bórokno sokomor kha.

⁹Hakhe Moabni habugra Jiporni bwsla Balak norok bai choba nang kha, bo norokno swrai rwna bagwi Beorni bwsla Balamno na rohor kha.

¹⁰Phiya ba ang Balamni kók khna li ya, bo norokno hamari se rw si-o. Abo tẃi khe ang norokno Balakni yakni phiyók kha.

¹¹Aphuru norok Jordan bárwi Jeriko phai kha tei Jerikoni bororok norok bai choba nang lai kha, abo hai khe Amorsarok, Peressarok, Kanansarok, Hitisarok, Girgassarok, Hibisarok, Jebussarokbo nang lai kha. Ang bórok bebakno norokni yago yaphar bai kha.

¹²Ang norokni bwskang bwskang phiya chwknairokno rohor kha; abo norokni bwskangni khoroknwi Amorsa habugrarokno rwkhlai kha; abo norokni seng bai buya, badukhung bai buya.

¹³Ang norok muphunjak ya hano, kamiyung tangma kwrwino rw kha, tabuk norok aro tongo tei norok káimani kwrwi angur bwtháirok bai olibrok cháui ma tongo.’ ”

¹⁴Hakhe tabuk, “Subraiyungno kiri di, sói khe kók narwgwi bono mon di, norokni chuchusong twima ayang naro tei Ijibo khulummani mwtairokno khibiui rohorwi, Subraiyungno simi se mon di.

¹⁵Norok Subraiyungno monnani muchung ya khe, sabono monnai tini’-no chong di, norokni chuchusong twima ayang naro khulummano da, eba khe norok tabuk tongmani hani Amorsarokni mwtairokno da, tamo khe ang bai ani núkhung le Subraiyungno se monnai.”

¹⁶Hakhe bororok hai hwnwi sa lai kha, “Chwng Subraiyungno yakar glak tei kubun mwtaino mon glak.

¹⁷Subraiyung chini Kaitor chini chuchusongno tei chwngno ha Ijibo seleng tongmani tubu kha, chini bwskango kirimasingcha samung khlai kha, chwng dopha kwbángma bising tẃi lái tháng phuru’-obo chwngno kati rwui ton kha.

¹⁸Subraiyung chini bwskango o ha-o tong bainai bebak Amorni bororokno buthar bai kha. Aboni bagwi chwng le Subraiyungno se monnai, bo se chini Kaitor.”

¹⁹Josua bororokno hai hwnwi sa kha, “Norok Subraiyungno monwi man glak, tamni hwn ba, bo wng kha kwthar Kaitor, bo risi gwnang Kaitor, bo norokni sumsok bai cha yano nakar glak.

²⁰Buini hani mwtaino khulumnani bagwi Subraiyungno yakar khe bo uphilwi norokno sátoknai tei sokomornai.”

²¹Bororok Josuano hai hwnwi sa kha, “I’nhi, chwng Subraiyungno se monnai.”

²²Hakhe Josua bororokno hai hwnwi sa kha, “Subraiyungno norok monnai hwnmani abo norok sak sakno sakki.” “I’n, chwngno sakki,” hwnwi bórok sa kha.

²³Bo hai hwnwi sa kha, “Aswk khe norokni aro tongma buini hani mwtairokno khibiui rohor bai di, Subraiyung Israilni Kaitorni thani norokni khunju kaichomwi kha kiphil di.”

²⁴Hakhe bororok Josuano hai hwnwi sa kha, “Chwng Subraiyung chini Kaitorno monnai tei bini kók simi se khnanai.”

²⁵Hakhe Josua a salo bororok bai kók kha lai kha tei Sekemo bórokni bagwi kerong bai raidarok rw kha.

²⁶Josua o kókrokno Kaitorni kerong bijabo swi kha, bo kaisa holong kotorma naui abono Subraiyungni kwthar háyá uk buphang yaphango kái kha.

²⁷Josua bebak bororokno hai hwnwi sa kha, “Nai di, o holong se chini sakki wngnai, abo Subraiyung chwngno samani bebak kókrokbo khna kha. Kaitorni thani kisa phano phér khe abo norokni sakki wngnai.”

²⁸Hakhe Josua bororok rohor kha, sak sakni ha-o kiphil bai kha.

²⁹Abórokni ulo Nunni bwsla Josua Subraiyungni seleng bisi 110 (sarachi-o) thwi kha.

³⁰Bórok bono bini sakni ha Timnat Sera-o phob kha, abo wng kha Ephraimni hathái kami, Gas hachukni salsibai bwkhak.

³¹Israilni bororok Josua kwthang tong langsak tei bini ulo okrarok Subraiyung Israilni bagwi aswk samung khlai langmarokno nuknairok kwthang tong baisak Subraiyungno mon lai kha.

³²Josepni bekrengrokno Israil bororok ha Ijipni tubu-ui Sekemo phob kha, rukphai lepsara bai kisa ha Jakob Hamor bwsarok, Sekemni buphani thani paimani ha-o phob lai kha, o ha Josepni bosongrok man kha.

³³Aronni bwsla Eliasar thwi khe Gibea-o phobjak kha, hathái kami Ephraimni kami kotor, abo Phinehasni bwsano rwjak kha.