Read Kok Borok JOSUA 3 Bible Online

JOSUA 3 - Kok Borok bible

JOSUA 3

¹Hakhe Josua phung aisirisiri bachaui bebak Israilni bororok bai Sitimni lam rwui Jordan rukungo phai kha, bórok bár lainani swkang aro batham kha lai kha,

²nokha salthamni ulo khe tẃiphangrok bathamni bising tẃi tháng kha,

³hakhe bororokno hai hwnwi sa kha, “norok Lebini ochairokno Subraiyung norokni Kaitorni swmai bokhokno balwi thángma nuk khe batham yakarwi bórokno rwkthar di,

⁴nwng a lamano si glak, tamni hwn ba norok swkango a lama tẃi uáisa phano him ya kho. Phiya ba norok bórok bai kakjak khe ma tongnai, aboni gana-o ta tong di, muk 200 swk hakchalo khe tong di; aboni samo ta seder di.”

⁵Hakhe Josua bórokno, “Norok sak sakno kwthar khlai bai di, khwna-o Subraiyung uanamasingcha samung kotor khlai anw,” hwnwi sa kha.

⁶Josua ochairokno, “swmai bokhokno naui bororokni bwskango him di,” hwnwi sa kha. Hakhe bórok swmai bokhok naui bororokni bwskango tháng lai kha.

⁷Tamo khe Subraiyung Josuano hai hwnwi sa kha, “Tini salo ang bebak Israilrokni mokolo nono kuchuk khlainai; hakhe ang Musini logi-o tongma hai nini logi-o bo tongnai hwnwi bórok saui mannai.

⁸Nwng swmai bokhok balnai ochairokno ma daginai, norok Jordan twima rukungo sók phai khe Jordano thir khe bachaui ma tongnai.”

⁹Hakhe Josua Israilni bororokno, “Oro phai di tei norokni Subraiyung Kaitorni kókrokno khna phai di,” hwnwi sa kha.

¹⁰Hakhe Josua hai hwnwi sa kha, “Kaitor norokni bisingo tongo hwnwi saui man anw tei norok khoroksa kwrwi tẃi khe norokni bwskangni Kananrokno, Hitisarokno, Hibisarokno, Peressarokno Girgassarokno, Amorsarokno tei Jebussarokno rwkhlai rohornai.

¹¹Nai di, bebak ha gwnangwini Subraiyungni swmai bokhok norokni slái swkang Jordan bárnai.

¹²Tabuk Israil dophani bosongo khoroksa khoroksa khe khorokchinwino saiwi di.

¹³Aphuru ha gwnangwini Subraiyungni swmai bokhokno balnai ochairok Jordan twi-o yakung káson khe, Jordanni twi yormani thak anw, twi kochokkhlai phaimani dolsajagwi bathagwi tong anw.”

¹⁴Hakhe bororok ochairok swmai bokhok bal laiwi Jordan bár lainani bórokni rínokni lam rw lai kha,

¹⁵swmai bokhok balnairok Jordanno phaiwi ochairokni yakung twi-o káson khe, aswk mai ramani jora-o bo twi kupulung khe Jordanni twi yorwi tongmani (Jordan babainwi rukungo lomsaui yorwi tongo),

¹⁶twirok kuchukni yormani thagwi, hakchalo Sarethan kamiyung gana-o Adamni amchoi-o chuksaui tongwi kha tei twijlang kwthwini yorkhlaiwi tongmani abo thejagwi tháng kha, hakhe bororok Jeriko gana tẃi bár lai man kha.

¹⁷Hakhe Israilrok ha kwran tẃi bár lai phuru swmai bokhok balnai ochairok ha kwran Jordan kwcharo bebak bororok bárwi tháng bai ya sak aro bachaui tong lai kha.