Read Kok Borok JOSUA 4 Bible Online

JOSUA 4 - Kok Borok bible

JOSUA 4

¹Bebak Israil dopharok Jordan bár bai khe, Subraiyung Josuano hai hwnwi sa kha,

²“Tabuk bororokni bisingni bosongo khoroksa khoroksa khe khorok chiknwi saiwi na di,

³tei bórokno sa di, oro Jordan kwcharni holong budul dul chinwi ochairok bachaui tongmani aroni khochaui norokni logi-o tẃi di, hakhe tini horo norok tongma-o abono ton di.”

⁴Hakhe Josua Israil bosong thwgwi khoroksa khe bo saiwi namani borok khorok chiknwirokno ring kha;

⁵aphuru khe Josua bórokno hai hwnwi sa kha, “Norokni Subraiyung Kaitorni swmai bokhokni swkango khe Jordano tháng di tei Israil bosong thwgwino Jordan kwcharni holong kaisa khochaui bangora boksaui tubu di.

⁶Omono norokni bagwi mari wng anw, ulo norokni bwsa-bẃtẃirok o holongrok tamo hwnwi sẃng khe,

⁷hakhe norok bórokno sa di, ‘Subraiyungni swmai bokhok bwskango Jordanni twino khaknwi khe khak kha, o Jordan basu phuru-o, o holongrok wng kha Israilrokni bagwi mol brúm brúmni mukumu wngnai.’ ”

⁸Hakhe Israilni bororok Josua dagimani hai kheno khlai lai kha, Subraiyung Josuano sama haino bórok Jordan kwcharni holong thái chinwi Israil bosong bángma swk khochaui na lai kha tei abono bórok tongmani bathamo tlangwi aro tonwi lai kha.

⁹Josua Jordan kwcharo swmai bokhok balnai ochairok bachama-o holong thái chinwino ton kha, aboni mukumu tini jorabo tong kho.

¹⁰Subraiyung Josuano samano bororokno sanani tei bebak Musi Josuano dagimani samungrokno khlai bai ya sak Swmai bokhok balnai ochairok Jordan kwcharo bachaui tong lai kha. Bororok dakti dakti khe twi bár lai kha.

¹¹Hakhe bebak bororok twi bárwi tháng bai khe, Subraiyungni Swmai bokhok balnai ochairok bororokni bwskango tháng kha.

¹²Hakhe sengkrak Rubenni bwsarok, Gadni bwsarok tei khaksa Manaseni bwsarok Musi dagimani hai kheno bororokni bwskang tẃi tháng lai kha.

¹³Khorok brwichisai swk bororok chobani bagwi seng-phuirok naui tiyar khe Subraiyungni bwskango Jeriko hapharo tháng lai kha.

¹⁴A salo Subraiyung bebak Israilrokni bwskango Josuano kuchuk khlai kha, hakhe bórok Musino bórimani hai Josuanobo bini langma tong langsak bóri lai kha.

¹⁵Hakhe Subraiyung Josuano hai hwnwi dagi kha,

¹⁶“Swmai bokhok balnai ochairokno Jordanni phai si di hwnwi sa di.”

¹⁷Josua ochairokno, “Jordanni kasaui phai si di,” hwnwi dagi kha.

¹⁸Subraiyungni Swmai bokhok balnai ochairok Jordanni kwcharni phai khe tei ochairokni yakung hakung kwran saka-o yapri rw khe Jordanni twi yornani chengsa phi kha tei agi-o tongma haino kupulung wng phi kha.

¹⁹Tabuk tal yaphangni nokha salchi-o bororok Jordan bár lai bai kha, hakhe Jerikoni salkabai phaisingo Gilgalo batham khlai lai kha.

²⁰Hakhe bórok Jordanni khochamani holong kaichi nwino Gilgalo beraui songcha lai kha.

²¹Hakhe Israilni bororokno sa kha, ulo norokni bwsa-bẃtẃirok o holongrok ba tamo hwnwi sẃng khe,

²²aphuru norokni bwsa-bẃtẃirokno Israilrok Jordan kwran tẃi khe bár laimani hwnwi sa di.

²³Subraiyung norokni Kaitor twijlang kwchakno bebak borok bár bai ya sak kwran khlaimani hai Subraiyung Kaitor Jordan twinobo abo hai’-no khlai kha.

²⁴Hakhe bebak hayungni bororok Subraiyungni yak bwswk phan gwnang saui man anw tei norok mol brúm brúm Subraiyung Kaitorno kiri tong thung.