Read Kok Borok JOSUA 5 Bible Online

JOSUA 5 - Kok Borok bible

JOSUA 5

¹Jordanni salthángbai phaising tongnai bebak Amorni habugrarok tei twijlang kotor gana-o tong bainai bebak Kananni habugrarok Jordanni twino Subraiyung bebak Israilni bororok bárwi tháng bai ya sak kwran khlai kha hwnwi khna khe Israilrokno belai kiri baiwi bwkha kwlwi bai kha.

²Aphuru Subraiyung Josuano hai hwnwi sa kha, “Sengsano kubuk khe hul di tei Israilrokno tei uáisa sakur ra lai bai di.”

³Hakhe Josua bini bagwi sengsa kubuk khe hului sakur rama hathái-o Israilrokno sakur ra bai kha.

⁴Josua tamni bagwi sakur rana khlai phi kha, abo hwn khe omo hai; Israilrokni bororok ha Ijipni nongkhor phaimani ulo bebak chobani bororok, Ijipni hasing panthoro lama’-ono thwi tháng bai kha.

⁵Bebak nongkhorwi phainairok sakur rajak phano, ha Ijipni nongkhorwi phaimani ulo hasing panthorni lama-o achainairok sakur rajak ya kho.

⁶Tamo khe bebak Israilni bororok tei chobani bororok ha Ijipni nongkhor lai phainairok Subraiyungni kók khna li ya, abo bai’-no bórok komor ya sak hasing panthoro nokha bisi brwichi jora ma him lai bai kha; tamni hwn ba chwngno piya bwtwi bai dut yorjak hano rwnani hwnwi bórokni chuchusongni thani swmai tangmani, Subraiyung bórokno a hano phunuk glak hwnwi bórokni thani swmai tang kha.

⁷Hakhe bo bórokni aro tornai bwsarokno Josua bórokno sakur ra kha. Bórok lama-o sakur rajak liyani bagwi aphurubo bórokni sakur rajak bai ya kho.

⁸Bebak dopharok sakur rajak baiwi bórokni kwsarok hamyasak bathamo sakni tongthai-o tong lai kha.

⁹Ulo Subraiyung Josuano hai hwnwi sa kha, “Tini ang norokni aroni Ijibo mung hamya manmano swkwmaui rohor kha.” Hakhe tini jora aboni mung wng kha Gilgal.[1]

¹⁰Tabuk Israilrok Gilgalo batham khlai phai kha, Jerikoni hapharo a talni nokha sal chibrwini salo yókma terni panda khlai lai kha.

¹¹Yókma terni salo a ha-o manmani chámung, bwchlwi yógwi tei auang bánglano chá lai kha.

¹²Teini salo bórok a hani chámung chá laima ulo khe, manna phaimani thak kha, Israilni bororok tei manna man li ya; tei a bisi-o khe Kanan hani bwtháirok ma chá lai kha.

¹³Josua Jeriko gana-o tong phuru, bo khorok tisaui nuk kha, bini bwskango borok khoroksa yago seng tẃiwi bachajak, hakhe Josua bini gana-o thángwi bono hai hwnwi sẃngwi kha, “Nwngba chini bwkhak da eba arirokni bwkhak?”

¹⁴Hakhe, “I’nhi, ang Subraiyungni sengkrak bokhorok se tabuk phai-o,” hwnwi bo sa kha, hakhe Josua khorok bomwi bono khulumui hai hwnwi sẃng kha, “Nini selengno tamo hwnwi thol?”

¹⁵Subraiyungni sengkrak bokhorok Josuano hai hwnwi sa kha, “Nini yakungni yaklapno sokok di, tamni hwn ba nwng bachamani o ha le kwthar se.” Hakhe Josua sajakma haino khlai kha.