Read Kok Borok JOSUA 6 Bible Online

JOSUA 6 - Kok Borok bible

JOSUA 6

¹Tabuk Israilrokni bagwi Jeriko duglamrok kholobwi tonjak kha, khoroksa phano bisingo hapnai tei phataro nongkhornai bo kwrwi kha.

²Hakhe Subraiyung Josuano hai hwnwi sa kha, “Ang Jeriko tei habugrano tei bebak phan gwnang sengkrakrokno nini yago yaphar kha.

³Nwng tei nini chobani bebak bororokno tẃiwi kamiyungno salo uáisa khe saldok ma kiting lainai.

⁴Hakhe ochai khoroksnirok mera maksni bokorongni totro kotor tẃi laiwi swmai bokhokni bwskango ma himnai: Nokha salsnini salo norok kamiyungno uáisni kitingwi kiting lai di, aphuru ochairok totrorok tamnai.

⁵Norok ochairokni totro khorang sotonwi khorang kolok khe pungma khna hor khe, bebak bororok khorang kotorma khe ma chirik bainai; hakhe kamiyungni chokdeualrok baiwi khlainai tei bebak sengkrakrok kamiyungno uáisa bai’-no choprogwi habwi mannai.”

⁶Hakhe Nunni bwsla Josua ochairokno ringwi hai hwnwi sa kha, “Norok swmai bokhokno tẃiwi, khoroksni ochairok mera bokorongni kotor totro kongsni tẃiwi Subraiyungni swmai bokhok bwskango tháng di,”

⁷Hakhe bo bororokno hai hwnwi sa kha, “Bwskang thángwi kamiyungno kitingwi di tei Subraiyungni swmai bokhok bwskango khe da-seng tẃijak bororok tháng di.”

⁸Josua bororokno dagima hai khe’-no, ochai khoroksnirok mera bokorongni totro kaisni tẃi laiwi abono sup laiwi Subraiyungni bwskango tháng lai kha, hakhe Subraiyungni swmai bokhokbo bórokni utung utung tháng kha.

⁹Phiya da-seng tẃijak bororok totro supnai ochairokni bwskango tháng kha, Swmai bokhokni uklogo mwrwknairok khe Swmai bokhokni uklogo tháng lai kha. A jora-o totro tam lai twtwi tháng lai kha.

¹⁰Phiya ba Josua bini bororokno, “Norok ta chirik di tei norokni khorangbo ta khna rw di, ang norokno dagi ya sak norokni búkhúkni kók bo ta nongkhor thung, ang sa phuru khe se norok chirik lai di,” hwnwi dagi kha.

¹¹Hakhe bórok Subraiyungni swmai bokhokno kamiyungno uáisa kiting rwui tubu-ui bathamo kiphilwi phaiwi horo arono tong lai kha.

¹²Josua teini phung aisirisiri bacha khe, hakhe ochairok Subraiyungni swmai bokhokno tẃi lai phi kha.

¹³Khoroksni ochairok mera bokorongni kongsni totro tẃi laiwi Subraiyungni swmai bokhokni bwskango him laiwi totro tam lai kha tei da-seng tẃijak bororok bórokni swkango tháng kha tei uklok mwrwknairok khe swmai bokhokni uklogo tháng kha, aphuru ochairok totro tam lai máng tong kha

¹⁴Nokha salnwini salo bórok tei uáisa kamiyungno kiting lai kha tei bathamo kiphilwi phai kha. Abo hai khe bórok nokha saldok khlai lai kha.

¹⁵Sal snini salo bórok aichugo bacha laiwi kamiyungno swkango khlaimani hai khe kiting lai kha, tamo khe aphuru bórok o kamiyungno uáisni kiting lai kha.

¹⁶Uáisni kiting baiwi ochairok totro sotonwi tam khe, Josua bororokno hai hwnwi dagi kha, “Chirik bai si di! tamni hwn khe Subraiyung norokno o kamiyungno yaphar kha!”

¹⁷Hakhe kamiyung tei aroni bebak tong kwrwi sokomornani bagwi Subraiyungno rwjaknai; baliknai Rahab khoroksa tei bini nogo tongnairok simi se yóknai, tamni hwn ba bo chwng rohormani naichomnaino hui ton kha.

¹⁸Tamo khe norok a sokomorjakma manwirokno ta khocha di wng ya khe norok Israilni bathamo urumuru phnangwi sokomormung tubunai.

¹⁹Tamo khe rangchak, rukphai, pitol tei sorni manwirok Subraiyungni thani-o kwthar se, abórokno Subraiyungni rangkhógo ma tonnai.

²⁰Hakhe ochairok totro tam khe bororok chirik lai kha, bororok totro khorang khna khe khorang kotorma khe chirik lai kha, hakhe chokdeual pwtapsa khe baiwi klai kha. Hakhe bebak bororok bwskang tẃi’-no kamiyungo habwi lai kha tei kamiyungno naui pái kha.

²¹Hakhe bórok bebak kamiyungo tongmarokno sokomorwi pái lai kha, aroni chwlarok, bwrwirok, okra tei chwrai, musukrok, merarok, korai chirkarokno seng bai khe buthar laiwi pái kha.

²²Josua khoroknwi a naichom lainairokno hai hwnwi sa kha, “Tháng di, norok swmai tangmani tẃi’-no a baliknai bwrwini thani thángwi bono tikhlai tubu di tei bini bebak tongmaroknobo tubu di.”

²³Hakhe a sikla khoroknwi naichomnairok bisingo tháng laiwi, Rahabno tikhlai tubu lai kha, bini bupha, buma, takhuksong, bebak bini tong kwrwi tei bini sandai-masakrokno tubu-ui Israilrokni bathamni phataro khe ton kha.

²⁴Hakhe bórok kamiyungno tei bebak aro tongmano hór bai sógwi khibi bai kha, tamo khe rangchak, rukphai, pitol tei sorni manwirokno khe bórok Subraiyungni nokni rangkhógo ton kha.

²⁵Tamo khe Josua baliknai Rahab tei bini núkhung tei bini tong kwrwi bebakno mwthang kha, hakhe bo tini jora Israilrokni bisingo’-no tong kho, tamni hwn ba bo Josua Jerikono naichomna bagwi rohorma bororokno hui ton kha.

²⁶A jora-o Josua omo hai khe kwrak khe hai hwnwi sakhlai kha, “Khoroksa swk o kamiyungno tang phinani khá chongnai borok Subraiyungni swraimung nang thung.” Swkang nokthai lunai borok bini bwsla okrano kwmanai, duglam snamnai borok, bini bwsla tháitakno Kwmanai.

²⁷Hakhe Subraiyung Josuani logi-o tong kha tei bebak ha-o bini mung pírjak kha.