Read Kok Borok JOSUA 9 Bible Online

JOSUA 9 - Kok Borok bible

JOSUA 9

¹Hakhe bebak habugrarok Jordanni saltháng bai phaisingni hathái-o tei hathái yaphango tongnairok tei ha kwcharni twijlang rukungni hani simi Lebanon jora tong bainai Hitisarok, Amorrok, Kanansarok, Peressarok, Hibisarok tei Jebusrok Israilrok kwplai wngma kókno khna bai kha.

²Bórok bebak thansa wng laiwi Josua tei Israilrok bai choba nang lainani tiyar wng lai kha.

³Gibeono tongnairok Josua Jeriko bai Aino tamo khlai kha abono khna kha.

⁴Bórok bono phemloknani chong laiwi sola kichik naui abono subui, kisa chámungrok tei angur bwtwirok naui bórok korai chirka saka-o abono boksaui

⁵kwcham tei thapjak yaklap ká laiwi tei kamchwlwi kwcham chumwi, kwran tei kusum chámung nai lai kha.

⁶Hakhe bórok Gilgal bathamo thángwi Josuano tei Israilni bórokno hai hwnwi saui lai kha, “Chwng lama hakchalmani phai lai ja-o tei norok bai kók kha laina nai-o.”

⁷Israilrokni bororok Hibisarokno hai hwnwi sa kha, “Norok gana gana-o se tong baina, bahai khe norok bai kók khlai mannai?”

⁸Bórok Josuano, “Norok buroni phai lai?” Hwnwi sẃng kha.

⁹Bórok bono sa kha, hakchalma hani nini selengrok phai lai ja-o, nini Kaitor Subraiyung Ijipsarokno tamo khlai kha chwng abono bebak khnaui chwng hakchalma hani phai lai-o.

¹⁰Jordanni salka phaising Amorsarokni habugra khoroknwi Astaroto tong bainai, Hesbonni habugra Sihon tei Basanni habugra Ogno khlaimarokno chwng khna kha.

¹¹Chini tẃiphangrok tei chini bororok chámungrok tlangwi norok bai malaiwi hai hwnwi saui di hwnwi rohor kha, “Chwng nini selengrok se, phai di, tabuk kók kha lai si anw.”

¹²Nai di chini chámungno, chwng lamani bagwi nokni chámung na lai phuru kutung kaham se tongmani, tamo khe tabuk abo ransaui, sumwi tháng kha.

¹³“Chwng angur bwtwi damanirokbo kwtal se, tabuk abo kichigwi tháng kha, chini kanmani rírok bai yaklaprok hakchal him laimani bai kwcham wng bai kha.”

¹⁴Hakhe Israilni bororok bórokni aroni chámung yachak kha, hai phano bórok kisa phano Subraiyungno sẃngwi nai lai li ya.

¹⁵Josua Gibeonni bororok bai kók kha laiwi bórokno tongnanibo tong rw kha tei tẃiphangrokbo kók narwknani swmai tang lai kha.

¹⁶Kók kha laimani salthamni ulo khe Israilrok abórok bórokni gana-o tong bainairok se hwnwi saui man kha.

¹⁷Hakhe Israilni bororok aro tháng laiwi salthamni salo bórokni kamiyungo sógwi lai kha. Bórokni kamiyungrok wng kha: Gibeon, Kephira, Birot tei Kiriatjearim.

¹⁸Phiya ba Israilrok bórokno buthar li ya, tamni hwn ba bórokni tẃiphangrok Subraiyung Israilni Kaitorni mung bai swmai tang kha, hakhe bebak bororok tẃiphangrokno tentai lai kha.

¹⁹Tẃiphangrok hai hwnwi sa kha, “Chwng, Subraiyung Kaitorni mung bai swmai tang kha tei chwng yak tisaui man li ya.

²⁰Chini kók bai’-no chwng bórokno ma mwthang sinai wng ya khe Kaitor chwngno jolijaknai”

²¹Tẃiphangrok hai hwnwi sa kha, “Bórok thang si thung,” tamo khe bórok chini bagwi buphang ma tannai tei twi ma khóknai.

²²Josua Gibeonni bororokno bini thani tubuna bagwi kobok kha tei bórokno sẃng kha, “Tamni norok samphasa-o tongwiba ‘Chwng norok bai hakchalma-o,’ hwnwi tatal saui chwngno phemlok?

²³Norok omo hai khlaimani bagwi Kaitor norokno swrai kha. Norokni bisingo baksa seleng máng wngwi buphang tanwi tei ani Kaitorni nokni bagwi twi khóknai ma wngnai.”

²⁴Bórok Josuano hai hwnwi sa kha, “Chwng omo hai ma khlai kha, tamni hwn ba chwng saui mano Subraiyung nini Kaitor bini seleng Musini thani nini yago bebak hano yapharnani dagi kha tei o ha-o tongnai bebakno butharwi pái bainani tei chwng norokno belai khe kirima bai se abo hai ma khlai si-o.

²⁵Tabuk chwng nini yago klai kha, nini muchung tẃi’-no khlai si di.”

²⁶Hakhe Josua Israilrokni yakni phiyók kha, bórokno buthar li ya

²⁷Phiya ba bórokno seleng snamwi bebak Israilrok tei Kaitorni bagwi buphang tannani tei twi khóknani samung ma khlai kha. Tabuk jora Kaitorno khulumnani chongjakma-o bórok a samungno khlai ma tong kho.