Read Kok Borok 2 THESALONIKI 1 Bible Online

2 THESALONIKI 1 - Kok Borok bible

2 THESALONIKI 1

¹Pol, Sila tei Timothi omono swihoro. Thesaloniki motha-o tongnai chini Apha Kaitor bai Subrai Jisu Khristoni bororokno omono swihoro.

²Apha Kaitor bai Subrai Jisu Khristo norokno khairok thung, norokno khá kwchang rw thung.

³Takhukrok, norokni bagwi chwng sal brúm brúm’-no hambai rwui ma tongo. Chwng omo hai hambai rwthai klai-o, tamni hwn khe norokni poito belai rak rwrwgo, phiya norok buino hamjak rwrwgo.

⁴Aboni bagwino Kaitorni motharokni thani norokno tẃiwi chwng kók kotor sa-o. Sátokjagwi bebak tekto manjakma bising tẃi phano norok hama logwi poito khlaiwi tongmano tẃiwi chwng kók kotor sa-o.

⁵Kaitor sói khe’-no buj khlai-o, abo oro’-no sijago, tamni hwn khe omoni bagwi’-no norok bini ha-o tongna bagwi chúk anw, aboni bagwi norok sátokjagwibo tongma ba.

⁶Kaitor samung sói’-no khlainai: Norokno tekto phnangnairokno bo tekto phnangnai,

⁷phiya norok tekto mannairokno bo phiyóknai, chwngnobo haino phiyóknai. Kaitorno sini yarok bai chini Subrai Jisuni Kothoma Kahamno khna yarokno yagul suna bagwi Subrai Jisu bini phan gwnang suarirok bai hórjlai bai chuknohani nukjak phai phuru Kaitor omono khlainai.

⁹Subrai bini bebak bororok bai chẃngsacha khlaijakna bagwi, bebak poito gwnangrok bai bórijakna bagwi a salo phai phuru bórok yagul sujagwi komor phlai máng ma tongnai, bórok chẃngsajak Kwplai Kaitor bai kagwi ma tongnai. Tamo khe norok a poito gwnangrokni bisingo khopjago, tamni hwn khe chwng norokno samani kókno norok poito khlai kha.

¹¹Abo bai’-no norokni bagwi chwng suri san máng tongo. Chini Kaitor norokno ringma tẃi’-no norok tongwi man thung hwnwi chwng suri sano. Norok samung kaham khlaina muchungmano bo bini phan bai khlai bai thung, norok poito wngwi khlaimani a samungnobo khlai bai thung.

¹²Chini Kaitor tei Subrai Jisu Khristo khairokma bai omo tẃi kheno chini Subrai Jisuni mung norok bai kotor khlaijaknai, norokbo bo bai kotor khlaijaknai.