Read Kok Borok 2 THESALONIKI 2 Bible Online

2 THESALONIKI 2 - Kok Borok bible

2 THESALONIKI 2

¹Takhukrok, chini Subrai Jisu Khristo phainani kókno tẃiwi, phiya bo bai malaina bagwi chwng thumjaknani kókno tẃiwi ang norokno hai hwnwi koi ja-o:

²Subraini Sal phaiwi se tháng kha bla hwnwi sama bai aswk dakti bwkha udru mudru ta wng di, khá ta bái di. Kók diyari sa phuru eba motha-o kók sa phuru o kók sajak khna. Chwng o kók swi kha hwnwi khoroksa swk sa khna.

³Khoroksa swk bai phano lama ta koró rwjak di. Mol páina phuru Kaitorni kena arirok bacha ya sak, phiya a gaijanai Borok Hamya nukjak ya sak a Sal phai glak.

⁴Bororok surimani mwtairokno phiya bororok mwtai hwnmarokno bo kebengnai. Abórok bebakni slái bo sakno kotor khlainai, bo Kaitorni noktharo suda habwi achuknai, hakhe “Ang Kaitor,” hwnwi hwnnai.

⁵Norok muitu man ya da? Ang norok bai tong phuru norokno ang o kókrokno sa bai kha bla.

⁶Omo tabuk wngwi man ya tẃi khe kisa kasujagwi tong kho, abo tamo norok saui mano. Hakhe jora sók phai súk khe a Borok Hamya nukjak phai anw.

⁷Bisingni a Hamya tabukbo samung khlaiwi tongo, tamo khe kasu-ui tongnaino norwi rohorjak ya sak a wngna hwnmani abo wng glak.

⁸Aphuru a Borok Hamya nukjak phainai, hakhe Subrai Jisu phai phuru búkhúkni hama bai bono butharnai, hakhe bo chẃngsacha khe nukjak phaima bai bono sokomornai.

⁹A Borok Hamya Soitanni phan bai phainai, bo ha-o nuk ya samung, nang ya soidom tei uanamasingcha samung kwbángma’-no khlainai,

¹⁰hakhe komornairokno podrepot khe phemloknai. Bórok komornai, tamni hwn khe mwthangjakna bagwi bórok kubuino hamjakna nai li ya.

¹¹Aboni bagwi’-no bórok tatalno poito khlaiwi rwna tẃi khe Kaitor bórokno belai khe pok rw-o.

¹²Aboni bagwi’-no kubuino poito khlai yaui sumsok khlaiwi tongthokjaknairok bórok bebak’-no majra berjaknai.

¹³Takhukrok, norok Subrai bai hamjaknairokni bagwi chwng Kaitorno hambai rwui máng ma tongo. Tamni hwn ba Pholani phan bai phiya norok kubuino poito khlaima bai Kaitorni borok kwthar khlaina bagwi norok’-no puila mwthangjak granai hwnwi Kaitor norokno chong kha.

¹⁴Chwng norokno pírmani Kothoma Kahamni bising tẃi Kaitor norokno oro ring kha; chini Subrai Jisu Khristoni chẃngsacha-o norokbo khopjak thung hwnwi se bo norokno ringo.

¹⁵Hakhe takhukrok, kwrak khe bachaui tong di, hakhe chwng kók sama baibo swima baibo norokno phrwngmani a kubuino romwi tong di.

¹⁶Chwngno hamjakma bai khairogwi chini khápang srang rw phlaiwi khá twtwng khe tonnai chini Apha Kaitor bai chini Subrai Jisu Khristo

¹⁷norokno khápang srang rw súgwi samung kaham khlainani bai kók sanani phan rw thung.