Read Kok Borok 2 THESALONIKI 3 Bible Online

2 THESALONIKI 3 - Kok Borok bible

2 THESALONIKI 3

¹Takhukrok, páinanogo katswi norokni bisingo wngma hai’-no Subraini kók dakti’-no pírjagwi kotor wng thung hwnwi norok chini bagwi suri san di.

²Kaitor chwngno borok chengta tei borok hamyani yakni phiyók thung hwnwibo suri san di. Tamni hwn ba bebak bororok poito khlai ya.

³Tamo khe Subrai wng kha kók narwknai. Bo norokno rak rwnai, phiya Soitanni yakni kati rwui tonnai.

⁴Norokni bagwi hwn khe Subrai’-no tongo hwnwi chwng thopsa uana ya; chwng sama hai’-no norok tongo, phiya abo hai’-no tongnai hwnwi chwng saui man súgo.

⁵Kaitorno hamjagwi manna tẃi khe, phiya Khristo bai hama logwi manna tẃi khe Subrai norokni bwkhano chabwi tẃi thung.

⁶Takhukrok, Subrai Jisu Khristoni mungwi chwng norokno hai hwnwi dagi ja-o: Selerwi tongnai takhukrok bai ta tong di. Chwng phrwngma hai khe tong ya abo tẃi takhukrok bai ta tong di.

⁷Chwng khlaima hai’-no norok khlaithai klai-o, abo norok kaham khe’-no saui mano. Norok bai tong phuru chwng selerwi tong ya.

⁸Chwng keboni nogo magna cháui tong ya. Abo wng yaui chwng kolomtwi khiklaiwi samung tango; chwng norokni bere keboni poja wng ya tẃi khe hor sal samung tangwi máng phai kha.

⁹Norok chwngno ma se ma chá rwnai hwnwi saui man ya hwnmani o kók ya, norok rwng thung hwnwi se chwng omo hai tangwi phunugo.

¹⁰Norok bai tong phurubo chwng norokno hai hwnwi sa kha, “Samung tangna nai ya borok bo chá yaui tong thung.”

¹¹Chwng hai hwnwi khna-o, norokni bere baksa seler khaui tong bai kha, bórok mungsa phano tang yaui buini samungo simi se daijla wngwi tong lai phu, aboni bagwi se chwng o kókno sa-o.

¹²Subrai Jisu Khristoni mungwi chwng abo tẃi bororokno ragdama khlaiwi hai hwnwi sa-o: Kwchang kwchang khe tong di, samung tangwi chá di.

¹³Tamo khe takhukrok, samung kaham khlainano norok ta yakar di.

¹⁴Chwng swihormani o kókno khna ya wngnai aro khoroksa-khoroksu phano tong anw. Abo hai borok tong khe bono siniui narwk di, hakhe bo lachijakna tẃi khe bo bai ta tong di.

¹⁵Phiya ba bono kena ari hai khe ta nuk di; abo wng yaui takhuk hai khe bono ragdama khlai di.

¹⁶Chwngno khá kwchang rwnai Subrai norokno bebago’-no khá kwchang rw máng tong thung. Subrai norok bebak bai tong thung.

¹⁷Ang yak baithang omono swi-o: Ang Pol khápang rohoro. Kóktun swi bai brúm brúm ang omo hai khe swi-o, omo’-no ani swimung.

¹⁸Chini Subrai Jisu Khristo norok bebak’-no khairok thung.