Read Kok Borok 1 TIMOTHI 1 Bible Online

1 TIMOTHI 1 - Kok Borok bible

1 TIMOTHI 1

¹Ang Pol omono swihoro chwngno Mwthangnai Kaitor tei chwng khatungmani Khristo Jisu dagima bai ang Khristo Jisuni chonghor.

²Poito khlaima bising tẃi ani sói sói angsla Timothino omono swihoro. Apha Kaitor bai chini Subrai Khristo Jisu nono khairok thung, maya chá thung tei khá kwchang rw thung.

³Makidonia-o tháng phuru ang nono tong di hwnma tẃino ang nono Episo tonna muchungno. Aro baksa bororok kók cha ya phrwngwi tongo, bórokno abo hai ta phrwng di hwn di.

⁴Kerang kothomarok bai pirini mung bwtang kolokrokno khibi di hwnwi sa di; abo bai borok kók simi se báng lai-o, abo Kaitor naimano si rw ya, abono poito bai simi se saui mano.

⁵Bororok khá kuphur khe khá sutrang khe sói poito khlaiwi hamjak lai thung hwnwi se ang omo hai khe dagi-o.

⁶Baksa borok omo tẃirok khibiui kók nang ya sa laiwi lama koró lai kha.

⁷Bórok Kaitorni kerongno phrwngna nai-o, yang le bórok sakni kókno bórok’-no romwi man lai ya, phiya bórok khá torwi sa laimani abonobo bórok’-no romwi man lai ya.

⁸Kerongno kerong hwnwi nuk khe abo kaham hwnwi chwng saui mano.

⁹Hai phano o kókno sina nang anw, kerongrok borok kahamrokni bagwi khlaijakma ya, kerong swbainairok, kók khna yarok, Kaitorno kiri yarok, sumsok khlainairok, Kaitorni kók uansuk yarok, Kaitorno suri yarok, buma buphano butharnairok, borok butharnairok,

¹⁰buitali-buitala wngnairok, chwla bai chwla uaijanairok, muslirok, tatalrok, sakki tatal rwnairok, phiya sói phrwngma hai khe tong yarokni bagwi se kerongrok khlaijago.

¹¹Chẃngsajak bai hamchajak Kaitor pír di hwnwi ani yago yapharmani a Kothoma Kahamni bisingo a sói phrwngmano nukjago.

¹²Ano samung khlaina bagwi phan rwnai chini Subrai Khristo Jisuno ang hambai rw-o. Ang agi bono hamya sa phano, bono sátok phano, bono lachi rw phano, bo ano chúknai hwnwi bini samung khlaina bagwi chongma bai ang bono hambai rw-o. Tamo khe ang poito khlai ya wngma bai ang tamo khlaiwi tong abono saui man ya, abo bai’-no Kaitor ano maya chá kha.

¹⁴Subrai ano belai khe khairogo, hakhe chwng Khristo Jisu bai thansa wngma bising tẃi bo ano poitobo khlaiwi rw kha, habo hamjak rw kha.

¹⁵O kók khe sói’-no, omo khwbo khna sukthai, poitobo khlai sukthai: Khristo Jisu o swngcharo sumsok gwnangrokno mwthangna phai-o. Jotoni slái se ang sumsok gwnang kuk;

¹⁶hai phano ang sumsok gwnang kukni bising tẃi Khristo Jisu khá lok súgo hwnwi phunukna bagwi se Kaitor ano khairogo, omo tẃi khe ulo Khristo Jisuno poito khlaiwi tháng phlainairok Kaitor bwswk khairok abono nuknai.

¹⁷Mol brúm brúm tongnai Bugra bo mol brúm brúm bórijak thung, mol brúm brúm chẃngsacha wng thung, bo thwi phlai ya, bo nukjak ya, bo simi se Kaitor! Amen.

¹⁸Angsla Timothi, swkang baira nini bagwi kók diyari sajakma tẃino ang nono hai hwnwi dagi-o. Poito kwrak khe khá sutrang khe kahamni bagwi choba nang laina bagwi a kókrokno da-seng hai khe tẃi di. Baksa baksa bórokni sima tẃi tong yani bai poito khlai ya wng bai kha.

²⁰Abo tẃirokni bere Humenai bai Aleksandar; bórok rwngmari man rwui Kaitorno hamya sanani thakna tẃi khe ang bórokno Soitanni yago yaphar kha.