Read Kok Borok 1 TIMOTHI 2 Bible Online

1 TIMOTHI 2 - Kok Borok bible

1 TIMOTHI 2

¹Hakhe ang swkang’-no hai hwnwi sa ja-o, norok bebak bororokni bagwi Kaitorni thani sabo sa di, sabo san di, kobo koi di, hambaibo rw di;

²chwng kwchang kwchang khe bebago’-no Kaitorno suriui tongwi manna tẃi khe bugrarok bai tei bebak bokhorokrokni bagwi Kaitorni thani sa di.

³Abo kaham, phiya chwngno Mwthangnai Kaitor abono hamjago,

⁴bebak bororok’-no mwthangjagwi kubuino si thung hwnwi bo nai-o.

⁵Tamni hwn ba Kaitor wng kha khoroksa’-no, phiya Kaitor bai bororokno kwtha rwnai khoroksa tongo, abo wng kha borok Khristo Jisu;

⁶bo bebak bororokno phiyókna bagwi sakno rw kha. Abo wng kha bebak bororok mwthangjak thung hwnwi Kaitor naimano sói jora-o’-no sijak rwma se.

⁷Aboni bagwi poito bai kubuini kók buini bororokni thani sana bagwi ang pírnani bagwi chonghor khlaiwi rohorjago. (Ang tatal sa ya, ang Khristo-o kubuino’-no sa-o.) Phiya poito bai kubui bai buini bororokni phrwngnai.

⁸Joto jaga’-ono chwlarok suri san thung ang hwno, joli yaui, uálai yaui, yak kwtharno tisaui suri san thung.

⁹Ang bwrwiroknobo kan thani chum thani bólai yaui kaham khe kan thung chum thung hwno. Naithok khe phunukna bagwi khaju ta kan thung, rangchakni gwina ganthi eba khe muktarok ta kan thung, phiya morokni ríbo ta kan thung.

¹⁰Tamo khe samung kahamno kan thung, chwng Kaitorno suri-o hwnnai bwrwirok abo haino ma kanthai.

¹¹Bwrwirok siring siring khe koinene wng súgwi srwngthai.

¹²Ang bwrwirokno phrwng rw ya, chwlarokni bokhorokbo wng rw ya; bwrwirok siring siring khe tongthai.

¹³Tamni hwn ba Adam se swkang snamjago, ulo khe Ebi snamjago.

¹⁴Adam lama koró rwjak ya, a bwrwi se lama koró rwjagwi Kaitorni kerongno swbai-o.

¹⁵Hai phano bwrwirok koinene khe poito khlaiwi hamjagwi kwthar khe tong khe bwsa báma bai se mwthangjaknai.