Read Kok Borok 1 TIMOTHI 4 Bible Online

1 TIMOTHI 4 - Kok Borok bible

1 TIMOTHI 4

¹Poito khlainairokni bere baksa baksa ulo uslu-ui tháng anw hwnwi Phola srai-srai khe’-no sa-o; bórok tatal sanai mwtairokni kók khnanai, mwtai hamyarokni phrwngmano khunju kannai.

²Borok tatalrok phemlokna bagwi abo tẃi khe phrwngo, bórokni bwkha kwthwi, hór thupujak hai.

³Abo tẃi bororok ta káijak di hwno, bebak chámungno ta chá di hwno. Tamo khe poito khlaiwi kubuino sinairok hambai rwui cháui manna tẃi khe Kaitor bebak chámungrok snamo.

⁴Kaitor snammani manwirok bebak’-no kaham; mungsa phano khibina kwrwi, hambai rwui bebak’-no cháui mano;

⁵tamni hwn ba Kaitorni kók bai tei hambai rwma bai abo Kaitorni thani chúk rwjago.

⁶Nwng poitoni kók bai phiya nwng khnamani kók kubui bai khá ragwi takhukrokno o kókrokno phrwng khe nwng Khristo Jisuni seleng kaham wngnai.

⁷Phiya o swngcharni kerang kothomarokno khibi di, abórok bwrwirokni kók hai se. Kaitorno suriui tongna nai di.

⁸Bwsakni kosorot hale hamo; Kaitorno suriui tongmani abo bebago’-no hamo, tamni hwn ba abo tabukbo mwthangnai, ulobo mwthangnai hwnwi kók rwjak.

⁹O kók khe sói’-no, omono khwbo khna sukthai, poitobo khlai sukthai.

¹⁰Aboni bagwi’-no chwng belai lengwi samung kwrakbo ma tango, tamni hwn ba chwng Kaitor kwthangno khatungo, bo wng kha bebak bororokno Mwthangnai, aboni bere se poito khlainairokno Mwthangnai.

¹¹Nwng o kókrokno sabo sa di, phwbo phrwng di.

¹²Nwng chwrai borok hwnwi khoroksa bai phano sak nang ya ta wngjak di, tamo khe kók sama bai, tongmung bai, hamjakma bai, poito khlaima bai, kwthar khe tongma bai poito khlainairokno lama sói phunuknai se wng di.

¹³Ang phai ya sak nwng bororokno elembak poriui khna rwui tong sok di, Kaitorni kók saui tong sok di, phrwngwi tong sók di.

¹⁴Okrarok nini saka yak bera phuru kók diyari sama tẃino nono Phola rwmani a suarno samung nang ya ta wng di.

¹⁵Nwng kasamano jotono saui manna tẃi omorokno kaichomwi khlaiwi tong di.

¹⁶Nwng bahai khe tong, bahai khe phrwng abono nai di. Omorokno khlai máng tong di, hakhe nwngbo thang anw, nini kók khnanairokbo thang anw.