Read Kok Borok 1 TIMOTHI 5 Bible Online

1 TIMOTHI 5 - Kok Borok bible

1 TIMOTHI 5

¹Okrarokno ta khorai di, tamo khe nini nwpha hai khá chongwi se bórok bai kók sa di. Siklarokno nini takhukno nuk tẃi’-no nuk di,

²bwrwichwkrokno nini nwmano nuk tẃi’-no nuk di, bwrwi siklarokno nini bukhukno nuk tẃi’-no kwthar khe nuk di.

³Sói randijwkrokno nwng bórom khlai di.

⁴Khoroksa swk randijwkni suk-sa tong khe nokni bororokni bagwi Kaitor khlai di hwnma tẃi’-no a suk-sarok swkang’-no khlaina srwngthai, omo tẃi khe ma-phasongnobo chuchusongnobo su thai, abo’-no Kaitor hamjago.

⁵Khoroksa bai phano naijak ya abo tẃi sói randijwk hwn khe bo Kaitorno khá beraui hor sal chuba di hwnwi suri san máng tongo.

⁶Tongthok cháthogo tongnai randijwk khe bo kwthangwi’-no kwthwi.

⁷Khoroksa phano bórokno hamya nuk ya tẃi khe o kókno sa di.

⁸Phiya ba, tumungno khoroksa swk jaiti masakrokno nai ya nuk ya hwn khe, aboni bere se nokni bororokno suda nai ya nuk ya hwn khe chwng poito khlaimani abonobo khibima klai-o, poito kwrwirokni slái se bo hamya wngo.

⁹Nokha bisi dokchi ká ya sak bebak randijwkno’-no randijwkrokni bisingo ta khop di. Teibo kók khe ahai, bo uáisa simi káijak wngthai;

¹⁰bo samung kaham khlainai hwnjakthai; bo bwsa-bẃtẃirokno kaham khe tor rwnai wngthai, nogo borok phai khe kasa rwnai wngthai, Kaitorni bororokni yakung súnai wngthai, tekto mannairokno chubanai wngthai, phiya podrepot samung kaham khlaiwi tongnai wngthai.

¹¹Sikla randijwkrokno aro ta khop di, tamni hwn ba sakni muchungma bai bórok káijakna muchungjak khe Khristoni aro tong glak,

¹²hakhe bórok swkango bini thani swmai tangmano swbaiwi majra berjakma klai-o.

¹³Teibo, bórok nok brúm brúm beraiwi sal rohorna srwngo; abo simi ya, Sama ya kókrokno saui bórok kók ruju sana srwngo, buini samungo ahai’-no yak rwna srwngo.

¹⁴Aboni bagwi ang hwno, sikla randijwkrok káijak thung, bwsa-bẃtẃirok manẃi núkhungno nai thung, omo tẃi khe chini kena arirokno chini mungwi hamya sana lama ta rw thung.

¹⁵Tamni hwn ba baksa randijwkrok agi’-no uslu-ui Soitanni lama-o him kha.

¹⁶Phiya khoroksa swk poito gwnang bwrwini nogo randijwkrok tong khe bo bórokno nai thung nuk thung, motha-o poja ta khiklai thung; omo tẃi khe motha sói saichung tongnai randijwkrokno naiwi nugwi man anw.

¹⁷Bokhorok wngwi samung kaham khlainai okrarok rang dobol manna chúgo hwnwi romthai, aboni bere se Kaitorni kók sa thanibo phrwng thanibo belai samung khlainairok bórok dobol manthai klai-o.

¹⁸Tamni hwn ba elembago hai hwnwi sa-o, “Mai nak phuru musukno kapai ta kha di,” phiya “Samung tangnaisa bini samungni rang manthai klai-o.”

¹⁹Okra khoroksa swkno majra ber khe sakki khoroknwi eba khe khorokthamni kók tháisa wng ya khe abono ta khna di.

²⁰Tei buibo kirina tẃi khe sumsok khlainairokno bebakni bwskango khorai di.

²¹Nwng mungsa khá ka yaui mwkhang nai yaui o kókrokno khna di hwnwi ang nono Kaitorni bwskango, Khristo Jisuni bwskango tei suari kwtharrokni bwskango kwrak khe sa-o.

²²Subraini samungni bagwi dakti’-no khoroksani saka phano yak ta bera di. Bui bai baksa sumsok ta khlai di; kwthar khe tong di.

²³Nwng uáisa uisu hamya wngma bai twi bukcha ta nung di, nini bohok hamnani bagwi angur bwtwi kisa nung di.

²⁴Baksa borokni sumsok hai’-no nukjago, a sumsok’-no bórokno majra berjak suknai hwnwi phunugo; tei baksani sumsok khe ulo se nukjago.

²⁵Abo hai kheno samung kahamrokbo hai’-no nukjago, phiya hai’-no nukjak ya phano abono huiwi tonwi man ya.