Read Kok Borok 2 TIMOTHI 2 Bible Online

2 TIMOTHI 2 - Kok Borok bible

2 TIMOTHI 2

¹Hakhe ani sajla, nwng Khristo Jisu bai thansa wngma tẃi khairokjakma bai kwrak khe tong di.

²Borok kwbángmani bwskango ang kók sa phuru nwng khnamani kókrokno borok kahamrokni yago yaphar di, buino phrwngwibo mannai abo tẃirokni yago yaphar di.

³Khristo Jisuni sengkrak kaham wngwi nwng bui bai baksa sátokjagwi tong di.

⁴Sengkrak samung tang phuru bini bokhorokno se khá ham rwna nai-o, abo baino bo borok bángla tong tẃi khe tong li ya.

⁵Batainai borok bataina tongma tẃino batai ya khe sokat man glak.

⁶Kheto kaham khe samung tangnaisa bo swkang’-no mai manthai.

⁷Ang samano uansugui nai di, tamni hwn ba Subrai nono bebak’-no saui man rwnai.

⁸Nwng Jisu Khristono muitu khlai di, ang Kothoma Kaham pírma tẃino bo kwthwini mwthangwi tisajak kha, bo Daud bosongni borok.

⁹Kothoma Kaham pírma bai ang sátokjago, borok butharnai hai khebo sorni dwkhwi bai khajagwi tongo. Kaitorni kók le khajak ya,

¹⁰aboni bagwi’-no ang Kaitorni chongjak bororokni bagwi bebago’-no soi-o; bórokbo Khristo Jisu tẃi mwthangjak thung, mol brúm brúm chẃngsachabo wngwi tong thung hwnwi ang soi-o.

¹¹O kók khe sói’-no: “Chwng bo bai baksa thwi khe chwng bo bai baksa thangnai.

¹²Chwng soiwi máng tong khe chwng bo bai baksa bokhorok wngnai. Chwng bono gosi ya khe bobo chwngno gosi glak.

¹³Chwng hamya phano bo kahamno tongo, tamni hwn ba bo bini tongmung khibiui man ya.”

¹⁴Nwng nini bororokno o kókno muitu khlaiwi rw di, phiya kókmungno tẃiwi kók ta báng lai di hwnwi Kaitorni bwskango bórokno kwrak khe sa di. Abo mungsa samung chúk ya, teibo se khnanairokno dera rw-o.

¹⁵Nwng Kaitorni aroni kók kubuino sói sói khe phrwngma bai samungno tẃiwi lachi yaui tangnaisa hai khe’-no Kaitor bai kaham hwnjakna bagwi káphra di.

¹⁶O swngcharni kók nang ya sa laimano khibi di, abo tẃi sa laima bai bororok Kaitorni lamani phérwi tháng rwrwgo.

¹⁷Bórok phrwngmani abo wng kha kwsa uar rwnai kwsa hamya hai se. Abo tẃi phrwngnai khoroknwirok wng kha Humenai bai Philit.

¹⁸Bórok kubuini lamani phérwi chwng mwthangwi tisajak bai kha hwnwi saui baksa baksano poito udru mudru khlai-o.

¹⁹Hai phano Kaitor nokthai lumani abo kwrak khe lujak; o kók a saka swijak tongo: “Sabo bini borok, Kaitor saui mano,” phiya “Ang Subraini borok hwnwi sanai bo samung hamya yakar thung.”

²⁰Nok kotoro podrepot mairang lota tongo; baksa rukphaini, baksa ba rangchakni, baksa ba buphangni tei baksa ba hani; baksa khe nang kukma samungni bagwi, baksa khe ahaino.

²¹Khoroksa swk omo tẃi hamyarokni yakni sakno súcha khe bo nang kukma samungrogo chúgui man anw; tamni hwn ba bo súchajak, bo nokphangni nangmani borok, bo bebak samung kahamno phnangjakna bagwi tiyar tongo.

²²Siklani khá koborno khibi di; khá kuphur khe chwngno chuba di hwnwi Kaitorno sanairok bai baksa nwng kaham wngna nai di, poito khlaina nai di, hamjakna nai di, khá kwchangna nai di.

²³Nwng kók nang ya kók danda sa laimano khibi di; abo tẃi sa laima bai bororok uá simi uálai-o hwnwi nwng saui mano.

²⁴Subraini seleng uálaithai kwrwi. Bo jotono’-no khairokthai, bo khá logwi phrwngnai kwrwng wngthai,

²⁵bo bini kók khna yarokno jolijak yaui bórokni cha yano phunugui rwthai. Bórok sumsok yakarwi kubuino saui manna tẃi khe Kaitor bórokno lama rwna phano tongo,

²⁶hakhe bórok khá siui bórokno romwi kók khna rwui tonnai Soitanni khẃini yók anw.