Read Kok Borok 2 TIMOTHI 4 Bible Online

2 TIMOTHI 4 - Kok Borok bible

2 TIMOTHI 4

¹Ang nono Kaitorni bwskango tei kiphilwi phai phuru ha-o kwthwirok bai kwthangrokni buj thumnai Subrai Jisu Khristoni bwskango ang nono hai hwnwi dagi-o,

²Kothoma Kahamno saui tong di, jora phano jora ya phano abono kwrak khe sa di; khá hap rw di, khorai di, khá rak rw di, kaham khe khá logwi phrwng di.

³Omo tẃi sal phai anw bororok kók kubuino khnana nai glak, tamo khe sakni muchung tẃi tong anw, bórok belai khnana muchungma tẃi sajakna bagwi phrwngnai kwbángma thum anw.

⁴Bórok kók kubuino khunju kai glak, kerang kothomarogo se kaichom lai anw.

⁵Nwng khe bebago’-no kwrak khe tong di; sátokjak phuru soiwi tong di, Kothoma Kaham pírnai wng di, Kaitor nono samung bermano khlai bai di.

⁶Pun-tok ratharwi barokjakma hai angbo barokjakna nai tong kha; ang o swngcharni thángnani jora wng kha.

⁷Ang kaham khe batai kha, ang batai bai kha, ang poitono yakar li ya.

⁸Tabuk ani bagwi paimani sokat khatijak tongo, abo wng kha kahamni motok, sói khe buj thumnai Subrai a Salo ano abono rw anw, ano simi ya, bono hamjagwi bo phainano naisingwi tongnairoknobo rw anw.

⁹Nwng ani thani dakti’-no phaina nai di.

¹⁰Dima o swngcharno hamjagwi ano khibiui klang kha; bo Thesaloniki-o tháng kha. Krisken Galatia-o tháng kha, Tit khe Dalmatia-o tháng kha.

¹¹Luk simi se ani logi-o. Markni aro thángwi nwng bai baksa bono tubu-ui phai di, bo ani samungo chúgo.

¹²Ang Tukhikno Episo rohor kha.

¹³Nwng phai tẃi Troa-o Karpni thani ang dulai kabu-ui phaimano tubu-ui phai di; bijaproknobo tubu-ui phai di, aboni bere se bukurni bijaproknobo tubu-ui phai di.

¹⁴Mairang lota snamnai Aleksandar belai khe ano leng rw kha; bo khlai tẃi’-no Kaitor bono yagul sunai.

¹⁵Nwng bo bai hus khe tong di, bo belai tungwi chwng pír thani kebeng kha.

¹⁶Ang puila yókna bagwi kók sa phuru khoroksa phano ani bagwi bachanai kwrwi; joto’-no ano khibi klang kha. Kaitor aboni bagwi bórokno khá ta tẃi thung.

¹⁷Hai phano Kaitor ang bai tongwi ano phan rw kha, hakhe ang bebak buini bororokno khna rwna bagwi Kothoma Kahamno kaham khe saui man kha; phiya ang singhoni búkhúknibo yók kha.

¹⁸Subrai ano bebak hamyani yakni phiyógwi kaham kwrwng khe bini chuknohani ha-o ano tlangnai. Mol brúm brúm’-no bo chẃngsacha wng thung! Amen.

¹⁹Ang Priskila bai Akulano tei Onisiporni nokni bororokno khápang rohoro.

²⁰Erasto Korintho tong rwk kha, Trophimno hamya hwnwi Milito ang kabu-ui phai kha.

²¹Masing phai ya sini’-no nwng ani thani phaina nai di. Ubul, Puden, Lin tei Klodiasongbo khápang rohoro tei bebak takhukrokbo khápang rohoro.

²²Subrai Jisu Khristo nwng bai tong thung. Kaitorni hamari norok bai tong thung. Amen.