Read Kok Borok TIT 1 Bible Online

TIT 1 - Kok Borok bible

TIT 1

¹Ang Pol omono swihoro, ang Kaitorni seleng, Jisu Khristoni chonghor. Kaitorni chongjak bororokni poito rak rwna bagwi, phiya chini tongtharni kók bórokno saui man rwna bagwi ang chongwi rohorjak.

²A tongthar wng kha kwthang tong phlaina khatungma kókno tẃiwi se. O swngchar wng ya sini’-no tatal sa ya Kaitor chwngno omo hai mwthangnani kók rw kha,

³hakhe jora sók phai súk kha hwn khe bini kókni bising tẃi abono phunuk kha. Abo ani yago yapharjak kha, hakhe chwngno mwthangnai Kaitor dagima bai ang abono sa-o.

⁴Ang hai khe poito khlainai angsla Titni thani omono swihoro. Apha Kaitor bai chwngno mwthangnai Khristo Jisu nono khairok thung, nono khá kwchang rw thung.

⁵Tei samung bárano khlaina bagwi, phiya taun brúm brúmni motha-o okra chongna bagwi ang nono Krito kabu-o. Ang sama hai khlai di:

⁶Okra majra kwrwi wngthai, bihik khoroksa’-no wngthai, bini bwsarok poito gwnang wngthai, tongmung cha ya eba khe kók khna ya hwnjak thai kwrwi.

⁷Kaitorni samungni barja berjaknai mothani bokhorok majra kwrwi wngthai. Bo kung chuk ya eba khe kisa bai joli ya wngthai; bo phek ya, eba khe thamchi tung ya, eba khe rangni bagwi khámai ya wngthai.

⁸Nogo borok phai khe bo kasa rwnai wngthai, kahamno hamjaknai wngthai. Bo sak soiwi mannai wngthai, kaham khe kwthar khe tongnai wngthai, phiya sakno kók khna rwui mannai wngthai.

⁹Bo phrwngjakmani kók kubuino kwrak khe romwi tonthai. Omo tẃi khe bo buino kók kubuino phrwngma bai khá rak rwui mannai, phiya abono kebengnairokni cha yanobo phunugui mannai.

¹⁰Kók khna ya borok kwbángma tongo, bórok kók nang ya saui buino lama koró rw-o, aboni bere Judaini Khristan hapnairok se abo hai kuk.

¹¹Bórokni búkhúkno ma muthup thai, tamni hwn ba bórok rang khana bagwi simi phrwng thai kwrwino phrwngwi baksa baksani núkhungno udru mudru khlai rw-o.

¹²Kritrokni bisingni’-no diyari khoroksa hai hwnwi sa kha, “Kritrok wng kha tatal máng, mwsa mayung hai hamya, selerni chá kwrak.”

¹³Bo samani o kók kubui se. Aboni bagwi nwng bórokno kaham khe khorai di. Abo tẃi khe bórok lama kubuino khibinairok hwnmano tei Judairokni kerang kothomarokno khunju kai yaui poito kwrak khe tongwi man anw.

¹⁵Bwkha kwthar bororokni thani bebak’-no kwthar; khá kosom tei poito wng ya bororokni thani khe mungsa phano kwthar kwrwi, tamni hwn ba bórok khá kosom khá sitra.

¹⁶“Chwng Kaitorno sini-o,” hwnwi bórok sa-o, phiya a sama kók bórokni samung bai khe gothok ya. Bórok wng kha selengmasingcha, kók khna ya, mungsa samung kaham phano khlaina chúk ya.