Read Kok Borok TIT 2 Bible Online

TIT 2 - Kok Borok bible

TIT 2

¹Nwng kók kaham hwnjakmano phrwng di.

²Chakra bororokno bebago’-no yak ta lái di hwn di, tongmung kaham wng di hwn di, sak soi di hwn di, poito kwrak wng di hwn di, kaham khe hamjak di hwn di, bebago’-no soiwi tong di hwn di.

³Abo tẃi khe chakrajwkroknobo bwrwi kwthar wngwi tong di hwn di. Bórok buino hamya sa ya wngthai, nung kwrak ya wngthai. Káijak bwrwi siklarokno sak sakni sai-sa bai bwsa-bẃtẃirokno hamjaknani, sak soinani, kwthar khe tongnani, phiya bwsaini kók khnaui hamjwk kaham wngnani phrwngna bagwi chakrajwkrok kahamno phrwng thai. Abo tẃi khe khoroksa phano Kaitorni aroni kókno hamya hwn glak.

⁶Chwla siklaroknobo abo tẃi khe’-no sak soi di hwnwi hwn di.

⁷Nwng sak baithangbo bebago’-no samung kahamni bagwi phunugui sajaknai wngthai. Nwng kaichomwi kaham khe phrwng di.

⁸Bui kók egwi man ya abo tẃi kók kaham bai phrwng di, hakhe nini kena arirok chini bagwi mungsa hamya saui man ya wngwi ma lachinai.

⁹Selengrok sak sakni nokphangni kók khnaui bebago’-no bórokno khá ham rwthai. Bórok nokphangni kóknobo i’nhi hwnthai kwrwi,

¹⁰nokphangni manwibo khok thai kwrwi. Hai wng yaui bórok bebago’-no soiwi kaham khe tongthai; omo tẃi khe bórok bebak samung tang thani’-no chwngno mwthangnai Kaitorni kókno kotor khlainai.

¹¹Bebak bororok mwthangjak thung hwnwi Kaitor khairokmano phunuk kha.

¹²Chwng Kaitorno suri yaui sak muchung tẃi tongmano khibiui sak soiwi Kaitorno suriui o swngcharo kaham khe tongna bagwi a khairokma bai phrwngjago.

¹³Chwng khatungmani a Sal kahamno naising twtwi omo hai khe tongna bagwi phrwngjago, a salo chini Kaitor kotor Mwthangnaisa Jisu Khristo chẃngsacha khe nukjaknai.

¹⁴Bebak hamyani yakni chwngno phiyógwi borok kwthar khlaina bagwi bo chini bagwi sakno rw kha, chwng bini borok wngwi samung kaham khlaina muchungna tẃi khe bo omo hai khlai kha.

¹⁵O kókrokno phrwng di, bebak nini phan bai bororokno khábo rak rw di, khobo khorai di; khoroksa bai phano sak nang ya ta wngjak di.