Read Kok Borok TIT 3 Bible Online

TIT 3 - Kok Borok bible

TIT 3

¹Nwng nini bororokno hai hwnwi muitu khlaiwi rw di: Bugrarok bai bokhorokrokno bórom khlai di, bórokni kók khna di, phiya bebak samung kaham khlaina tiyar tong di.

²Khoroksano phano hamya ta sa di hwn di, ta uálai di hwn di, phiya kwtha laiwi bebak bororok bai kwchang kwchang khe tong di hwn di.

³Tamni hwn ba chwngbo salsa si ya, kók khna ya, lama korójak wngwi tongmani. Chwng podrepot sakni muchungmani yago klaiwi tongmani, tongthok cháthokni yago klaiwi tongmani. Chwng naisler laiwi tongmani, músú laiwi tongmani; buibo chwngno naislero, chwngbo buino naislero.

⁴Hai phano chwngno mwthangnai Kaitor khairogwi hamjakmano phunuk khe’-no

⁵bo chwngno mwthang kha. Chwng sak baithang samung kaham khlaima bai bo mwthang ya, bo maya cháma bai chwngno súchaui mwthango, a súchama bising tẃi Phola Kwthar chwngno kwtal khe achai rwui borok kwtal khlai-o.

⁶Kaitor khairokma bai chwng bo bai kaham hwnwi romjagwi khatungma tẃi’-no mwthangjak phlaina tẃi khe Kaitor chwngno mwthangnai Jisu Khristoni yak tẃi chini thani Phola Kwtharno belai khe lukhlaiwi rw kha.

⁸O kók sói se. Kaitorno poito khlainairok samung kaham khlaina nai thung hwnwi nwng o kókrokno kwrak khe sa di hwnwi ang nai-o. O kókrok wng kha bororokni bagwi kaham tei nang kukmani.

⁹Tamo khe kók nang ya sa laimarokno khibi di, pirini mung bwtang kolokrokno khibi di, uálai-suklai wngmarokno khibi di, Kerongni bagwi kók báng laimano khibi di; abórok mungsabo chúk ya, mungsabo nang ya.

¹⁰Kak lai-phui lai khlainai borokno uáinwi hus wng di hwnwi hwn di, aboni ulo bo bai tei ta tong di.

¹¹Nwng saui mano abo tẃi borok wng kha bwkha sitra, bini sumsok’-no bini cha yano phunugo.

¹²Ang Artemano eba khe Tukhikno nini aro rohor khe’-no nwng Nikopoli-o ani thani phaina nai di, ang masing phuru aro tongna hwnwi khá chong kha.

¹³Sina ukil bai Apolono bórokni tháng thani tun horna nai di, bórokni tamo nang nang ya nai di.

¹⁴Samungo nangmani manwirok manna bagwi chini bororok samung kaham khlaina nai thung hwnwi phrwng di; bórok haino samung tang yaui ta tong thung.

¹⁵Ang bai baksa tongnairok bebakno’-no khápang rohoro. Chwng hai khe poito khlainai takhuksongno chwng khápang rohoro hwnwi sa di. Kaitor norok bebakno khairok thung.