Read Kok Borok PHILIMON 1 Bible Online

PHILIMON 1 - Kok Borok bible

PHILIMON 1

¹Khristo Jisuni bagwi alongo klaijak ang Pol omono swihoro. Ang bai baksa chini takhuk Timothibo omono swihoro. Chwng bai baksa samung khlainai khájani Philimonno omono swihoro;

²nini nogo achuk achukmani a mothanobo, chini bukhuk Aphianobo, phiya chwng bai baksa sengkrak Arkhipnobo omono swihoro.

³Chini Apha Kaitor bai Subrai Jisu Khristo norokno khairok thung, norokno khá kwchang rw thung.

⁴Takhuk, suri san brúm brúm ang nini mung káiwi ani Kaitorno hambai rw-o.

⁵Nwng Kaitorni bebak bororokno hamjakmanobo ang khna kha, nwng Subrai Jisuno poito khlaimani abonobo khna kha.

⁶Ang suri sanma khe hai, chwng nwng bai poito thansa wngma bai Khristoni bising tẃi chwng bebak kaham khlaijakmano teibo kaham khe saui manna bagwi se.

⁷Khájani takhuk, nwng ano hamjakma bai ang belai khe tongthogwi khá rak kha! Nwng Kaitorni bebak bororokno khá srang rw kha.

⁸Aboni bagwi ang Khristo tẃi nini takhuk wngma bai nwng tamo khlaithai abono khlai di hwnwi dagirak kha mun.

⁹Hai phano ang nono hamjakma bai se ma koi-o. Ang Pol phano, Khristo Jisuni kók sana bagwi rohorjaknai phano, tabuk bini bagwibo alongo chopjagwi tong phano, ang nono koiwi sa-o.

¹⁰Hakhe Khristo tẃi angsa Onisimni[1] bagwi ang nono koiwi sa-o; alongo tong phuru ang bini bupha wng kha.

¹¹Salsa bo nini mungsa-o phano chúk ya, tabuk le bo nini samungobo chúgo, ani samungobo chúgo.

¹²Ang tabuk nini thani bono rohoro, bini logi ani bwsak khaksa thángnai.

¹³Ang Kothoma Kahamni bagwi alongo tong phuru bo nini wngwi ano naiwi nugwi manna tẃi khe ang bai baksa bono tonna muchungo.

¹⁴Hai phano ang samung kaham khlaina bagwi nini yak khana nai ya; nini muchung tẃi khlai thung hwnwi se ang nai-o. Hakhe nini kók man yaui ang mungsa phano khlai glak.

¹⁵Onisim nwng bai srapsa kakma khe bo nwng bai máng tongna bagwi se wngna phano tongo.

¹⁶Tabuk bo seleng simi li ya, selengni slái phano tei kisa kotor wng kha bo wng kha Khristoni bising tẃi khájani takhuk. Bo bwswk ani samung nangmani borok! Tabuk bo seleng wngwibo, Subraini bising tẃi takhuk wngwibo nini bwswk se samung nangno!

¹⁷Aboni bagwi nwng ano nini logisong hwnwi tong khe nwng ano yachak tẃi’-no bono yachak sók di.

¹⁸Bo mungsa swk hamya khlaima tong khe, eba nono rwthai tong khe ani mungwi swiwi ton di.

¹⁹Nai di, ang yak baithang omono swi-o: Ang Pol nono su anw. (Nwng ani bagwi se mwthangjago hwnwi ang sana nai ya.)

²⁰Hakhe takhuk, Subraini bagwi omo hai khe ani nai ja di; Khristoni bising tẃi takhuk hwnwi ano khá srang rw di.

²¹Ang sama haino nwng khlai anw hwnwi ang omono swi-o aboni slái phano bára khlai anw hwnwi ang saui man súgo.

²²Teibo, ani bagwi nok kaisa tiyar khe ton sók di, tamni hwn ba Kaitor norok suri sanmano khnaui ano norokni yago kiphilwi rwnai hwnwi ang khatungo.

²³Ang bai baksa Khristo Jisuni bagwi alongo tongnai Epaphra nono khápang rohoro;

²⁴ang bai baksa samung khlainai Mark, Aristark, Dima tei Luksongbo abo haino khápang rohoro.

²⁵Subrai Jisu Khristo norokno khairok thung.