Read Kok Borok HIBRU 11 Bible Online

HIBRU 11 - Kok Borok bible

HIBRU 11

¹Poito gwnang wngmani abo wng kha chwng khatungmani abono man súk kha hwnma se, chwng nuk ya phano saui man súk kha hwnma se.

²Agini bororok Kaitor bai kaham hwnjakmani abo wng kha bórok poito khlaima bai se.

³Bebak swngchar Kaitorni kók bai se snamjago hwnwi chwng saui manmani abo wng kha chwng poito khlaima bai se, hakhe nuk ya manwini se o nukma manwirok snamjago.

⁴Abel Kaitorno Kainni slái teibo manwi kaham barokmani, abo wng kha poito khlaima bai se. Poito khlaima bising tẃi se bo Kaitor bai borok kaham hwnjago, tamni hwn khe bo barokmani abo Kaitor bo sak’-no yachak kha. Abel thwiwi tháng phano poito khlaima bising tẃi bo tabukbo kók saui tong kho.

⁵Henok thwi yaui Kaitorni aro tisaui tlangjakmani abo wng kha poito khlaima bai se; khoroksa phano bono nuk rwk li ya, tamni hwn khe Kaitor bono tisaui tlang kha. Henok tisaui tlangjakma swkang bo Kaitorno khá ham rw kha hwnwi Elembago sa-o.

⁶Poito khlai yaui khoroksa phano Kaitorni khá ham rwui man ya. Tamni hwn ba Kaitorni thani phainai borok bo Kaitor tongo hwnwi, phiya Kaitorno naituknai borok bo bai sokat rwjaknai hwnwi poito ma se ma khlaithai klai-o.

⁷Ulo tamo wngnai wng ya bo saui man yaui’-no Noa Kaitor samano khnamani abo wng kha poito khlaima bai se. Bo Kaitorni kók khnaui se rungtor snamo, hakhe a bisingo habwi’-no bo bai bini hik-sarok mwthangjak si-o. Omo tẃi khe bo swngcharno majra bero, hakhe bo Kaitor bai kaham hwnjakmani abo poito khlaima bai se hwnjago.

⁸Kaitor Abrahamno rwna hwnmani a ha-o tháng di hwnwi hwnmano Abraham khnamani abo wng kha poito khlaima bai se. Bo buro thángwi tong kha abo saui man yaui’-no bo bini hano khibiui tháng kha.

⁹Kaitor bono rwna hwnwi kók rwmani a ha-o bo poito khlaima bai se phatarsa hai khe tongo. Bo rínitamu-o Isak tei Jakob bai tong lai-o, bórokbo Kaitor bai a kók’-no kók rwjago.

¹⁰Tamni hwn ba Kaitor káiwi tisamani a taunno Abraham naisingwi tongo, a taun wng kha nokthai kwrak khe tisajak.

¹¹Sara bo bwsa man li ya phano ogo bwsa chúmani abo wng kha poito khlaima bai se. Kaitor bini kók narwk anw hwnwi bo khá khibi súgwi tongo.

¹²Hakhe Abraham thwina kasu phano o borok khoroksani bising tẃi’-no nokhani athukiri swk, twi rukungni hasing lekha bai ya swk bosong kwbángma ongkhor kha.

¹³O bororok poito khlaiwi’-no thwi bai kha. Kaitor rwna hwnwi kók rwmani abono bórok man li ya, tamo khe hakchalo tong twtwi abono nuhurwi yachak sók kha, phiya bórok o swngcharo phatarsa tei riphuji hwnwi gosi kha.

¹⁴Omo tẃi kók sanairok bórok sakni bagwi se ha rutugo abo haino sijago.

¹⁵Bórok khibiui kabumani a hani kók bórok uansuk li ya; a hani kók uansukma te bórok aro kiphilna lama man kha mun.

¹⁶Abo wng yaui bórok manna muchungmani a ha wng kha teibo kaham, abo se Kaitorni aroni ha. Hakhe Kaitor bórok bai “Nwng chini Kaitor” hwnwi ringjaknani lachijak ya, tamni hwn khe bo se bórokni bagwi taun khungsa tiyar khlai-o.

¹⁷Kaitor Abrahamno potaliui phuru Abraham bwsla Isakno yapharwi rwmani abo wng kha poito khlaima bai se. Abraham’-no Kaitor bai kók rwjago, hai phano bini bwsla khoroksa susukno bo ratharna tiyar tongo.

¹⁸Kaitor bono hai hwnwi sa kha, “Isakni bising tẃi nwng bosong mannai.”

¹⁹Abraham saui man súk kha Kaitor Isakno kwthwini mwthangwi mano, hakhe sana tháng khe Abraham Isakno kwthwini kwthang man phi kha.

²⁰Jakob bai Esauno ulo hamchanai hwnwi Isak hwnmani abo wng kha poito khlaima bai se.

²¹Thwinanogo Jakob Josepni bwsla khoroknwino hammari rwmani abo wng kha poito khlaima bai se; bo latha sung twtwi Kaitorno suri lang kha.

²²Josep thwinanogo Israilrokno Ijipni ma kutul anw hwnwi saui klangmani abo, phiya bini bwsakno tẃiwi tamo khlainai khlai ya saui klangmani abo wng kha poito khlaima bai se.

²³Musi achaiwi buma buphasong bono nokha taltham jora huiwi tonmani abo wng kha poito khlaima bai se. Bo wng kha chwrai naithok abo bórok nuk kha, hakhe bórok bugra dagimano khna ya wngnani kiri li ya.

²⁴Musi sikla sógwi bo Pharaoni bwsajwkni bwsla hwnwi gosina soi ya wngmani abo wng kha poito khlaima bai se.

²⁵Srapsani bagwi sumsogo tongthok laiwi tongmani slái Kaitorni bororok bai baksa sátokjakmano se bo hamjago.

²⁶Ijipni bebak rang-ríni slái Masiani bagwi hamya hwnjakmani abo se ham kugo hwnwi bo saui man súk kha; tamni hwn khe bo ulni manthaino se naharo.

²⁷Musi bugra jolimano kiri yaui Ijipni ongkhorwi phaimani abo wng kha poito khlaima bai se. Mokol bai nuk ya Kaitorno nukma hai khe bo kwrak khe tong kha.

²⁸Israilrokni puilani bwsa chwlarokno Butharnai Suari butharwi man ya tẃi khe bo Yókma ter khlaimani abo, phiya duglamo thẃi sarcha di hwnwi dagimani abo wng kha poito khlaima bai se.

²⁹Hakung tẃi basuma hai khe Israilrok Twijlang Kwchak basu-ui manmani abo wng kha poito khlaima bai se; yang Ijipsarok abo hai basuna nai phuru khe bórok twi-o kwlwgwi thwi bai kha.

³⁰Israilrok Jerikoni chokdeualno rekerwi nokha salsni himgurungmani ulo a chokdeual báiwi thángmani abo wng kha poito khlaima bai se.

³¹Baliknai Rahab Kaitorni kók khna yarok bai baksa butharjaknani yakni yókmani abo wng kha poito khlaima bai se, tamni hwn khe bo huijagwi naichomnairokno kaham khe yachak sók kha.

³²Ang teibo sanai da? Gideon, Barak, Samson, Jepta, Daud, Samuel tei diyarirokni kókno sanani ani jora kwbáng kwrwi.

³³Poito khlaimani bising tẃi se bórok aswk harok bai choba nang laiwi mechen kha. Bórok wng kha katswi samung sói’-no se khlai-o, hakhe Kaitor rwna hwnwi kók rwmano man kha. Bórok singhorokni búkhúk muthup kha,

³⁴kirimasingcha hór buthar kha, seng bai tanwi butharjaknani yók kha. Bórok phan kwrwi phano phan gwnang wng kha, bórok kwrak wngwi choba-o buini sengkrakrokno mechen kha.

³⁵Poito khlaima bising tẃi bwrwirok sakni bororokno kwthwini kwthang man phi kha. Baksa ba mwthangjagwi teibo kaham khe tongna tẃi khe phiyókjakna nai ya wngwi sátokjagwi thwi bai kha.

³⁶Baksa ba lengjagwi bujak bai kha, baksa ba khajagwi alongo dajak bai kha.

³⁷Bórok holong khitarjak bai kha, bórok kochaknwi khe ratharjak bai kha, bórok seng bai butharjak bai kha. Bórok mera bukur eba pun bukur chumui tong bai kha, bórok buma man li ya gwja, bórok sátokjak bai kha, bórok hamya khlaijak bai kha.

³⁸Bórokno mannani swngchar kwpal kabo. Bórok riphuji hai khe hasing panthoro tei hathái hathái-o aro-uro ma tong bai kha, bórok harungrogo tei hakhorrogo ma tong bai kha.

³⁹Omorok bebak’-no poito gwnang wngma bai bórokni kók bwswk se sajak! Hai phano se Kaitor rwna hwnwi kók rwmano bórok man li ya,

⁴⁰tamni hwn khe chwngno teibo kaham khlaina bagwi Kaitor chabwi tongo. Bini chapmani khe ahai, bórok chwng bai baksa simi se kaham khlaijak bainai.