Read Kok Borok HIBRU 12 Bible Online

HIBRU 12 - Kok Borok bible

HIBRU 12

¹Chini kók hwn khe chini yaksi yagra-o borok kwbángmarok’-no poitoni sakki tongo. Hakhe phai di, chwng joto pojano tei belai khe kwswngwi tongnai sumsokno khibiui klang anw, hakhe phai di, chini bwskango khachikna tongma jora tẃi khachik lai anw.

²Phai di, chwng Jisuno naharwi tong lai anw, bo’-no chini poitoni yaphang buchuk. Ulni tongthokni bagwi se bo krusno soi-o, kruso thwinanino bo lachimasingcha wngjak ya, hakhe bo tabuk Kaitorni achukthayungni yagra bwkhak achukjak.

³Bo manjak langmano uansugui nai di, sumsok gwnang bororok bai bo bwswk se naislerjak kha! Abo bai’-no norok khá báiwi ta yakar di.

⁴Tamni hwn ba sumsok bai choba nang laiwi norok tabuk suda butharjak ya kho.

⁵Kaitor norokno bini bwsarok hwnwi khápang srangjagwi hai hwnwi samano norok pok bai kha, hai da? “Angsla, Kaitor nono bu khe sak nang ya ta wng di, bo nono khorai khe khá ta tẃi di.

⁶Tamni hwn khe Subrai bo hamjakma borokno bu-o, bo sajla hwnwi yachakmani joto borokno swprago.”

⁷Norok manjakmano Apha se khlai bla hwnwi soi di; tamni hwn khe norok manjakmani abo Kaitor bini bwsarok hwnwi khlaima se abo haino sijago. Bupha bai bujak ya abo tẃi bwsa kebo da tong?

⁸Bini tei bwsarok bujakma hai norok bujak ya hwn khe norok sói bwsa klai ya, basal se.

⁹O swngcharni phasong chwngno bumano se chwng bórokno sak nang ya wng ya, hakhe chini chuknohani Apha chwngno bumano teibo bwswk se soi thai klai! Hai khe se chwng mwthangjaknai.

¹⁰O swngcharni phasong kaham hwnwi sima jora tẃi srapsani bagwi chwngno bu-o. Phiya ba chwng bo bai baksa kwthar wngna tẃi khe Kaitor chini kahamni bagwi bu-o.

¹¹Chwng bujak phuru kisa ya kisa khá hamya hai ma tongo, tongthok ya hai ma tongo. Hai phano omo hai khe bujagwi soinairok bórok ulo aboni bagwi kaham wngwi kwchang kwchang khe tongwi mano.

¹²Hakhe norokni yak kompano tisa di, norokni yáskú kebelno rak rw di.

¹³Lama keplengo him máng tong di, hakhe yakung khora hamya wng glak, tamo khe hamnai.

¹⁴Bebak borok bai’-no kwchang kwchang khe tongna nai di, phiya kwthar khe tongna nai di, tamni hwn khe abo hai khe tong ya khe kebo phano Subraino nuk glak.

¹⁵Kaitor bai khairokjaknani keple ya tẃi khe hus wng bai di. Buphang kwkha hai wng ya tẃi khe hus wng bai di, omo tẃi buphang torwi bini kháma bai buini hamya khlai-o.

¹⁶Esau hai kebo phano tongmung sitra tongnai eba Kaitorno suri ya ta wng bai di, bo bwsa okra wngwi se mai phaisani bagwi buphani aroni bini manthaino phalwi rw-o.

¹⁷Norok saui man bai-o aboni ulo bo bupha bai ham di hwnwi hwnjakna nai kha, tamo khe bo kiphilwi rohorjak kha, tamni hwn khe bo khlaimani a samungno kap twtwi norna nai phano nornani lama nukjak li ya.

¹⁸Tangwi mannai manwini bwskango norok Israilrok hai ma bacha phai ya; norok a hórjlai gwnang Sinai Hathái, a mwnakma bai saklom, a nokbar kotor, a totro khorang, phiya a kók sama khorangni bwskango ma bacha phai ya. Bororok a kók sama khorangno khnaui “Tei kók tháisa phano ta sa si di,” hwnwi koiwi lai kha,

²⁰tamni hwn khe “Tok pun phano a hatháino tang khe abo holong khitarwi buthar di,” hwnwi dagimano bórok soiwi man li ya.

²¹A nukmani abo aswk kirimasingcha Musi hai hwnwi ma sa kha, “Ang kirima cháui kwlwibraui ma tong kha.”

²²Tamo khe norok Siyon Hathái-o tei Kaitor kwthangni tauno bacha phai kha, abo wng kha chisai-chisai suari tongmani chuknohani Jerusalem.

²³Chuknoha-o bumung tisajaknai Kaitorni bwsla okrarok kuthumma kotoro norok bacha phai kha. Bebak bororokni buj thumnai Kaitorni thani, phiya kaham khlaijaknai borok sutrangrokni pholani thani norok bacha phai kha.

²⁴Swmai kwtalni lama khlainai Jisuni thani norok bacha phai kha, Abelni thẃini slái teibo kók kaham sanai a thẃi sarjakni thani norok bacha phai kha.

²⁵Hakhe hus wng bai di, kók sanai Kaitorni kókno khna ya ta wng bai di. O swngcharo Kaitorni kók sanai a borokni kókno khna yarok bórok yók li ya. Hakhe nai di, chuknohani kók sakhlainai a Kaitorni kókno khna ya hwn khe chwng tei bwswk se yók ya wngno!

²⁶Aphuru bini khorang hano kwlwi rw kha, phiya bo tabuk hai hwnwi kók rw-o, “Ang tei uáisa kwlwi rwnai, hano simi ya, nokhanobo kwlwi rwnai.”

²⁷“Tei uáisa” hwnmani o kók wng kha snamjak manwirok kwlwi rwjagwi norjaknai hwnma se, hakhe se a kwlwi rwjak yarok tong rwknai.

²⁸Hakhe phai di, kwlwi rwjak ya abo tẃi ha manma bai chwng hambai rw lai anw. Phai di, chwng kirima tẃiwi Kaitor bai hamjakna tẃi khe bini thani bomwi suri lai anw,

²⁹tamni hwn khe chini Kaitor wng kha sokomornai hór se.