Read Kok Borok HIBRU 13 Bible Online

HIBRU 13 - Kok Borok bible

HIBRU 13

¹Khristo tẃi takhuk hwnwi norok kiching norok hamjagwi tong lai di.

²Sini yarokno nogo kasa rw ya ta wng di. Baksa baksa saui man ya phano suarirokno nogo kasa rw kha.

³Alongo klaijakrokno nai di, norokbo bórok bai baksa alongo klaijak hwnwi khá kaui bórokno nai di. Sátokjaknairokno nai di, norokbo bórok haino sátokjagwi tongo hwnwi khá kaui bórokno nai di.

⁴Káijakma wng kha bebak bai’-no kaham hwnjakna nangnai, hakhe bihik bai bwsai kaham khe tongna nangnai. Buitali-buitala wngnairokno Kaitor buj thumnai.

⁵Rangno mokol chẃng yaui tong di, tongma jora tẃi’-no khá kochomwi tong di. Tamni hwn ba Kaitor hai hwnwi sa-o, “Ang nono khi se khibi ya; ang nono ya se yakar ya.”

⁶Hakhe phai di, chwng khá torwi hai hwnwi sa lai anw, “Subrai ano chubanai, ang kiri glak. Borok ano tamo khlaiwi mannai?”

⁷Norokno Kaitorni kók sanai a swkangni bokhorokrokno muitu khlai di. Bórok bahai khe tong lang kha bahai khe thwi lang kha uansugui nai di, hakhe bórok hai poito gwnang wng di.

⁸Jisu Khristo miyabo haino, tinibo haino, mol brúm brúmbo haino tongnai.

⁹Hámung sini ya podrepot phrwngma bai lama ta koró rwjak di. Chanani kókno tẃiwi bwkha rak yaui Kaitorni khairokma bai bwkha kwrak wngmani abo kaham se, abo tẃi chanani kók rákhoknairok a rákhokma bai bórokni mungsa kaham wng ya.

¹⁰Judairokni rínitamu-o samung khlainai ochairok chini háyá-o ratharmano cháma ya.

¹¹Judai ochai bokhorok pun bwthẃi tlangwi abono sumsokni bagwi barokna hwnwi Khotol Kwthar Kugo habwi-o; phiya a punrokni bwsakrok hwn khe bathamni phataro sókjak.

¹²Aboni bagwi’-no Jisu bo bini sakni thẃi bai bororokni sumsok súna hwnwi taunni phataro butharjagwi-o.

¹³Hakhe phai di, bathamni phataro bini thani thángwi bo lachi rwjak thani chwngbo manjagwi anw.

¹⁴Tamni hwn ba o swngcharo chini bagwi tong phlainai taun kwrwi; phaina hwnmani a taunno se chwng nahar lai tongo.

¹⁵Hakhe phai di, chwng Jisuni bising tẃi ratharmung hai khe Kaitorno lob máng tong lai anw, abo wng kha bini mungno búkhúk bai gosimani abo se.

¹⁶Buini kaham khlaina nai di, norok kiching norok chubana nai di, abo tẃi ratharmungno Kaitor hamjago.

¹⁷Norokni bokhorokrokni kók khna di, bórok khlai di hwnmano khlai di. Bórok norokno nai máng tongo, tamni hwn khe bórok Kaitorni thani bórok samung khlaimano buj ma rw anw. Tumungno norok bórokni kók khna kha hwn khe bórok khápang kwsrang khe samung khlainai; wng ya khe bórok abono khá hamya twtwi khlainai, hakhe abo norokni mungsa-o phano chúk phai glak.

¹⁸Chini bagwi suri san máng tong di. Chini bwkha sutrang abo chẃngsa súgwi mano, tamni hwn khe chwng khe samung kahamno khlaina máng nai-o.

¹⁹Ang norokno jai khe’-no koi ja-o, Kaitor ano norokni thani dakti’-no rohor phi thung hwnwi norok suri san ja di.

²⁰Chini Subrai Jisuno Kaitor kwthwini mwthangwi tisa kha, bo thwima bai se Mera Mwrwknai Kotor wng kha, bo thwima bai se mol brúm brúmni swmai tangjago.

²¹Khá kwchang rwnai Kaitor bini muchung tẃi tongna tẃi khe norokni nangmani joto manwi kahamno rw thung, hakhe Jisu Khristoni bising tẃi bo bini hamjakma hai’-no chini bisingo samung khlai thung. Hakhe mol brúm brúm Khristo chẃngsacha wng thung. Amen.

²²Takhukrok, norok o khá rak rwnai kók khá logwi khna lai ja di hwnwi ang norokno koi ja-o; tamni hwn khe ang norokni thani swimani aswk lok ya.

²³Chini takhuk Timothi alongni phiyókjak kha, abono ang norokno saui man rwna nai-o. Tumungno bo katswi dakti phai khe hakhe norokni aro ang phai phuru ang bono logi tubu anw.

²⁴Norokni bebak bokhorokrokni thani chwng khápang rohormano sa di, Kaitorni bebak bororokni thanibo ahai’-no sa di. Italini takhukrokbo norokno khápang rohoro.

²⁵Kaitor norok bebakno’-no khairok thung.