Read Kok Borok HIBRU 2 Bible Online

HIBRU 2 - Kok Borok bible

HIBRU 2

¹Abo baino chwng khnamani a kókrok bai hakchalo da kagwi tháng langno hwnwi chwng abono teibo kwrak khe romna nangnai.

²Suarirokni yak tẃi rwjakmani a kók kubui hwnwi phunukjak kha, phiya a kókno tẃiwi tong yarok le, eba abono khna yarok le bórok khlaima hai’-no yagul sujak kha.

³Hakhe mwthang sukmani kókno khunju kan ya hwn khe chwng bahai khe yóknai? Subrai bo sak baithang swkang’-no o mwthangnani kókno sa kha, hakhe bini a samano khnanairok omo kubui hwnwi chwngno phunuk kha.

⁴Aphuru Kaitor soidomni samung, uanamasingcha samung tei podrepot ha-o nuk ya samung phunugui bobo bini sakki rw kha. Bo bini muchung tẃino Phola Kwtharni suarnobo rw bai kha.

⁵Kaitor suarirokno bo snamna naimani a swngcharni bokhorok snam li ya, a swngcharni kókno chwng sa-o.

⁶Abo wng ya elembakni kwrẃngsa-o omo hai se sajak tongo, “O Kaitor, borok ba tamo, nwng bini bagwi uansugui tong ba? Borok ba sabo tamo, nwng bono nai tong ba?

⁷Nwng bono suarirokni slái srapsani bagwi se kusu khe tono; nwng bono kotor khlaiwi bini mwkhang belai khe chẃng rw kha,

⁸nwng bono bebakni bokhorokbo snam kha.” Omo wng kha Kaitor borokno bebakni bokhorok snam kha hwnwi sama se; joto manwi’-no oro khopjak bai kha. Aile tabuk borokno bebak manwini bokhorok wngmani chwng nu se nuk ya.

⁹Tamo khe chwng Jisuno nugo! Kaitor khairokma bai Jisu bebak bororokni bagwi ma thwina tẃi khe srapsani bagwi bo suarirokni slái kusu khlaijak kha. Bo sátokjagwi thwima bai bono tabuk kotor khlaijagwi mwkhang belai chẃngsa rwjak khe nugo.

¹⁰Aswk bwsarokno bini chẃngsacha manjak rwna bagwi bebak’-no snamnai, bebak’-no narwknai Kaitor Jisuno sátokjakma bising tẃi kaham khlaimani abo khlaithai klai-o. Tamni hwn ba Jisu simi se mwthangna lama-o lama sonai.

¹¹Bororokni sumsokno sú-ui bo kuphur khlai-o, hakhe bini Bupha bai a kuphur khlaijaknairokni Bupha thansa se. Aboni bagwi’-no Jisu bórokno takhuk hwnnani lachijak ya.

¹²Bo hai hwnwi sama hai, “O Kaitor, nini kókno ang ani takhukrokno sa anw; kuthumjakrokni bebakni bwskango ang nono lob anw.”

¹³Bo hai hwnwibo sa-o, “Kaitorni thani ang khá beranai.” Bo hai hwnwibo sa-o, “Ang oro se, Kaitor ano rwmani a bwsarok ang bai’-no tongo.”

¹⁴Bo bai bwsa hwnjaknairok bórok bahan bwthẃini borok ba Jisubo bórok hai bahan bwthẃini borok wng kha. Bo thwimani bising tẃi butharwi mannai a Soitanno sokomorna bagwi se, phiya thwinano kirijagwi seleng khatiui máng tongnairokno phiyókna bagwi se bo bahan bwthẃini borok wngo.

¹⁶Tamni hwn ba bo suarirokno chubama klai-o o kók ya. Abo wng yaui elembago hai hwnwi sama hai “Bo Abrahamni bosongno se chuba-o.”

¹⁷Omo wng kha bororokni sumsok nakarjakna tẃi khe bo ochai bokhorok wngwi maya gwnang khe tei kaham khe Kaitorni thani samung khlaina hwnwi se bo katswi bini takhuksong hai ma wng phai si-o.

¹⁸Hakhe bo tabuk belokjaknairokno chubaui mano, tamni hwn khe bobo belokjagwi sátokjagwi phai kha.