Read Kok Borok HIBRU 4 Bible Online

HIBRU 4 - Kok Borok bible

HIBRU 4

¹Tabuk, chwng habwi bini thani bathagwi mano hwnwi Kaitor kók rwui klang kha. Hakhe norokni bere khoroksa phano habwi bathagwi man ya tẃi khe phai di, chwng kirima tẃiwi tong lai anw.

²Tamni hwn ba bórok khnama hai’-no chwngbo Kothoma Kahamno khna kha. Bórok Kothoma Kahamno khnama le khna kha, tamo khe abo bórokni samungo chúk li ya, tamni hwn khe bórok abono khnaui poito khlaiwi khá-o chop li ya.

³Hakhe chwng poito khlainairok habwi Kaitorni thani bathagwi tongo. Omo wng kha katswi bo ahai hwnwi sama hai, “Ang joliui ahai hwnwi swmai tang kha, ‘Bórok aro habwi ani thani bathak phai glak.’ ” O swngchar snam bai phuru’-no bini samung pái phano bo o kókno ma sa kha.

⁴Tamni hwn ba salsni salni kók elembakni kwrẃngsa-o ahai hwnwi sajak kha, “Sal snini salo Kaitor bini bebak samungni bathak kha.”

⁵O kókno kók tei uáisa ahai hwnwi sajak phi kha, “Bórok aro habwi ani thani bathak phai glak.”

⁶Puila Kothoma Kaham khnanairok bórok aro habwi Kaitorni thani bathak li ya, tamni hwn khe bórok poito khlai li ya. Hakhe baksa baksa tongo bórok khe habwi Kaitorni thani bathagwi mannai

⁷“Tini” hwnwi Kaitor tei salsa chongmani bising tẃi omo sijak kha. Bisi kwbángma ulo bo Daudni búkhúk tẃi a salni kókno sa rw kha, elembakni o kók swkang’-no tisajak kha, “Tumungno norok tini Kaitorni khorang khnaui tong khe hakhe kók khna ya ta wng si di.”

⁸Tumung’-no Josua a bororokno bathak rwma te aboni ulo tei salsani kókno Kaitor sana nang glak kha mun.

⁹Hai phano salsnini salo Kaitor bathakma hai bini bororokbo bathagwi mannai.

¹⁰Tamni hwn ba khoroksa swk aro habwi Kaitorni thani bathak khe Kaitor bini samungni bathakma hai’-no a borokbo samungni bathaknai.

¹¹Hakhe phai di, chwng aro habwi Kaitorni thani bathakna bagwi káphra lai anw. Bórok kók khna ya wngwi aro habwi man ya wngma hai chini bere khoroksa phano abo hai wngthai kwrwi.

¹²Kaitorni kók wng kha kwthang, abo wng kha nangwi tongo. Babai nwnwi seng kubukni slái phano omo buk kugo. Omo bwkha bai phola thansa wng thani, jora bai pecha thansa wng thani aro’-no swkago. Omo borokni bwkhani muchungma bai uansukmano se romo.

¹³Kaitorno mungsa phano khogwi tonwi man ya. Sirisitini bebak manwi’-no bini thani pheheljak, bini mokol bwskango phiyokjak; phiya chwng bebak’-no sak sakni kókno bini thani ma sanai.

¹⁴Hakhe phai di, chwng poito khlaimani abo kwrak khe rom lai anw. Tamni hwn ba katswi Kaitorni bwskango thángnai ochai bokhorok chwng man kha, abo wng kha ochai kotor Kaitorni Sajla Jisu.

¹⁵Chini ochai bokhorok chwng kebelrokni bagwi maya nang ya abo tẃi ochai bokhorok ya. Tamo khe chwng hai bebago’-no belokjaknai abo tẃi ochai bokhorok se chwng man si-o, ahai phano bo sumsok khlai ya.

¹⁶Hakhe phai di, chwng khá torwi Kaitorni achukthayung gana tháng lai anw, aro chwng khairokjaknai, hakhe katswi chini nangma jora tẃi chwng khairokjagwi chubajaknai.